Членовите на позицијата и на опозиција различно го толкуваат падот на поддршката на евроинтеграциите на македонските граѓани за шест отсто, што го покажува последното истражување на Евробарометар

Според вицепремиерот задолжен за европски прашања, Васко Наумовски, поддршката кај македонските граѓани за европската интеграција и натаму е на многу повисоко ниво во однос на некои земји членки.„Мислам дека не би требало да се игнорираат и определени отворени прашања кои што нашата држава ги има со некои држави членки на ЕУ и заради чии што индивидуални ставови Република Македонија на некој начин сеуште ги нема започнато преговорите, иако Европската Комисија процени дека Македонија е подготвена да го направи тој следен чекор. Сигурен сум дека во наредниот период, доколку критериумите за членство кои што важеа за сите останати држави кои сега се дел од ЕУ, беа дел од проширувањата во 2004-та, односно во 2007-ма година, ќе бидат применети во случајот на Република Македонија и дека македонските граѓани соодветно ќе ја дадат својата поддршка на овој процес“, изјави Наумовски.За пратеникот Александар Спасеновски од ВМРО-ДПМНЕ, поддршката за европската интеграција на Македонија има вообичаен тек.     „И сегашната поддршка од две третини на граѓаните на Република Македонија кои што стојат за интеграцијата на државата во Европската Унија е исклучително висока и таа е уште повисока од поддршката што ја имаат други држави-членки на ЕУ пред моментот на нивното зачленување. Исто така,  многу e висока и многу поголема од поддршката која што државите членки ја имаат помеѓу своите граѓани во моментов“, изјави Спасеновски.За дел од опозицијата, резултатите на анкетата на „Евробарометар“ се последица на, како што сметаат, водењето анти-ЕУ кампања.„Јавноста е апсолутно запозната дека година, година и пол наназад се врши една кампања во Република Македонија, поттикната од Владата, каде што јавно истакнати личности, па и високи  функционери укажуваат на македонската јавност дека Македонија не мора по секоја цена да влезе во Европската Унија, потоа дека Македонија мора да бара своја алтернатива, па дури и сериозни тези дека ЕУ кај и да е ќе се распадне. На крај, тоа резултираше со овој податок“, изјави пратеникот Андреј Жерновски од ЛДП.Според истражувањето на Евробарометар, 60 отсто од граѓаните на Македонија сметаат дека членството во ЕУ е добро за државата, 11 проценти оти е лошо, а 27 ниту едното ниту другото. Споредено со минатогодишното истражување, се забележува пад од 6 отсто во однос на расположението за евроинтеграција.