Свет
Пауновски осуден на три и пол години затвор
Поранешниот министер Љубен Пауновски вчера не дојде да ја слушне пресудата со која беше осуден за злоупотреба на над еден милион евра
ВТОРА ПРЕСУДА ЗА ПОРАНЕШНИОТ МИНИСТЕР ЗА ОДБРАНА
Поранешниот министер Љубен Пауновски вчера не дојде да ја слушне пресудата со која беше осуден за злоупотреба на над еден милион евра
Поранешниот министер за одбрана Љубен Пауновски вчера беше осуден на три и пол години затвор за аферата со злоупотреба на над еден милион евра, што беше откриена за време на конфликтот во 2001 година. Основниот суд Скопје 1 вчера го прогласи Пауновски за виновен за злоупотреба на службената положба. Тој вчера не се појави да ја слушне одлуката, иако редовно доаѓаше на судските рочишта. Неговиот адвокат не беше задоволен од пресудата.
– Изречената казна е превисока. Ќе чекаме да го добиеме образложението на пресудата, а потоа истата ќе ја обжалиме пред Апелацискиот суд – изјави адвокатот Венцислав Крчински.
Ова е втора пресуда против поранешниот министер, откако во октомври 2003 година тој за истиот случај доби пет и пол години затвор. Апелацискиот суд по неколку месеци ја поништи првата пресуда и предметот го врати на повторно одлучување.
Според вчерашната одлука, обвинетиот Љупчо Петковски, татко на сопругата на Пауновски, беше осуден на три години и шест месеци затвор, а Владимир Талевски доби две и пол години робија. Најниска казна од една година затвор доби поранешниот потсекретар во Министерството, Кирил Ѓоргов.
На вчерашното изрекување на пресудата се појави само обвинетиот Ѓоргов.
Во изречената затворска казна на Пауновски му се пресметува и времето минато во притвор од околу четири месеци. Според судската одлука, тој и другите осудени ќе треба да вратат околу 69 милиони денари – пари од државниот буџет што биле злоупотребени.
Предмет на обвинението се два договора – еден за набавка на прехранбени продукти и еден за изградба на станови во кругот на касарната „Илинден“ во Скопје.
Казните што судот вчера ги изрече се пониски од оние што ги донесе Судскиот совет пред три години. Тогаш Талевски доби 4,5 години затвор, а Ѓоргов беше осуден на тригодишна затворска казна. Петковски тогаш не беше осуден зашто постапката против него беше издвоена.
По изрекувањето на првата пресудата реагираше Хелсиншкиот комитет, кој оцени дека „пресудата е ерозија на македонското судство“. Тогаш Пауновски беше притворен се’ до правосилност на пресудата, но повторно беше пуштен да се брани од слобода откако мина околу четири месеци во притвор.
Според обвинението, Пауновски во декември 2000 година му наредил на Ѓоргов да потпише договор со фирмата „ХС компани“ за набавка на прехранбени стоки и за инвестициска изградба на станбен комплекс во касарната „Илинден“, без притоа да бидат почитувани процедурите од Законот за јавните набавки.
Министерството за одбрана префрлило на сметката на „ХС компании“ 60 милиони денари. Во времето на склучувањето на договорот фирмата била сопственост на други лица, но по два месеца ја купиле Петковски и неговиот баџанак Талевски.
Пауновски беше министер во владата на Љубчо Георгиевски и по откривањето на случајот тој беше разрешен од функцијата.
Александар Манасиев
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бројот на бегалци во Германија годинава достигна нов врв
Бројот на бегалци кои живеат во Германија годинава достигна нов врв, покажуваат денешните владини податоци, пренесува Дојче веле.
Околу 3,48 милиони бегалци со различни видови дозволи за престој живееле во Германија на крајот на јуни 2024 година, што е за приближно 60.000 повеќе отколку на крајот на 2023 година.
Една третина од овие бегалци дошле од Украина.
Бројката вклучува и некои поединци кои се обврзани да ја напуштат Германија, но остануваат во земјата под политика на толеранција која опфаќа низа ситуации, како што се болест, недостаток на документи за идентификација или луѓе чии деца имаат дозвола за престој.
Статистиката беше дадена како одговор на барањето на партијата Социјалистичка левица во парламентот и првпат беше објавена од Ној Оснабрикер Цајтунг.
Свет
Лавров: Русија не сака ескалација, но западните политичари се однесуваат како деца
Рускиот министер за надворешни работи Сергеј Лавров денеска изјави дека Русија не сака да ги ескалира тензиите со западните земји, но дека, како што наведе, „политичарите на овие земји се однесуваат како деца“.
„Не сакаме ескалација. Се чини дека западните политичари навистина имаат менталитет на дете, иако како возрасни заземаат одговорни позиции: министри, премиери, канцелари, претседатели“, рече Лавров.
Лавров нагласи дека неколку месеци во светот се разговара за тоа како Русија наводно само се заканува и зборува за „црвени линии“.
Свет
Израелска армија: Убиени околу десет високи команданти на Хезболах
Портпаролот на израелската армија, контраадмирал Даниел Хагари, изјави дека заедно со Ибрахим Акил, во денешниот израелски воздушен напад врз јужен Бејрут биле убиени околу десет високи команданти на либански Хезболах.
Хагари на прес-конференција рече дека Акил и другите членови на елитната единица Радван на Хезболах се собрале во подрумот на една зграда кога биле мета и убиени.
Весникот „Тајмс оф Израел“ наведува дека Хагари рекол дека тоа биле „командантите кои го подготвиле и го воделе планот на терористичката организација Хезболах за напад на северната територија на државата Израел.
Портпаролот на израелската војска тврди дека како дел од таа инвазија, Хезболах планирал упад на израелска територија сличен на нападот на Хамас од Газа на јужна израелска територија на 7 октомври минатата година. Тогаш започна војната меѓу Израел и таа палестинска исламистичка организација.
Во меѓувреме, израелскиот министер за одбрана Јоав Галант на платформата X објави дека ќе продолжи „секвенцата на акции во новата фаза“ од конфликтот со Хезболах додека не се постигне целта за безбедно враќање на Израелците раселени поради прекуграничниот конфликт во нивните домови.