Скопје
Привремен сообраќаен режим на дел од улицата „Перо Наков"
Градот Скопје ги информира граѓаните дека во сабота и во недела ќе се асфалтира крстосницата на улицата „Благоја Стефковски” со улицата „Перо Наков” и улицата „840 БИС”.
Поради изведувањето градежни работи на овој дел од улицата „Перо Наков” ќе се воведе привремен сообраќаен режим, а сообраќајот ќе се одвива наизменично, со физичка регулација.
Во недела, сообраќајот ќе биде забранет од крстосницата на улицата „Перо Наков” со булеварот „Киро Глигоров” (поранешниот булевар „Војводина”) до претходно споменатата крстосница.
Автобусите на јавниот градски превоз на линиите со број 3Б, 23 и 54 ќе бидат пренасочени преку булеварот „Киро Глигоров”, булеварот „Александар Македонски” и улицата „Благоја Стефковски”.
Градот Скопје апелира до сите учесници во сообраќајот да покажат разбирање додека траат градежните работи на улицата „Перо Наков”, да се придржуваат на поставената патна сигнализација и да ја приспособат брзината на движење на условите на патот. /крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Општина Кисела Вода ги реконструира сите тоалети во ООУ ,,Кирил Пејчиновиќ”
Општина Кисела Вода ги реконструира сите тоалети во ООУ „Кирил Пејчиновиќ“. Проектот кој во минатата година стартуваше со обнова на санитарните јазли на долниот кат, сега ќе биде заокружен со целосна реконструкција на сите преостанати тоалети. Неодамна, во дворот на овој објект општината изгради и спортски комплекс со фудбалско и кошаркарско игралиште, терени за одбојка и за пинг понг, а како што информираше градоначалникот Орце Ѓорѓиевски, во моментот се подготвува проектната документација за доградба на училиштето со што, сите ученици ќе одат во прва смена.
„Ги реконструираме сите тоалети во ООУ „Кирил Пејчиновиќ“. Грижата за нашите деца, се огледува преку континуираните проекти за унапредување на условите во образовните објекти кои се појдовна станица за нивниот интелектуален развој. Во ова училиште, претходно ги реконструиравме тоалетите на долниот кат. Извршивме промена на санитарните елементи, го реконтруиравме и подот, како и ѕидовите и плафонот. Продолжуваме и на другите катови, со што ја заокружуваме целата реконтрукција на сите тоалети во училиштето кои беа во катастрофална состојба години наназад.
Изразувам огромна благодарност до Светска банка за поддршката на овој проект кој значи подобрување на условите во училиштето и грижа за учениците. Дополнително, сакам да најавам дека во овој момент ја припремаме проектната документација за доградба на училиштето со што, со зголемување на капацитетот сите ученици ќе одат во прва смена.Исто така, во дворот на овој објект изградивме и спортски комплекс со фудбалско и кошаркарско игралиште, терени за одбојка и за пинг понг. Продолжуваме силно и посветено со подобрување на условите во образовниот процес, бидејќи влогот во најмладите е влог во иднината“, изјави градоначалникот Орце Ѓорѓиевски.
Скопје
(Видео) Јовановска: Заради инаетот на ДПМНЕ, заглавија проектите за градинки и училишта во Скопје
На денешната седница на Советот на Град Скопје, советничката од Левица – Катерина Јовановска истакна дека инаетот на ДПМНЕ е причина за заглавените проекти за училишта и градинки во Скопје.
– Досега требаше да научите дека советничките групи и советниците поднесуваат иницијативи, а градоначалникот е тој којшто поднесува предлог – одлука. Зошто советничката група на ВМРО – ДПМНЕ не поднесе иницијатива, туку го рипна Градоначалникот и веднаш поднесе предлог – одлука? Одговорот го кажа самата колешка Марија, којашто кажа дека тоа е поради ИНАЕТ што се води помеѓу советничката група на ВМРО – ДПМНЕ и Градоначалникот со службите на градот Скопје – потенцираше советничката Катерина Јовановска од Левица.
Левица секогаш апелира кон запазување на правните процедури. Обраќајќи се кон граѓаните, Јовановска од рече:
,,Почитувани граѓани, поради инает којшто го води советничката група на ВМРО – ДПМНЕ со нивниот градоначалник, дечињата од Аеродром, Кисела Вода и Гази Баба ќе почекаат уште долго време додека седнат во клупите на училиштата којшто треба да се изградат и градинките, како и спортското игралиште што досега требаше да се изгради, а не предизборно да ги донесуваат во погрешна процедура овие одлуки”.
Скопје
Во сабота и недела авионска дезинсекција во Скопје против возрасни форми на комарци
Градот Скопје ги известува граѓаните дека на 01.06 и 02.06.2024 година (сабота и недела) во раните утрински часови ќе се реализира авионска дезинсекција на подрачјето на градот Скопје против возрасни форми на комарци.
„Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите“, се наведува во соопштението на Град Скопје.