Свет
Насев честел станови и деловен простор
Скопски градежни фирми на Градот му отстапувале деловни простори и станови во ексклузивни делови на Скопје за да бидат ослободени од плаќање комунални такси.
УЈДУРМИ СО КОМУНАЛНИТЕ ТАКСИ во Скопје во времето на РИСТО ПЕНОВ
Скопски градежни фирми на Градот му отстапувале деловни простори и станови во ексклузивни делови на Скопје за да бидат ослободени од плаќање комунални такси. Тоа се случувало во вториот мандат на поранешниот градоначалник на Скопје, Ристо Пенов, а било откриено од Државниот завод за ревизија пред еден месец. Освен на еден стан, даден на кредит на Ленче Нелковска, сопруга на тогашниот претседател на Советот на Град Скопје, Страшо Нелковски, а сега советник на СДСМ во Општина Аеродром, на останатите административно-деловни простори и станови не им се знае сопственикот. Ујдурмата била направена со склучување цесија меѓу градежни фирми, Градот и Јавното претпријатие "Паркови и зеленило". Цесијата е потпишана на 21 декември 2000 година, при што Градот Скопје ги отстапува побарувањата во износ од 6,8 милиони денари од "Зимекс" и 7,5 милиони денари од "Конартис" во корист на ЈП "Паркови и зеленило". Врз основа на склучената цесија, на 4 мај 2001 година ЈП "Паркови и зеленило" со "Зимекс" склучува три договори за изградба на три административно-деловни простори со вкупно 89,8 квадратни метри по цена од 65 илјади денари за еден квадратен метар плус ДДВ.
На 25 април 2002 година е заведен и Анекс кон договорот, за изградба на уште 125 квадратни метри административно-деловен простор по истата цена.
Откако ревизорите извршиле увид на самото место, утврдиле дека во деловно-административните простории се вселиле други правни лица, а претпријатието не презело активности за да се стекне со сопственост.
"Директорот Сашко Насев ги пречекорил овластувањата оти го оневозможил претпријатието да располага со просториите и дозволил ?Зимекс’, спротивно на законите за сопственост и облигациони односи, да се стекне со имотна корист во висина од над 16 милиони денари", пишува во ревизорскиот извештај.
На 22 декември 2000 година ЈП "Паркови и зеленило" склучува два договора со "Зимекс" за изградба на два стана, од кои еден со вкупна површина од 69,6 квадрати, а вториот со 46,5 квадрати, по цена од 1.690 тогашни германски марки. Ревизорите на самото место утврдиле дека за помалиот стан на 15 февруари 2002 година бил склучен купопродажен договор меѓу претпријатието и Ленче Нелковска. Според договорот, половината од парите Нелковска ги платила веднаш, а преостанатиот дел на 48 еднакви рати. Ревизорите утврдиле дека Нелковска должи 25 рати, односно 10.464 евра плус ДДВ, а не и била пресметана затезна камата за доцнењето на исплатата. Според ревизорите, со договорот за продажбата на станот на Нелковска, директорот Насев, кој сега е амбасадор во Канада, му нанел материјална штета на претпријатието оти не спровел јавно наддавање, со што ги ставил граѓаните во нерамноправна положба во корист на поединци.
Судбината на поголемиот стан не се знае, освен тоа дека не е во сопственост на претпријатието, со што на "Зимекс", Насев му овозможил стекнување противправна корист во износ 16,3 милиони денари.
Државниот завод за ревизија препорачал "Паркови и зеленило" итно да ги расчисти имотно-правните односи за претпријатието да се стекне со сопственост врз деловните и станбените простори и да се обесштети за неможноста да ги користи до денес, потоа да се испита одговорноста на надлежните органи за потпишувањето на договорите за отуѓување на станбените објекти. Ревизорите бараат претпријатието да го наплати долгот од Нелковска со пресметана затезна камата за доцнење на отплатата на ратите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Пукано во канцеларијата на Камала Харис
Американската полиција објави дека пукале во предизборната канцеларија на американската потпретседателка и кандидат на демократите Камала Харис во Аризона, само една недела по вториот обид за атентат врз Доналд Трамп.
Штетата предизвикана од неколку истрели од огнено оружје е откриена во канцеларијата на Демократскиот национален комитет во населбата Темпи во градот Феникс, соопшти локалната полиција, а пренесува „Њујорк пост“.
Shots fired into Kamala Harris Arizona campaign office pic.twitter.com/9Vxpxx9Y0S
— Breaking News (@TheNewsTrending) September 25, 2024
„Никој не беше во канцелариите во текот на ноќта, но тоа предизвикува загриженост за безбедноста на оние кои работат во таа зграда, како и на оние кои се во близина“, изјави полицискиот претставник Раџан Кук.
Тој потврди дека полициските инспектори ги анализираат доказите собрани на местото на настанот, како и дека се преземени дополнителни мерки за подобрување на безбедноста на персоналот и другите луѓе кои работат и живеат на тој простор.
Според него, засега никој не е уапсен во врска со овој инцидент, но властите ги истражуваат сите можни мотиви.
Инцидентот уследи по вториот обид за атентат врз Трамп на неговиот терен за голф во Вест Палм Бич на 15 септември.
Камала Харис закажа посета на Аризона како дел од нејзината кампања за петок, а тоа треба да биде нејзина втора посета на оваа важна американска држава откако беше номинирана за кандидат за претседателските избори на Демократската национална конвенција во август.
Свет
Британски лекари тргнале четиргодишно момче од апарати, предвидувајќи му смрт: тоа преживеало
Предвидувањата на британските лекари дека четиригодишно момче ќе почине набргу откако ќе го симнат од апарати не се остварија, пишува „Sky News“.
Момчето, познато по иницијалите Н.Р., било родено со тешка мозочна малформација и поминало со месеци на интензивна нега по два срцеви застоји. Во април, судијата Најџел Пул одлучил дека останувањето на апарати за одржување во живот не е во најдобар интерес на детето, откако болницата Кингс колеџ побарала од Високиот суд да ја направи својата проценка.
Сепак, момчето „не само што преживеа, туку и напредуваше“ откако беше тргнато од вентилаторот пред повеќе од четири месеци, рече судијата Пул. Тој додаде дека Н.Р. сега сам дише. „Не се исполнија очекувањата дека Н.Р. нема да може да се згрижи дома и дека нема да живее долго по екстубацијата“, истакна тој.
Тој објасни дека некои одлуки за лекување биле донесени во јануари оваа година, кога Н.Р „страдал многу повеќе“ и дека имало „малку или никакви докази дека можел да најде некакво задоволство, освен утешниот допир на неговите родители“.
„Сега може да биде изведен надвор, на пример во парк. Може да ужива во сонцето и чувството на ветрот во косата. Живее во дом со љубов“, додаде судијата. Тој нагласи дека му било „задоволство“ да гледа фотографии од момчето дома со неговите родители.
Мајката на момчето во изјавата пред Високиот суд рече дека волјата за живот на нејзиниот син е „силна“ и дека има добар живот. „Н.Р. преживеа кога лекарите и медицинските сестри кои се грижеа за него со месеци мислеа дека не може. Заслужи нов почеток“, заклучила таа.
Свет
Во Тајланд се убиени 125 крокодили за да се спречат да избегаат за време на поплавите
Фарма за крокодили во Тајланд уби 125 влекачи поради страв дека ќе избегаат за време на поплавите во земјата и ќе го загрозат населението, изјави нејзиниот сопственик.
„Дождот ги еродираше ѕидовите на фармата и за жал моравме да убиеме 125 крокодили кои ги одгледуваме 17 години“, потврдил за АФП Натапак Хумкад, фармер во провинцијата Ламфун.
Одгледувачот рече дека тој и неговите вработени ги убиле сијамските крокодили со струја за да ги спречат да избегаат и да талкаат по селата, слободно да ги напаѓаат селаните и добитокот.
Сијамскиот крокодил, кој може да порасне и до три метри, е ендемичен вид на Југоисточна Азија кој е критично загрозен во дивината.
Одгледувачот рече дека контактирал со властите за да ги смести неговите влекачи во привремено засолниште додека поплавата не се смири, но неговото барање било одбиено бидејќи животните биле преголеми.