Скопје
Водовод со три нови проекти за подобри услуги за граѓаните
ЈП Водовод и канализација-Скопје во петок промовираше три нови проекти, ’мој инкасатор’, ’плати брзо’ и ’доставување на состојба на водомер’.
Со проектот Мој инкасатор граѓаните сами можат да го одберат инкасаторот што ќе сакаат да им го прочита водомерот. Се работи за систем кој е интегриран на веб страницата на Водовод и преку кој граѓаните можат веднаш од својот дом да повикаат инкасатор. Инкасаторите ќе бидат запишани со име и презиме. Услугата ќе биде бесплатна. Овој проект произлезе по поплаките на корисниците дека се случува инкасаторот подолго време да не го прочита водомерот, бидејќи не биле дома корисниците, не стигнал инкасаторот итн., по што пристигаат големи сметки наеднаш.
Проектот ’Плати брзо’ опфаќа поставување на 12 терминали за плаќање на сметки, кои се поставени на локации низ целиот град, а од претпријатието најавуваат дека во блиска иднина планираат поставување на вкупно 30 терминали. Со овие терминали граѓаните повеќе нема има потреба да одат до наплатните пунктови за да ја платат својата сметка и да чекаат ред, туку ќе можат истата да ја подмират на локацијата која им е најблиска.
И опцијата ’Доставување на состојба на водомер’ се наоѓа на веб страницата на Водовод, при што со користење на формата и пополнување со најосновните податоци, дописот може да го поткрепат со фотографија (од бројачот на водомерот). Со овој проект се олеснува работата и на инкасаторите и на корисниците. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Андреј Темов од Кисела Вода стана државен шампион во тенис до 12 години
Кисела Вода доби државен шампион во тенис! На Државно првенство на Македонија за јуниори до 12 години, кое се одигра денес, титулата најдобар ја понесе Андреј Темов, ученик од ООУ Круме Кепески.
Градоначалникот Ѓорѓиевски кој го бодреше, му ја честиташе победата и му посака понатамошни успеси. Му укажа дека и понатаму може да смета на поддршката која ја добива од Општина Кисела Вода и дека покрај финансиска поддршка, тој и сите други талентирани спортисти, можат да сметаат и на одлични услови за развивање на своите спортски потенцијали.
– Голема е мојата радост што денес нашата општина, Кисела Вода доби државен шампион во тенис до 12 години. Андреј Темов, кој честопати бил гостин во мојот кабинет, покажа како се креираат резултати кога некој е силно посветен на она што го сака. Овој извонреден успех е доказ за неговата посветеност, труд и талент, и ни покажува дека иднината на спортот во нашата општина е светла. Имав чест и привилегија лично да го бодрам Андреј на овој важен настан и од срце му ја честитам победата. Неговата истрајност и желба за успех се инспирација за сите нас. Како градоначалник на Општина Кисела Вода, сакам да му посакам понатамошни успеси и да го охрабрам да продолжи да го следи својот сон.
Општина Кисела Вода ќе продолжи да го поддржува Андреј и сите други талентирани спортисти. Како и досега, ќе обезбедуваме финансиска поддршка, но и одлични услови за развивање на спортските потенцијали. Силно верувам дека со правилна поддршка и инвестиции во изградба на спортската инфраструктура, нашите млади спортисти ќе можат да постигнуваат уште поголеми успеси и да ја претставуваат нашата општина и држава на највисоко ниво. Честитки уште еднаш на Андреј Темов! Нека оваа победа биде само една од големата низа на успеси, изјави градоначалникот Орце Ѓорѓиевски.
Скопје
Изградба на нова улица и пешачка патека во Јака, општина Илинден
Општина Илинден започна со изградба на уште една улица во населбата Јака, која е во рамки на програмата за Реконструкција, рехабилитација и изградба на локални улици и патишта Oпштина Илинден.
Станува збор за улицата „109“ во должина од 430 метри а покрај изградбата и асфалтирањето оваа улица ќе добие и пешачка патека по речиси целата должина на улицата.
Градоначалникот Александар Георгиевски направи увид на почетокот од изградбата на улицата и информираше дека работните активности се одвиваат со предвидената динамика, а оваа улица е од огромно значење за жителите во овој дел на општина.
Финансиските средства се целосно обезбедени од буџетот на Општина Илинден. А со реализација на овој проект ќе се подобри патната инфраструктура на општина Илинден, ќе се зголеми безбедноста во сообраќајот и ќе се овозможи квалитетни услови на жителите во реализирање на нивните секојдневни активности, велат од општината.
Скопје
Од општина Кисела Вода почна проектот „Итно копче“
Од денес Општина Кисела Вода е првата локална самоуправа што ја имплементира услугата „Итно копче“ во соработка со Црвениот крст. Се работи за аларм уред поставен на белезица, кој на постарите и изнемоштени лица во случај на итна здравствена потреба им овозможува да комуницираат со оператор или да им биде испратен тим за прва помош директно во нивниот дом.
Услугата за почеток е достапна бесплатно за 40 корисници, а тенденцијата е овој број да се зголеми, истакна градоначалникот Ѓорѓиевски, кој му се заблагодари на генералниот секретар на Црвениот крст на Република Македонија, Саит Саити, за сите досегашни заеднички проекти.
Презентирајќи го „Итно копче“, информираа дека продолжува и проектот за бесплатен транспорт на овие лица, кој почна од Кисела Вода минатата година.
„Општина Кисела Вода денеска ја почнува новата услуга ‘Итно копче’, наменета за нашите постари и изнемоштени сограѓани. Оваа услуга, која е достапна 24/7, е овозможена преку соработката со Црвениот крст и претставува уште еден чекор напред во нашата посветеност кон грижата за најранливите категории на граѓани. „Итно копче“ е иновативен аларм-уред, кој на нашите сограѓани им овозможува брз и лесен пристап до помош во секое време. Сè што е потребно е да го притиснат копчето на уредот, по што ќе добијат повик од операторот на контакт центарот на ‘Итно копче’. По воспоставувањето на контакт, корисникот ќе ги сподели информациите за своите тегоби, а обученото лице ќе му даде понатамошни насоки. Доколку е потребно, ќе биде испратен тим за прва помош директно во нивниот дом. Општина Кисела Вода и досега беше лидер во обезбедување на услуги за постарите и изнемоштените лица и лицата со посебни потреби. Ние први започнавме со услугата за бесплатен превоз, овозможувајќи им на нашите повозрасни сограѓани транспорт до лекар или до некоја институција за вршење на административни услуги. Оваа услуга продолжува и годинава, но со големо задоволство ја промовираме и новата услуга со бесплатни нараквици со итно копче. За почеток, општина Кисела Вода обезбедува вакви нараквици за 40 корисници, со надеж дека оваа бројка ќе се зголеми во иднина. Се надеваме дека и другите општини, а зошто не и Град Скопје, ќе ја следат оваа траекторија и ќе се приклучат кон обезбедувањето на подобри услови за граѓаните. Нашата мисија е да обезбедиме безбедност, грижа и поддршка за сите наши сограѓани, а „Итно копче“ е уште еден значаен чекор во остварувањето на таа мисија“, истакна градоначалникот Ѓорѓиевски.
Генералниот секретар на Црвен крст на Република Македонија, Саит Саити, истакна дека со овој проект се надградува досегашната одлична соработка со Општина Кисела Вода за корисниците од овој дел на градот.
„Примерот со Општина Кисела Вода е пример за следење, типичен пример за грижа за сопственото население за имплементација на улогата на градоначалникот. Црвениот крст дава поддршка на градоначалниците, на институциите на системот за тоа како да ги подобрат социјалните политики. Се надевам дека истиот ќе биде следен од останатите градоначалници и од другите институции. Ова за Црвениот крст е само почеток, сега за сега ги покриваме општините во Скопје, со тенденција во наредните година, две да се прошириме и во поголемите градови во нашата земја. Засега ова услуга ја користат 100 лица. Со договорите што ги правиме, денес почнуваме со Општина Кисела Вода, како прва, а интерес пројавија и други градоначалници, би биле задоволни ако стигнеме до бројката на 1.000 корисници, со тенденција да ги покриеме сите граѓани кои имаат ваква потреба, изјави Генералниот секретар на Црвен крст на Република Македонија, Саит Саити
Петранка Димишкова, која веќе 33 години е дијабетичар, е првиот корисник што денес преку уредот поставен на раката бесплатно ја искористи услугата. Досега во општина Кисела Вода седум лица го користеле ова „итно копче“, но за тоа плаќале. Од денес, и за нив и за другите, засега вкупно 40, услугата ќе ја покрива Општина Кисела Вода.