Македонскиот пејач Тоше Проески загинал во моментот кога неговото возило удрило во камионот, а не при ударот на Туарегот во заштитната ограда

Македонскиот пејач Тоше Проески загинал во моментот кога неговото возило удрило во камионот, а не при ударот на Туарегот во заштитната ограда.

Ова за хрватскиот весник Вечерњи лист го изјави сообраќајниот вештак Дарко Коњевиќ од Славонски Брод, кој го изврши увидот на местото на несреќата утрото околу 6 часот и 30 минути на 16 октомври 2007 година, кога загина балканската поп икона Тоше Проески на автопатот Загреб-Липовац, во близина на Нова Градишка.

Предната десна страна на возилото во кое беше Тоше Проески, поради силината на ударот, навлегла под камионот во должина од 2,2 метри и силно го притиснала Туарегот меѓу вратата и предното стакло на местото на кое Тоше Проески се наоѓал во полулежечка положба и врзан со појасот, вели Коњевиќ

Тоше Проески, според вештакот, загинал во тој момент, а неговиот возач и пријател Георги Гергиевски беше тешко повреден, додека менаџерката Љиљана Петровиќ мина со полесни повреди.

Возилата така закачени продолжиле да се движат уште неколку десетини метри, а кога брзината на движење на приколката на камионот и на туарегот се изедначиле, приколката го отфрлила автомобилот на страна по што туарегот се завртел за 180 степени и со десната страна удрил во средишната одбојна ограда и застанал свртен во спротивен правец.

„Пејачот Тоше Проески не настрада од ударот во заштитната ограда, туку при удар во задниот дел на приколката“, тврди вештакот Коњевиќ.

Од друга страна во автомобилот комплетно откажал системот за заштита, бидејќи ниту едно од седумте воздушни перничиња не реагираше на страотниот удар во задниот дел од приколката на италијанскиот камион.

Имено, непосредно по несреќата ја тестиравме управувачката единица која ги координира сите воздушни перничиња и се зачудивме кога сфативме дека тој управувачки механизам воопшто не добил информација дека се случил судирот, раскажува Коњевиќ.

Тоа е чудно, а и веќе при првиот контакт со приколката на туарегот буквално му отпаднало предното тркало, пресечено од задната метална страница на приколката, додава вештакот.

Во својот извештај напишав дека причина за несреќата е недоволно странично растојание, вели сообраќајниот вештак Дарко Коњевиќ, додавајќи дека Туарегот можел да вози и 200 километри на час, а доколку се движел по левата страна на коловозот, ништо не би се случило.

Клучна и основа алка во целиот настан е што туарегот претходно на десната лента почнал да се приближува до поспоро возило пред себе, но не почнал навреме да ги престигнува возилата пред себе, рече за Вечерњи лист, вештакот Дарко Коњевиќ од Славонски Брод, кој за 32 години работа вештачел над 17 илјади сообраќајни несреќи во Хрватска./крај/вл/мп