Манчестер Сити, во зимскиот преоден рок потроши 180 милиони фунти (206 милиони евра) за четири засилувања, останатите 19 премиерлигаши потрошија 177 милиони фунти за нови играчи.

Зимскиот преоден рок во Англија заврши, а во фокусот на вниманието беше Манчестер сити. На „Граѓаните“ не им е лесно оваа сезона, моментално се петти на табелата со 15 бода помалку од лидерот Ливерпул, што донекаде ги објаснува активностите на трансфер пазарот што ги презеде менаџерот Пеп Гвардиола.

„Клубот на Гвардиола потроши 180 милиони фунти за четири засилувања во јануари, останатите 19 премиерлигаши потрошија 177 милиони фунти за нови играчи“, обајви британскиот јавен сервис, Би-би-си.

Аргентинецот Нико Гонзалес официјално потпиша неколку минути пред полноќ и тој е најновото, четврто засилување на Сити оваа зима. Тоа беше и најголемиот трансфер во Англија во последниот ден од преодниот рок. Порто ќе добие отштета од 50 милиони фунти (околу 60 милиони евра).

Претходно од Ајнтрахт Франкфурт пристигна Египќанецот Омар Мармуш за 59 милиони фунти (околу 70 милиони евра), Узбекистанецот Абдукодир Хусанов од Ленс за 33,6 милиони фунти (околу 40 милиони фунти) и Бразилецот Витор Реис од Палмеирас за 29,6 милиони фунти (околу 36 милиони евра).

Во исто време, тоа е второто најголемо трошење на еден клуб во зимскиот преоден рок досега. Челзи во 2023 година, потроши рекордни 330 милиони евра (275 милиони фунти) на нови играчи.

Фудбалската федерација на Шпанија одговори на обвинувањата и критиките од Реал Мадрид за, како што тврдат од шпанскиот и европскиот шампион, неправедно судење на нивна штета. Да потсетиме, ситуацијата во нарушениот однос меѓу Реал и Федерацијата ескалира по натпреварот против Еспањол.

Екипата од Барселона победи со 1:0 во 22. коло од шпанската Ла Лига, со голот на Карлос Ромеро во 85. минута од натпреварот. Ситуацијата која предизвика најмногу полемика се случи во 60. минута кога Ромеро, стрелецот на подоцна победничкиот гол, го фаулираше Килијан Мбапе, за што доби жолт картон, а од Реал тврдат дека фудбалерот на Еспањол требало да биде исклучен.

Реал Мадрид по мечот беше бесен на судиските одлуки, па во понеделникот и официјално се пожали на судиските грешки до Шпанската фудбалска федерација. Во писмото сеј вели дека настаните од мечот против Еспањол „ја преминале секоја граница на човечка грешка или судиска интерпретација“ и дека „таков вид на манипулација повеќе не може да се игнорира“.

Покрај официјалното писмо на Реал Мадрид по натпреварот се огласи и клупската телевизија, во врска со стартот на Ромеро врз Мбапе.

„Ова е агресија која може да повреди играч. Со вакви работи Реал треба да се спарави во оваа валкана Негреира лига. Ако ситуацијата беше обратна, само ќе требаше да ги погледнете сите наслови и сите медиуми“.

„Лигата на Негреира“ е термин кој во Реал се почето го користат, алудирајќи на наводите дека Барселона платила вкупно 8,4 милиони евра на Хозе Марија Енрикез Негреира, поранешниот потпретседател на шпанската судиска комисија и неговата компанија од 2001 до 2018 година.

Негреира, пак, наводно делегирал судии кои одговараат на Барселона. Барселона призна дека платила дел од споменатата сума на компанијата на Негреира, но тврдеше дека барала само видео компилации од судиски перформанси.

Дури 18 од 20-те клубови од Ла Лига издадоа заедничко соопштение во кое изразија загриженост поради откритијата за нечесните практики во Барселона.

Шпанската фудбалска федерација по обвинувањата од Реал се огласи со соопштение во кое се вели дека „длабоко жали за тонот и сериозноста на обвинувања кои го доведуваат во прашање интегритетот на судиското тело и самото функционирање на лигата.“

Од Федерацијата додаваат дека разбираат дека во развојот на професионалниот фудбал може да дојде до несогласувања за некои одлуки, но веруваат и дека сите вклучени работат одговорно и ги почитуваат правилата.

„Судијата е предмет на преглед и анализа, но тоа не смее да доведе до обвинувања за сомневање во интегритетот, што не само што ги засега судиите туку и го поткопува кредибилитетот на самиот фудбал“, велат од Федерацијата.

Кристијано Роналдо непосредно пред неговиот 40-ти роденден, во интервју за „Ел Чирингито“, рече дека е најдобриот фудбалер во историјата.

„Досега имам постигнато 923 гола, но не ми е важно дали ќе постигнам 930, 950 или што и да е во кариерата. Ако успеам да постигнам 1.000, одлично. Ако не, и тоа е во ред. Но, бројките не лажат. Јас сум најдобриот фудбалер во историјата, точка“.

Фудбалерот на Ал Наср продолжи: „Можеби повеќе ги сакате Пеле, Меси или Марадона. Јас го разбирам тоа и го почитувам, но јас сум најдобриот и најкомплетниот играч досега. Не сум видел подобар фудбалер од мене. Јас сум добар изведувач на слободни удари, шутирам добро, со лева и десна нога… Брз сум, силен, добро играм со глава… Да се каже дека Роналдо не е комплетен фудбалер. Нема покомплетен фудбалер од мене“.

Роналдо откри дека на почетокот на кариерата бил блиску до трансфер во Барселона.

„Кога сè уште бев во Спортинг Лисабон, Барселона сакаше да ме донесе. Имаше договор за трансфер според кој требаше таму да одам една година подоцна. Но, тогаш дојде Манчестер јунајтед и заминав веднаш.

Тој играше во Барселона многу пати, но како ѕвезда на нејзиниот најголем ривал, Реал Мадрид.

„Сакав да играм на Камп Ноу. Сосема посебна аура, енергија. Ме исвиркуваа, ме навредуваа, а јас тоа го сакав и секогаш постигнував гол“.

Роналдо истакна дека најсреќен бил во Реал, вели дека „клубот и градот секогаш се во неговото срце“, а потоа објасно зошто решил да замине во Јувентус.

„Сакав нов предизвик, ново поглавје во мојот живот. Му кажав на претседателот Флорентино дека сакам да одам и тој тогаш прифати. Но, за време на преговорите, тој не се согласуваше толку добро со мене. Го разбирам, бидејќи секогаш го прави тоа. Тој сакаше да се вратам, но не можев бидејќи веќе му кажав на Јувентус дека доаѓам“.