Македонија
Македонското здравство на 27 место на европската скала за квалитет на здравствената заштита
Здравствениот систем во Република Македонија забележа благо искачување од три места на европската скала за квалитетот на здравствената заштита во споредба со лани и во моментов се најде на 27 – то место.
Иако е во втората половина на листата, во одредени сегменти подобро стои и од некои земји-членки на ЕУ.
На првите 5 места се листата се рангирани Холандија, Швајцарија, Исланд, Данска и Норвешка, пренесува „zdravstvo24.mk“ од каде истакнуваат дека зад Македонија се голем број земји на Европската унија, како што се Унгарија, Полска, Латвија, Романија и Бугарија.
Здравствениот систем во Република Македонија е повисоко рангиран и од здравствените системи во Србија и Албанија.
Последна на листата е Србија, а Црна Гора и Босна и Херцеговина воопшто не се рангирани.
Права и информирање на пациентите, време на чекање за третман, здравствени исходи, опсег и достапност на здравствените услуги и превенција и Лекови биле главните индикатори кои биле земени како носители во рангирањето.
Во овој сегмент стоиме лошо, а за времето на чекање услуги од максималните 225 поени, оценети сме со 163.
Претпоследни сме на листата за сегментот фармација, а зад нас е само Албанија.
Во однос на вложените средств во Извештајот на EHCI (European Health Consumer Index), Македонија исклучително високо котира на ранг-листата на здравствените системи во Европа според вредноста, односно здравствените услуги, а според овој критериум Македонија го зазема високото седмо место.
Во извештајот стои дека сите поранешни југословенски држави се обидуваат да изградат модерен здравствен систем, а Македонија е успешна во делот на електронското здравство.
„Во областа е-Здравство, некои земји од Централна и Источна Европа, особено Македонија, имаат воведено апликации што сè уште се ретки и во Западна Европa“, се вели во анализата на Европскиот индекс на здравствени корисници.
Сепак, според ова истражување, лошо сме позиционирани во однос на издвојувањата за здравство, имаме висока доенечка смртност, лоши податоци за и околу крвниот притисок, а се истакнува и дека нема податоци за МРСА за очно перде, нема дијализа во домашни услови.
Од министерството за здравство најавија дека ќе продолжат и понатаму посветено да работат на целосна имплементација на системските реформи,се со цел здравствениот систем во земјава во иднина да напредува уште повеќе во рангирањето според EHCI./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.
Македонија
Системот за видеонадзор на сообраќајниците „Безбеден град“ е поставен во Скопје, Куманово и Тетово
Министерот за внатрешни работи Панче Тошковски денес оствари работна средба на Единицата за оперативно-технички работи при Бирото за јавна безбедност во чија надлежност е системот за видеонадзор на сообраќајниците познат како “Безбеден град“.
Во рамки на посетата министерот беше запознаен со работата на оваа организациска единица, тековните активности и проблеми од делокругот на нивната работа.
„Во тој контекст беше истакнато дека во моментот ваков систем е поставен само во Скопје, Куманово и Тетово, има недостаток на покриеност на многу значајни крстосници, а голем дел од камерите и опремата која се користи во овој систем е технички застарена, а дел и неисправна. Исто така бев информиран за наградбата на системот која е во тек, а која опфаќа замена на постојните камери со нови и проширување на системот со нови камери на точки кои досега не беа покриени. Водено, во фаза на тестирање е системот за автоматско евидентирање на сообраќајни прекршоци за чие целосно ставање во функција потребно е да се направат и соодветни законски измени“, издвои министерот Тошковски од средбата и додаде:
Во иднина треба во континуитет да се инвестира во овој дел, да се прошири и во другите градови низ државата, како и да се распредели дополнителен кадар со цел оваа организациска единица да работи непречено во текот на 24 часа, бидејќи е од круцијално значење за обезбедување на поволна безбедносна состојба.