Во Србија на 4-ти мај ќе биде повторено гласањето на 15 избирачки места по вонредните парламентарни избори од 24-ти април, а според досегашните резултати кои почиваат на 99,45 отсто од обработениот изборен резултат, во парламентот влегуваат шест партии, додека листата Демократска партија на Србија – Движење Двери, падна под изборниот праг, соопшти во петокот утрото по два часот Републичката изборна комисија (РИК).

Синоќешната седница во РИК ја одбележал инцидент кога челникот на Движењето Двери, Бошко Обрадовиќ и неговите приврзаници, по соопштените резултати според кои листата ДСС-Двери се лизнала под изборниот праг на 4,99 отсто, вербално ги нападнале претседателот на РИК, Дејан Ѓурѓевиќ, и директорот на државното биро за статистика, Младен Ковачевиќ, извикувајќи „Срамете се, како ќе излезете пред народот“, пренесуваат белградските електронски медиуми.

По анализата на 99 спорни избирачки места, РИК соопшти дека повторно ќе се гласа во среда на 4-ти мај, а на тие места се запишани вкупно 19.631 избирач, така што можна е и промена и во конечниот исход за гласовите за листата ДСС-Двери.

Најмногу поништени резултати има во Ниш – на пет избирачки места, по две во Врање и во Јагодина, и по едно избирачко место во Бачка Топола, Сремски Карловци, Ужице, Кладово и во белградските општини Палилула и Нов Белград.

Врз основана обработените 99,82 отсто од избирачките места, односно 99,45 отсто од гласовите, изборниот цензус од 5 отсто го минале шест листи на партии и коалиции, а во парламентот влегуваат и малцинските партии на војводинските Унгарци, Бошњаците од Санџак, Албанците од југот на Србија и партијата на Зелените.

Неоспорна е победата на коалицијата „Србија победува“ предводена од Српската напредна партија (СНС) со освоени 48,24 отсто, а втора е Социјалистичката партија на Србија (СПС) со 10,96 отсто од гласовите. Српската радикална партија (СРС) освоила 8,11 отсто, коалицијата на Демократската партија (ДС) – 6,03 отсто, коалицијата на Социјалдемократската партија, Либералнодемократската партија и Лигата на социјалдемократите на Војводина (СДС-ЛДП-ЛСВ) – 5,02 отсто, додека во последен момент под изборниот праг со 4,99 отсто се лизна коалицијата на Демократската партија на Србија и Движењето Двери (ДСС-ПД), и ѝ недостига само 0,01 процент за постигнување на цензусот.

Челникот на СНС и актуелен премиер на техничката влада Александар Вучиќ, изјави во четвртокот ноќта дека „никогаш не би украл ниту глас“ и соопшти дека неговата партија ќе ги признае сите резултати „какви тие и да бидат“. Најави дека новата влада треба да биде формирана по 28-ми мај, за кога е закажана вонредната седница на Скупштината на Србија (парламентот)./крај/мф/сн.

Извор: Макфакс