Македонија
Премиерот Груевски во Брисел на средба со Баросо
Премиерот Никола Груевски денеска во Брисел ќе се сретне со претседателот на Европската комисија Жозе Мануел Баросо
Груевски и Баросо, на првата меѓусебна средба, јави дописникот на МИА, треба да разговараат за препораката на Европската комисија и очекувањата на Македонија за одредување датум за почеток на преговори за членство во ЕУ на претстојниот самит на Унијата. Се очекува да стане збор и за спорот за името, со чие решавање Грција го условува почетокот на преговорите. Европската Комисија по препораката за почеток на преговори испрати порака дека таа е дадена, меѓу другото, и како поттик државата да го реши проблемот со Грција со цел што поскоро ЕУ да ја усвои и да одреди и конкретен датум.Груевски се среќава со Баросо по средбата со грчкиот премиер Јоргос Папандреу на која, и покрај очекувањата на меѓународните претставници, не дојде до напредок во преговорите за затворање на прашањето за името. Премиерот побара од грчкиот колега Папандреу на Европскиот совет да не го блокира одредувањето на датумот за започнување преговори со ЕУ. Министерот Милошоски ова, исто така, го порача вчера на состанокот на ОБСЕ во Атина. Папандреу во Пили и вчера заменик министерот за надворешни работи Димитри Друцас ја повторија позицијата на грчката страна дека без решение на прашањето за името Македонија нема да ги започне преговорите. По последната посета на премиерот Груевски во Брисел, на 29 октомври оваа година со високиот претставник не ЕУ за надворешна и безбедносна политика Хавиер Солана, изјави дека по позитивниот извештај и препораката од ЕК и очекуваната визна либерализација, Македонија останува посветена на решавање на другите преостанати прашања, вклучувајќи го и проблемот со името што го наметна Грција. Осврнувајќи се на македонско-грчкиот спор, Груевски нагласи дека како и секое решение, и ова ќе зависи не само од една, туку од двете страни.Засега е неизвесно каква ќе биде одлуката на Европскиот совет на 7-ми декември за иднината на македонската евроинтеграција. Во контекст на надминување на проблемот со името со Грција, минатата недела во Скопје ненајавено дојде Карл Билд, министер за надворешни работи на Шведска, земја претседавач со Европската унија, а премиерот Груевски упати писмо до шефовите на држави и влади на земјите членки на ЕУ и побара Македонија да добие датум за почеток на преговорите
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.