Ланскиот победник во Лигата на шампионите Интер доживеа уште еден пораз во четвртфиналето од Шалке 04, а истата судбина но на домашен терен ја сподели и Тотенхем кој ба „Вајт Харт Лејн“ беше совладан од Реал

Најголемото изненадување во годинешниов циклус натпревари во Лигата на шампионите, германскиот претставник Шалке 04 се пласираше во полуфиналето каде ќе има двобој со Манчестер јунајтед. Реал Мадрид, пак, со пласманот им овозможи на фудбалските фанови овој месец да проследат вкупно четири „Ел Класико“, односно дуели со вечниот ривал Барселона: еден меч во првенството на Шпанија, фианлето во Копа дел Реи и двата во полуфиналниот дуел во Лигата на шампионите. Шалке по победата во Милано од 5:2 беше практично полуфиналист, и покрај заканите на Интер дека може да изненади како што тоа го стори на гости во осминафиналето против другиот германски претставник Баерн Минхен, иако по првиот меч на „Сан Сиро“ имаше негатива. шампионот беше разбиен со вкупен резултат 7:2, откако вечерва Германците славеа повторно, овојпат со скромните  2:1. Се покажа дека попусто беше куражењето на Леонардо дека може да се направи изненадување, кога ни самите фудбалери не веруваа во тоа, а пак и играчки не се поодготвени за такво нешто. Творец на победата на Шалке беше Раул Гонзалес, кој по првото полувреме кога Интер се обидуваше да дојде во водство, во 45. минута откако претходно неколкупати си поигра со гостинската одбрана, велемајсторски го совлада Хулио Сезар заобиколувајќи го  откако ги остави да „висат“ последните играчи од последнито одбранбен ред на Интер. Ова беше 71 гол на Раул во Лигата на шампионите, или 72 во сите европски натпреварувања и е водечки на вечната табела на стрелците во ЛШ, со два гола предност пред Филипо Инзаги и пет пред Андри Шевченко. Но Раул, имаше огромен придонес и при постигнувањето на победничкиот погодок во 81 минута кога ги надмудри противниците давајќи одлична топка во празно за Бенедикт Хеведес. Претходно Интер успеа само да изедначи во 49 минута преку Тиаго Мота.Откако во првото полувреме гостите од Милано имаа само една поизразена прилика, и тоа по шут на Дејан Станковиќ (еден од петте кои завршија во рамките на голот од вкупно 20-те на Интер) кој беше фантастично одбранет од домашниот репрезентативен голман Неуер, Леонардо најпосле се сети во игра да го внесе Горан Пандев, што се чини повеќе беше очајнички обид затоа што целиот тим на „нераѕирите“ беше демотивиран и вќе помирен со судбината.Во Лондон, пак, Реал допатува со големи 4:0 и четата на Жозе Мурињо покажа дека само куртоазија беа претходно даваните изјави дека треба да се биде претпазлив во дуелто со Тотенхем. Секако ова потекнуваше најмногу од фактот што „спарсите“ до вечерва една година не беа поразени на нивниото игралиште, но вечерва на голот беше малерозниот бразилски голман Еурелио Гомеш кој со катастрофалната реакција на еден млак шут право во него упатен од Кристијано Роналдо успеа да ја смести топката во својата мрежа. Тоа се случи на почетокот од второто полувреме, откако Пављученко во првото полувреме промаши неколку убави прилики од кои најголемата во 25-та минута кога од десет метри осамен шутираше преку голот откако беше проигран од Ленон а во 60-та повторно по проигрување од Рафаел ван дер Ваарт од пред петерецот со глава шутираше над голот. Сепак со играта Тотенхем не ги разочара своите навивачи, и во текот на мечот на моменти беше и подобар противник, додека, пак, односот на играчите на Реал покажа дека Мурињо не дозволува опуштање во пресрет на дуелите со Барса.