Македонија
Верските заедници бараат уставни измени
Поглаварите на верските заедници на денешната пред празнична средба предложија иницијатива за измени и дополнувања на Член 40 од Уставот на Република Македонија, со кој експлицитно ќе се дефинира бракот како заедница на еден маж и една жена. „Загрижени од наводните демократски дебати и принципи, ние, претставниците на црквите, верските заедници и религиозни групи во Република Македонија, сметаме дека е потребно бракот како институција да биде афирмиран и уставно дефиниран како заедница на еден маж и една жена. Од аспект на социјална грижа, пак, предлагаме децата без родители да можат да бидат посвојувани само и единствено од лица од различен пол, кои се во законски брак, како и од самохран родител“, се вели во соопштението достапно на веб сајтот на МПЦ. Верските заедници упатија апел до граѓаните и до пратениците во Собранието на Република Македонија, за широка поддршка на нивната иницијатива. На ова експресно реагираа дел од пратениците во Собранието. Владо Бучковски од СДСМ изјави дека ваквите постапки дефинитивно покажуваат дека МПЦ и владата на Груевски се во брак што е опасно за карактерот на државата каде се промовира дека црквата е одвоена од државата. „Кога се отвораат прашања за измени на Уставот најмалку повикана е МПЦ да дава предлози. Сметам дека се нанесува штета генерално на карактерот на државата, каде што ние пред се го почитуваме атеизмот како принцип, а во Уставот е загарантирана слободата на вероисповест. Ако се одвоени црквата и државата сметам дека ова е еден непримерен потег што го прави црквата и влегува директно во кампањата на ВМРО-ДПМНЕ која ја води Влатко Ѓорчев, што наидува на серија критики во делот на нетолеранцијата на нашето општество и дискриминацијата кон дел од популацијата“, рече Бучковски кој додаде дека ваквите потези се „опасен филм за Македонија“.Сафет Незири од ДУИ изјави дека околу овие прашања треба да се биде внимателен. „Ако се реши да се отовори Уставот сметам дека треба да има еден поширок консензус за вакви промени“, рече Незири. Владејачката партија пак вели дека не гледа никаков проблем во тоа што иницијативата доаѓа од верските заедници.„Не сме информирани за таква иницијатива на верските заедници, но нивно право и должност е дадат и посветат внимание на државата за важни општествени прашања. Бракот како заедница на маж и жена е еден од легитимните интереси на верските заедници кои се грижат за здравјето на граѓаните и нацијата, но и за зачувување на моралните вредности кои се традиција во Македонија кај сите верски заедници“, рече Александар Спасеновски, пратеник на ВМРО-ДПМНЕ./крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.