Европа
Путин: Кризата во Украина има внатрешен карактер и не избувна по вина на Русија
Кризата во Украина има внатрешен карактер и не избувна по вина на Русија, изјави претседателот Владимир Путин во четвртокот на состанокот со постојаните членови на Советот за безбедност на Руската Федерација, кој подоцна во телефонски разговор со иранскиот претседател Хасан Роухани истакнал дека украинската криза може да биде надмината само со почитување на интересите на многунационалното население во сите региони.
„Се разбира, ние не можеме да ги игнорираме сите случувања кои се развиваат околу Украина, Крим, како и кон сѐ она што се однесува на овој сложен проблем. Сакам да истакнам дека таа криза не се случи по наша вина, ние на одреден начин сме вовлечени во неа”, рекол рускиот претседател Владимир Путин.
„Сакам да нагласам дека, пред сѐ, тоа е внатрешноукраинска криза. За жал, свесни сме, дека на овој или на овој начин ние сме вовлечени во тие настани”, додал Путин.
„Треба да заедно да размислиме за тоа како да ги градиме односите со нашите партнери и пријатели во Украина и со другите наши партнери во Европа и САД”, им предложил Путин на присутните на седницата на рускиот национален Совет за безбедност.
Путин притоа нагласил дека темата за Украина на заседанието во четвртокот не била планирана. „Првите планирани прашања беа за развојот на односите меѓу Руската Федерација и земјите од Централна Америка и Карибите”, рекол Путин на почетокот од седницата, пренесува Итар-Тасс.
На седницата учествувале и премиерот Дмитриј Медведев, шефот на администрацијата на Кремљ, Сергеј Иванов, спикерот на Думата (парламентот) Сергеј Наришкин, секретарот на рускиот Совет за безбедност, Николај Патршев, шефот на дипломатијата Сергеј Лавров, како и челниците на безбедносните ресори и агенции.
Рускиот претседател потоа имал телефонски разговор со иранскиот претседател Хасан Роухани, како што истакнува Кремљ, по барање на Техеран, во кој покрај другото била спомената и темата Украина при што Путин оценувајќи ја острата ситуација во оваа земја истакнал дека „решението на актуелната криза е можно само доколку се темели на безусловното почитување на интересите и волјата на многунационалното население” на Украина./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Русите по две години ослободија млада Украинка: „Ја мачеа, ја изгладнуваа“
Во рамките на 52-та размена на воени заробеници, Русите ја ослободија Маријана Чечељук, 24-годишна полицајка на Националната полиција на Украина (НПУ) од Мариупол. Таа беше во заробеништво повеќе од две години. По почетокот на инвазијата на Украина, Маријана и нејзината помлада сестра се сокриле во фабриката за челик Азовстал, пишува Украинска Правда.
Кога цивилите беа евакуирани од фабриката за челик, тие беа однесени во руски филтрационен камп. Русите, откако дознале за нејзината професија, ја пренеле во истражниот затвор во Доњецк. После тоа, извесно време била задржана во затворскиот логор во Оленивка, а потоа испратена во затворите во Таганрог и Мариупол.
„Се обидоа да ја придобијат ќерка ми, и понудија голема плата, ја заплашија. Но таа одби“, изјави мајката на Маријана, Наталија Чечељук за весникот ЗМИНА во јануари. Мајката на приведената полицајка рече дека Маријана била изгладнувана, тепана и малтретирана на различни начини.
Здравјето и се влошило поради затворските услови – респираторните заболувања и болките во грлото се претвориле во хронична форма на бронхитис.
„Маријана ослабе многу, имунитетот ѝ ослабна, косата почна да ѝ опаѓа, менструацијата ја изгуби“, вели мајката.
Наталија постојано и пишувала на ќерката, но Маријана не добивала писма. Долго време таа не знаела што се случува со нејзиното семејство, дали се добро и каде се. Кога Координативниот штаб за воени затвореници објави видео од ослободените воени заробеници, исто така, се гледа како Маријана плаче кога првпат и се јавува на мајка си.
Во рамките на оваа размена беа ослободени 70 мажи и пет жени. Најмалку една третина од воените затвореници имаат повреди, сериозни болести или инвалидитет.
Европа
Холандија и подари на Украина 24 авиони Ф-16: „Употребата не е ограничена“
Холандија дава 24 ловци Ф-16 на украинските воздухопловни сили што ќе може да ги користи и против цели во Русија.
„Ограничувањата за тоа каде Украина може да ги користи никогаш не беа дискутирани“, рече холандската министерка за надворешни работи Ханке Бруинс СлотБруинс Слот, додавајќи дека употребата не е ограничена ни на границата во близина на Харков.
Министерката во заминување ги негира претходните извештаи дека САД треба да ја одобрат испораката на овие ловци.
Украина очекува да добие 30 белгиски Ф-16, но може да ги користи само против цели во Украина, бидејќи тоа се услови поставени од Белгија.
Европа
(Видео) Зеленски во Шведска: Само заедно можеме да го запреме лудилото од Москва
Украинскиот претседател Володимир Зеленски денеска потпиша билатерален безбедносен договор со Шведска, еден од трите планирани со нордиските земји, бидејќи бара дополнителна воена поддршка од Западот во војната против Русија.
Соопштението доаѓа додека западните земји дебатираат дали да и дозволат на Украина да користи западно оружје за да нападне воени цели во Русија, поддржувајќи офанзива врз североисточниот украински град Харков.
„Можете да видите дека Русија се обидува да ја прошири војната… Само заедно можеме да го запреме лудилото од Москва“, рече Зеленски на потпишувањето на договорот, 13-ти таков договор што Киев го потпиша со западна земја.
Зеленски рече дека ќе потпише билатерални договори и со Норвешка и Исланд.
Воздушната одбрана, производството на муниција и заедничкото производство на оружје се на врвот на агендата на петочниот самит меѓу Зеленски и премиерите на Шведска, Норвешка, Данска и Исланд и претседателот на Финска.
Сите нордиски земји, кои цврсто ја поддржуваат Украина, се членки на НАТО.
„Постојано се повторува, вие буквално не се борите само за сопствената слобода, туку и за нашата слобода и нашата безбедност“, рече шведскиот премиер Улф Кристерсон.
„Ова е причината зошто поддршката на Украина е толку фундаментална, егзистенцијална задача за Шведска и за сите други нордиски земји“, додаде тој.
Претходно овој месец, Шведска соопшти дека се согласила за дополнителна воена помош за Украина во вкупна вредност од 7 милијарди долари во текот на три години, додека во последните недели Норвешка преговараше за билатерален безбедносен договор со Киев.
Данска и Финска веќе потпишаа 10-годишни безбедносни договори со Украина во февруари и април, соодветно.