Македонската политика во однос на пропуштањето на бегалците кои транзитираат низ земјата ќе биде во тесна координација со австриската политика во однос на ова прашање, најавија во петокот шефовите на дипломатиите на Македонија и Австрија, Никола Попоски и Себастијан Курц.

Според шефот на на македонската дипломијата, во однос на бегалската криза, она што е највжано е секој да ја врши својата работа во однос на сопствената територија, при што крајната цел е постигнување резултат кој ќе обезбеди хуман третман и безбедна ситуација во однос на справувањето со оваа криза. Попоски нагласи дека во разговорите со неговиот австриски колега се согласиле дека бројот на пропуштени бегалци во Македонија ќе зависи од вкупната бројка на тоа колку мигранти ќе бидат примени во земјите членки на Европската унија (ЕУ).

„Бројот на примените мигранти ќе зависи од тоа колку мигранти ќе бидат примени во земја членка на ЕУ, односно колку што ќе биде тој број, толку ќе пуштиме да транзитираат низ Македонија. Единствениот начин на кој ќе се влегува во Македонија ќе биде на легално место каде што може да се направи регистрација. Целата помош која е понудена од Австрија и другите земји е добредојдена. Маекдонија до овој момент сите напори во справувањето со оваа криза ги финансиира преку средства обезбедени од даночните обврзници на Македонија и билатералната помош како оваа од Австрија. Ја цениме помошта во персонал и опрема, без неа потешко ќе се справувавме со проблемите, а идејата е да има пријатели кои ќе помогнат, но една работа треба да биде јасна, на македонска територија газди се македоснките власти и ние одлучуваме за тоа какви мерки ќе бидат преземени“, потенцираше Попоски.

Според австрискиот министер за надворешни работи, пак, Австрија е една од трите најпосакувани цели на мигрантите, покрај Германија и Шведска, и токму поради оваа таа презеле мерки како што се поставување на горни граници за оваа година и евентуално затворање на границите.

„Ние сме втора земја во однос на тоа колку изнесува бројот на примени мигранти по жител, односно 90 илјади, што сепак за една мала држава не е малку. Разговаравме за постапката на Австрија во однос на мигрантите, како прво моравме да утврдиме горни граници за 2016-та, а тоа ќе бидат 37.500 мигранти кои ќе можеме да ги примиме, а одредивме и дневни контингенти, односно број на мигранти по ден на кои ќе им се дозволи влез. За некој месец нашата максимална бројка веќе ќе биде постигната така што Австрија ќе мора ги стопира мигрантите на границата. Австрија е една од тројката најпосакувани целни земји за мигрантите, покрај Германија и Шведска, а Шведска веќе направи слични одлуки што значи од овие наши одлуки ќе има секако последици долж рутата којашто е засегната,а меѓу кои е и Македонија. Македонија мора да биде подготвена комплетно да го стопира влезот на мигрантите со оглед на што по Грција таа е првата држава којашто се соочува со мигрантите“, рече Курц, додаваќи дека е задоволен од соработката со македонските власти, нагласувајќи дека истото не било возможно со Грција.

Покрај бегалската криза, двајцата министри разговарале и за процесот на евроинтеграциите и политичката криза во земјата, како и за економската соработка меѓу двете страни.

„Австрија е вториот најголем инвеститор во Македонија и е значајна за нашиот економски развој, разговаравме за акцискиот план кои го имаме усогласено меѓу двете министерства околу идната соработка. Во делот на евроинтеграциите, Австрија е дел од групата „Пријатели на Македонија“, кои се трудат да се овозможи кредибилен процес на евроинтеграции за Македонија и отпочнување на процесот на преговори. Австрија е заинтересирана за стабилноста и просперитетот на регионот. Разговаравме околу спроведувањето на политичкиот дијалог и навременето исполнување на сите обврски, од кои клучната е спроведувањето на избори на 24-ти април, што ќе ни ги отвори вратите кон поголемото посветување на евроатланската агенда“, рече Попоски.

„Мора да се почитуваат сите политички договори кои што се направени, за да може да се обезбедат фер и слободни избори“, додаде пак Курц, нагласувајќи дека Австрија и натаму ќе продолжи во својата поддршка за Македонија во сите можни области каде што постои простор за соработка. /крај/мф/бс

Извор: Макфакс