Македонија
Македонија со чисто досие за политичките критериуми

Европската комисија оценила напредок во сите политички критериуми за членство во Унијата
Европската комисија оценила напредок во сите политички критериуми за членство во Унијата.
Единствено препорачува решавање на спорот со Грција во врска со името, имплементација на Законот за јавна администрација и зголемување на независноста на судството.
Европската комисија позитивно ја оценува работата на Парламентот. Во извештајот пишува дека тој изминатата недела работел врз принципот на дијалог, што е “клучен приоритет за пристапувањето“.
„За прв пат парламентот и неговите тела вистински го зеде предвид Извештајот за напредокот на Европската комисија. Националниот совет за ЕУ интеграција и Комисијата за европски прашања продолжија да работат со дослух на јавноста и да го зголемуваат учеството на граѓанскиот сектор“, пишува во Извештајот.
Но, Европската комисија забележува дека Комитетот за меѓуетнички односи играл ограничувачка улога што се однесува до воведувањето на етнички смени во училиштата во некои региони. ЕК оценува дека Комитетот главно се концентрирал на примената на Бадентеровото мнозинство при носењето на законите.
ЕК забележува напредок во организирањето на предвремените парламентарни избори во 2008 година, за разлика од она што се случуваше на изборите во 2006.
„Следејќи ги препораките од Врховниот суд да даде приоритет на случаите од овој тип, локалните судови одредиле 29 мерки на притвор. Околу 96 случаи чекаат да бидат разрешени“, пишува во Извештајот.
ЕК констатира и тоа дека седум полицајци вмешани во изборните неправилности биле отпуштени од работа.
„За претседателските и локалните избори од 22 март и 5 април, набљудувачките мисии на ОБСЕ и Советот на Европа заклучија дека се во согласност со препораките на ОБСЕ и меѓународните стандарди на демократските општества“, пишува во Извештајот.
Но, во Извештајот е нотирано дека на денот на изборите забележан е притисок врз гласачите, најчесто од службеници во јавната администрација.
Владината коалиција помеѓу ВМРО-ДПМНЕ и ДУИ е оценета како функционална. Реформите поврзани со ЕУ, како и визната либерализација се оценети како врвни приоритети на кои работела Владата.
„Децентрализацијата, како основен принцип на Охридскиот рамковен договор продолжува со трансфер на надлежностите на општините. Меѓутоа потребни се дополнителни напори, особено во делот на финансиските рамки на општините“, пишува во Извештајот.
За она на што еврокомесарот за проширување Оли Рен предупреди при последната посета во Скопје во август, јавната администрација и судството, во извештајот се оценети како области во кои е направен значителен напредок.
Се поздравува донесувањето на измените на Законот за државна администрација и работата на Агенцијата за државни службеници. Комесарите предупредуваат дека наредната година треба да се работи на имплементација на овој закон.
Во Извештајот за напредокот на Република Македонија наведена е забелешка за незаконски напредувања во кариерата кај 77 државни службеници, од кои 38 во Министерството за економија.
Во однос на судството се поздравува тоа што судии и јавни обвинители се избираат од редот на првата генерација дипломирани во Академијата за судии и јавни обвинители.
„Дополнителни напори се потребни за да се обезбеди независност и непристрасност на судството, особено преку спроведување на одредбите кои се однесуваат на именувањата и унапредувањата“, пишува во Извештајот.
Позитивна е оценката и во делот на борбата против корупцијата. Споменат е законот за финансирање на партиите во делот на зголемување на транспарентноста на финансирањето на политичките субјекти. ЕК бара гаранции за правилна примена на законот во иднина.
Интеграцијата на етничките заедници останува ограничена. ЕК бара ефикасно спроведување на Охридскиот рамковен договор и тоа со консензус.
„Мал е напредокот во врска со Ромите. Тие продолжуваат да се соочуваат со многу тешки услови за живеење и дискриминација, посебно во однос пристап до личните документи, образованието, социјалната заштита, здравството, вработувањето и соодветно домување“, пишува во Извештајот.
Односите со соседите се оценети позитивно, како и учеството на Македонија во регионалните иницијативи. Во врска со Грција, Комисијата наведува дека односите меѓу македонската и грчката влада завист од спорот со името. Наведен е примерот со именувањето на аеродромот во Скопје во „Александар Македонски“.
„ Треба да се одбегнуваат одредени дејства и изјави кои може негативно да влијаат врз добрососедските односи. Одржувањето на добрососедските односи, и продолжување на преговорите за заемно прифатливо решение за името под покровителство на ОН останува да бидат суштински“, препорачува ЕК.
Во односите со Бугарија, ЕК евидентирала неколку контроверзни прашања, кои се поврзани со правото на етничко самоопределување на индивидуите./крај/фо
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Силниот ветер ја влоши состојбата со пожарот во „Јасен“

Состојбата со пожарот во ловиштето „Јасен“ попладнево значително се влоши поради силниот ветер, информира директорот на Дирекцијата за заштита и спасување (ДЗС), Стојанче Ангелов.
„Јачината на ветрот постепено се зголемуваше и ни предизвика голема непријатност затоа што пожарот се движеше со исклучително голема брзина горејќи ги боровите стебла, создавајќи висока температура и многу густ и црн чад што удираше на гребенот. Нашата цел беше да го одбраниме гребенот и да не му дозволиме на овој пожар да прескокне преку гребенот од страната на селото Брезница, односно од скопска страна. Во тоа успеавме по неколку жестоки битки бидејќи огнот на неколку моменти префрли од другата страна, но благодарение на храброста на вработените во ‘Јасен’, лично овде е и директорот, еден од раководителите, со поддршка од екипа пожарникари од Македонски Брод, успеавме да го запреме по самиот гребен, ги изгаснавме местата на кои огнот префрли од другата страна и ја стабилизиравме ситуацијата“, рече Ангелов.
Пожарот сè уште се движи и создава густ чад што им предизвикува проблеми со дишењето на луѓето на теренот. На помош пристигнуваат пожарникари од Скопје, Велес и Куманово што ќе ги распоредат. Истовремено поддршка стигна и од вработените од Општината Сопиште кои цело време вршат дотур на вода, покрај другите активности. Тука се и припадници на Единицата за брзо распоредување (ЕБР) на МВР.
Македонија
Министерството за здравство формира независна меѓународна комисија по изјавата на Кедев за непотребни кардиолошки интервенции

Министерот за здравство, Азир Алиу, најави формирање комисија со експерти од три различни земји за проверка на работењето во приватните здравствени институции, но и продолжување на контролите во јавните здравствени установи кои се занимаваат со истата проблематика. Одлуката следи по изјавата на кардиохирургот, Сашко Кедев, дека во некои приватни болници се вршат непотребни интервенции со цел профит, вклучувајќи и стентирања и операции.
Алиу рече дека комисијата ќе биде независна и дека извештајот ќе служи како патоказ за понатамошни мерки. Од наредниот месец, приватните здравствени установи ќе мора да ги отворат базите со информации за кардиолошки интервенции, со цел Министерството да ги агрегира податоците и да има увид во здравствените патеки на граѓаните.
Министерот потврди дека има база со информации од 2019 до 2025 година за кардиолошки интервенции во јавните и приватните установи и дека ќе се сретне со д-р Кедев за понатамошна соработка. Фондот за здравствено осигурување, пак, ги следи сите прашања за квалитетот и законитоста на услугите, но оценката на медицинската оправданост останува надлежност на Државниот здравствен и санитарен инспекторат и специјалните комисии формирани од министерот.
Македонија
Никоски: Новата градинка во Потстаница, Драчево, значи подобра грижа за децата и поголема поддршка за семејствата

Како напредуваат градежните работи за новата градинка во Потстаница, Драчево, на лице место излезе да провери и директорот на Управата за заштита на животната средина и потпретседател на ВМРО-ДПМНЕ, Игор Никоски, заедно со премиерот Христијан Мицкоски, заменик-министерот за труд и социјала Ѓоко Велковски и градоначалникот на Општина Кисела Вода,Орце Ѓорѓиевски.
„Oвој објект e со вкупна површина од 300 квадратни метри и дополнително дворно уредување од 700 квадратни метри. Тој ќе обезбеди подобра грижа за децата и поголема поддршка за семејствата во овој дел од општината. Овој проект е доказ за нашата посветеност кон социјалниот развој и унапредување на квалитетот на животот во Кисела Вода“, рече директорот Никоски.
Градоначалникот на Кисела Вода, Орце Ѓорѓиевски, најави дека новата детска градинка ќе биде целосно завршена за само 20 дена и дека во неа ќе бидат згрижени 75 деца.