За стартот на "Саса" пристигнуваат добри вести, но не се многу оптимистички за ,"Злетово" и "Тораница"

За стартот на "Саса" пристигнуваат добри вести, но не се многу оптимистички за ,"Злетово" и "Тораница"

"Саса" ќе стартува во април или во мај, а од "Ксеминекс" најавуваат нов рок за "Злетово" – првиот квартал од идната година

ИВАН БОЈАЏИСКИ

ШТИП – Цените на обоените метали на светската берза секојдневно растат, но нашите рудници за олово и цинк сў уште не се активирани. Иако "Тораница", "Злетово" и "Саса" добија странски стратегиски инвеститори, состојбата со нив сў уште не е променета. Надежни информации пристигнуваат од Македонска Каменица, од рудникот "Саса" во чии окна 140 рудари ги вршат неопходните подготовки за рестарт, кој е планиран за напролет. Најава за скорешен рестарт на рудниците во Пробиштип и Крива Паланка доаѓа и од нивниот стратегиски инвеститор, американската компанија "Ксеминекс", но на бизнисмените што стојат зад истата компанија помалку им се верува отколку што е тоа случај со "Саса", која за нов сопственик ја има руската компанија "Ромтрејд".

На  "Ромтрејд" му се верува од две причини. Првата, оваа компанија пред околу една година го купи рудникот за бакар "Бучим" кај Радовиш и во него ги исполни сите ветувања. Втората е во фактото што во "Саса", во  меѓувреме престојуваа многу менаџери од светски познати производители на рударска и флотациска опрема, што говори дека во овој рудник сериозно се работи на неговата квалитетна обнова. Слабата доверба која ја има "Ксеминекс", пак, е резултат на честите најави за рестарт, последната беше за март годинава.Покрај ова, пробиштипјани тврдат дека во рудникот не се чувствува раздвиженост и дека само мал број лица се ангажирани таму, што не е доволно за брз рестарт на рудник од таков калибар. Истото важи и за рудникот "Тораница".

Од "Ксеминекс" вчера добивме информација дека ситуацијата во "Злетово" е значително подобрена."Менаџерскиот тим успешно се приближува до рестартувањето на рудникот и цврсто ветуваме дека овој рудник ќе биде пуштен во редовна работа во првиот квартал од идната година" – се вели во дописот кој ни го испратија од "Ксеминекс". Од оваа компанија тврдат дека рударите добиле голем дел од заостанатите плати, а биле исполнети и сите други правни обврски кои компанијата ги има спрема своите вработени.

За "Тораница" од американската компанија тврдат дека ги платиле сите пари, но сега таму има проблем со единственото отворено прашање хипотеката врз флотацијата. "Ксеминекс" доставил до Министерството за финансии неколку можни опции за решавање на тој проблем и сега се очекува повратен одговор, односно предлогот на решенијата од страна на ова министерство.

Во "Саса" може да се забележи дека работите на подготовка на рудникот забрзано се одвиваат. Рудникот го доби својот директор, Русинот Димитри Кударков. "Ромтрејд" платил аванс за набавка на комплетно нова флотација од најпознатиот светски производител како и комплетна опрема , исто така, од фирма од Шведска. Стручњаци ангажирани за подготовка на рудникот тврдат дека "Саса" ќе стартува со производство во април или во мај идната година, дека во неа ќе има работа за 920 рудари и дека вкупните инвестиции ќе бидат над 26 милиони долари.

Инаку, вкупниот капацитет на трите рудници е 1,7 милиони тони сурова руда. Тие заедно со рудникот за бакар "Бучим" можат да обезбедат стотина милиони долари девизен прилив годишно. И токму поради тоа нивното пуштање во производство мора да се забрза, а секое натамошно тактизирање ќе биде на штета и на државата и на рударите. Во трите рудници треба да се вработат околу 2.700 лица.