Кабинетот на претседателот на Собранието преку соопштение нагласува дека гласањето за интерпелацијата нема правно обврзувачки последици за разрешување и нема правно дејство. Ова се случува откако попладнево со 61 глас „за“ беше прифатена интерпелацијата за работата на претседателката на Комисијата за социјална политика, демографија и млади Илире Даути oд ДУИ.

„Собранието на Република Северна Македонија денеска одржа пленарна седница на која се разгледуваше интерпелацијата за работата на пратеничката Илире Даути, претседател на Комисијата за социјална политика, демографија и млади. Седницата се одржа во потполна согласност со Уставот на Република Северна Македонија, Деловникот на Собранието и постоечките закони. Изјавите на одредени медиуми кои велат дека резултатот од гласањето за интерпелација наложува разрешување на г-ѓа Даути се неточни. Нагласуваме дека гласањето за интерпелацијата е израз на пратениците и нема правно обврзувачки последици за разрешување и нема правно дејство. Именувањата и разрешувањата се уредуваат со други посебни процедури утврдени во Деловникот на Собранието, законите и Уставот“, се вели во соопштението.

Со 61 глас од ВМРО-ДПМНЕ, Левица и ЗНАМ, Собранието ја изгласа интерпелацијата за Илире Даути од ДУИ. Taa не го почитувала Собранискиот деловник со тоа што не го ставила Законот за правата на бранителите на комисиска расправа и ги лишила пратениците од дебата за него.

И пратеникот на коалицијата ВЛЕН, Халил Снопче на пленарната седница во Собранието изјави дека Илире Даути не е разрешена, па и понатаму останува претседател на Комисијата за социјални работи и демографија и млади.

„Госпоѓата Илире Даути не е разрешена од функцијата претседател на Комисијата. Значи, мораме да го расчистиме ова прашање бидејќи имаше дезинформации во медиумите на албански јазик, бидејќи Илире Даути ќе продолжи да ја врши истата позиција. Затоа, она што беше протечено во медиумите е невистинито. Исто така, коалицијата ВЛЕН гласаше против разрешувањето на Даути“, рече пратеникот Халил Снопче.

На денешната собраниска седница за интерпелации зеде збор пратеникот од ВМРО-ДПМНЕ, Љупчо Пренџов кој во однос на интерпелацијата за Изет Меџити, предложена од ДУИ, истакна дека пратеничката група на ВМРО-ДПМНЕ и коалицијата нема да ја поддржи затоа што предлагачите немаат јасна визија, конкретни причини односно немаат јасен став и дека станува збор за бесмислени дискусии со намера ДУИ да направи дефокус којшто не оди во прилог на никого.

„Почитувани колеги од ДУИ ве гледам, тешко зборувате дел од вас нешто пелтечат, немате јасна визија, јасен став, немате јасни причини. Сметам дека дефокусот од она кое се случува во општеството во слика на некој лажен патриотизам, не оди во прилог на никого. Сметам дека обидот за било какво влошување на меѓуетничките односи не е добро и тоа нема да ви го врати изгубениот рејтинг. Тоа нема да ви ја врати изгубената доверба кај гласачите, туку тоа носи последици“, вели Пренџов.

Пратеникот Пренџов наведе дека ДУИ треба да го подржат транспарентното работење на Владата и мерките кои се во интерес на сите граѓани во Република Македонија, затоа што тие се суштински за подобро функционирање на државата.

„Она коешто треба да го подржите, се мерки на Владата коишто се од интерес на сите. Еден збор не кажавте дека покачувањето на 5000 денари на пензионерите е за сите, еден збор не кажавте дека новиот автопат од Тетово до Гостивар ќе го возиме сите, ќе го возиме сите конечно автопатот од Кичево до Охрид. И таа ваша малодушност којашто гласачите ја гледаат, во октомври на локални избори ќе ви ја соопштат многу по јасно, бидејќи, очигледно, не го разбирате пулсот на обичниот човек“, рече Пренџов.

Исто така, пратеникот додаде дека пратеничката група нема да ги поддржи интерпелациите и дека време е ДУИ да се реформираат како нормална партија во опозицијата и да се приклучат на промените.

„На Република Македонија и треба стабилност и треба подобар стандард, просперитет, подобро здравство и подобро образование. Приклучете се на промените како опозиција, реформирајте се како нормална партија во опозиција. Овие интерпелации не ги поддржуваме, пратеничката група на ВМРО-ДПМНЕ и коалицијата нема да ги поддржи. Поддржуваме политики за развој на сите, за просперитет на сите и за едно подобро утре на цела Република Македонија”, кажа тој.

Денес на терен инспекторите на градот Скопје со асистенција на интервентна полиција, констатираа нови кривични дела на градоначалникот на Шуто Оризари, Курто Дудуш, при креирањето нова дива депонија за што е поднесена нова кривична пријава, со која дополнително се бара одговорност за загадувањето со канцерогени материи, соопшти вечерва Град Скопје, додавајќи дека Дудуш директно го загрозува здравјето на граѓаните.

Од Градот велат дека на овие кривични пријави им претходи  пријава за дива депонија на територија на општина Шуто Оризари, која Курто Дудуш ја прави на лично свое приватно земјиште за што сам со себе во име на општината си склучил договор, а за што е фатен и за истото е изречена глоба и веќе е покрената пријава за соодветна одговорност.

„Јавноста треба да знае дека Комунална Хигиена Скопје редовно ги завршува своите активности во општина Шуто Оризари, а за она што е надлежност на градоначалникот Курто Дудуш, и контејнерите кои сам ги поставува на територијата на општината друг не може да биде одговорен. До овој момент против градоначалникот на општина Шуто Оризари Курто Дудуш поднесени се повеќе од 40 кривични пријави од кои најголем дел се однесуваат на сериозна злоупотреба на буџетски средства, исплати на пари без соодветни постапки и распишан тендер, креирање на диви депонии, загрозување на животната средина и здравјето на граѓаните“, се вели во соопштението на Град Скопје.

Понатаму се додава: Хаосот на Дудуш во Шуто Оризари настанат поради неговата неспособност и лукративни интереси, ќе го средиме за да се спречи загрозувањето на здравјето на жителите од општината, а ќе одиме до крај за целосно расчистување на случајот за Дудуш, криминогениот трујач на Скопјани да ја добие заслужената казна за делата за кои е утврдено одговорен.

Градоначалникот на Шуто Оризари, Курто Дудуш, претходно денес ги повика жителите на средба в недела, во 19 часот, во спортската сала во Шуто Оризари за да дискутираат за депонијата во Шуто Оризари, непредвидливиот и недоволен јавен градски превоз, но и за честите прекини на електричната енергија.

„Депонијата во Шуто Оризари веќе долго време е проблем, но сега ситуацијата ескалира до алармантно ниво. Ѓубрето, неподносливиот мирис и загадувањето ја загрозуваат животната средина и здравјето на жителите. Многумина мислевме дека ова ќе биде нашиот најголем приоритет, но додека се справуваме со тоа, се појавија и други, исто толку сериозни проблеми“, наведува Дудуш.

Меѓу проблемите тој го споменува и јавниот превоз за кој вели дека сега е непредвидлив и недоволен.