Комунистичките партии во Европа се мобилизираа против нацрт резолуцијата со која се сака да се осудат злосторствата на комунистичките режими, за која денеска ќе расправа Парламентарното собрание на Советот на Европа.

Комунистичките партии во Европа се мобилизираа против нацрт резолуцијата со која се сака да се осудат злосторствата на комунистичките режими, за која денеска ќе расправа Парламентарното собрание на Советот на Европа.

Авторот на нацрт резолуцијата, шведскиот пратеник во СЕ Јоран Линдблад (Европска народна партија, десница), ги повика земјите на просторите на поранешниот комунистички блок да ја сензибилизираат својата јавност за „злосторствата сторени во име на комунистичката идеологија", а сите комунистички и посткомунистички партии, кои тоа не го сториле, на "недвосмислена" осуда на комунистичките злосторства.

На состанок одржан викендов во Брисел, претставниците на 15 комунистички и работнички партии, од кои 13 се Европски, го осудиле "тој насилен напад против историјата, сегашноста и иднината на комунизмот“, пренесуваат белгиските медиуми.

Според мислењето на овие партии, резолуцијата Линдблад ги минимизира "злосторствата на нацизмот", а ги оправдува "империјалистичките напади против социјалистичките земји и би можела да доведе до забрана на комунистичките партии".

Грчката ККЕ оцени во средината на декември, дека резолуцијата Линдблад е "објавување на војна и прогон на комунистичките партии", а постепено се мобилизираа и другите комунисти.

Француските комунисти, како Франсис Вуртз, му забележуваат на Советот на Европа што расправата за комунистичките злосторства ја закажала за денеска, кога е закажан извештајот за будење на нацистичката идеологија во Европа, на што гледаат како на "официјално изедначување на комунизмот и нацизмот".

Советот на Европа излезе во пресрет, па авторот на извештајот за нацизмот, Русинот Михаил Маргелов, излагањето ќе го одложи, бидејќи денеска мора да помогне во одржувањето на палестинските избори.

За германските комунисти текстот на Линдблад е "неомакартистички" обид за "банализирање на нацистичкиот геноцид, кој се исмејува на бројните комунистичките борци против фашизмот, како и на жртвите на фашизмот“.

Сличен е и ставот на унгарската Работничка партија, која смета дека текстот „длабоко го навредува сеќавањето на генерациите кои се бореле против фашистичките режими".

Европските комунисти се поделени во осудата, па така Грците не признаваат дека комунистите воопшто грешеле, додека другите злосторствата ги сметаат за грешни отстапувања сторени во име на комунистичкиот идеал.

Чешкиот КСЦМ, на пример, говори за грешките од периодот на првите социјалистички искуства и бара резолуцијата да вклучи и „критика на грубоста на капиталистичките режими и нивното газење на човековите права".

Во Словенија, Полска, Литванија или Естонија, комунистичките партии не го преживеаја пропаѓањето на Советскиот блок, па таму резолуцијата Линдблад не предизвика никакви реакции, додека во другите држави во Европа, комунистите имаат свое гласачко тело од 1 отсто во Австрија до 18 отсто во Чешка.

/крај/хн/ил/б