Еден генерал, двајца полковника два мајора, еден поручник и 33 војници дезертирале од сириската војска и се префрлиле во Турција во понеделникот, јавува Reuters повикувајќи се на турскaта државна телевизија, но не се наведува кога се случило пребегнувањето.

Информацијата за дезертирање на сириските офицери и војници ја пренесе и турската телевизија CNNTurk, според која војниците се префрлиле во Турција заедно со нивните семејства. Севкупно, според на каналот, сириско-турската граница ја минале 224 лица.

Турција заедно со западните и арапските земји им дава поддршка на сириските опозициски сили во 15-месечните напори да го собори од власта претседателот Башар ал-Асад. На турска територија прибежиште под закрила на официјална Анкара најдоа бунтовниците од редовите на Сириската слободна војска и е обезбедено и сместување на илјадниците сириски бегалци.

Односите меѓу Сирија, каде што повеќе од една година не запираат големите анти-владини демонстрации и судири меѓу војската и вооружената опозиција, и Турција, каде што закрила добива сириска опозиција, се интензивираа особено од минатиот петок, кога сириската противвоздушна одбрана собори турски извидувачки авион.

Турскиот воен извидувачки авион од типот „ RF-4E“ кој полета во петокот од воената воздухопловна база Ерхач во југоисточната покраина Малатија во близина на сириската граница, исчезна од радарите половина час по полетувањето во воздушниот простор на Средоземното Море југоисточно од границата со Сирија, во турската провинција Хатај.

Сирија соопшти дека нејзината противвоздушна одбрана соборила турски авион над нејзините територијални води по неговото навлегување во нејзиниот воздушен простор. Министерот за надворешни работи на Сирија, рече дека не станува збор за непријателски или чин на агресија против Турција, туку тоа била реакција за заштита на суверенитетот на земјата, и го нарече инцидентот „несреќа“.

Меѓутоа, во неделата турскиот министер за надворешни работи, Ахмет Давутоглу тврдеше дека авионот бил соборен во меѓународниот воздушен простор, а делови од него паднале во територијалните води на Сирија. Турскиот министер за надворешни работи исто така, рече дека Анкара ќе ги преземат неопходните чекори предвидени со меѓународното право, против Сирија во врска со инцидентот. Особено, Турција побара свикување на Советот на НАТО во вторник, на кој ќе се разговара за ситуацијата.

Турција којашто тесно соработуваше со Сирија пред бунтот против сирискиот претседател Башар ал-Асад, се сврти против него откако го обвини дека насилно реагира на опозициските протести коишто беа поттикнати со превратите во другите арапски земји минатата година во ткн Арапска пролет. Сега Турција им дава политичка поддршка и засолниште на сириските опозициски групи, отвори кампови за илјадниците бегалци на границата со Сирија, а лани весникот Hurriyet пишуваше дури дека турските и француските специјалци ги обучувале припадниците на вооружената опозиција и воените дезертери за справување со сириските безбедносни сили./крај/мф/сн