Претседателот на Социјалдемократскиот сојуз на Македонија, д-р Венко Филипче, на денешната прес-конфренција за економските политики на Владата, предупреди дека граѓаните сè повеќе тонат во сиромаштија, додека власта свесно одбива да интервенира со мерки за справување со инфлацијата и растот на цените.

„Она што станува сè појасно е дека оваа власт свесно ја разгорува инфлацијата, бидејќи им го полни буџетот и им ги зголемува профитите на блиските фирми. Граѓаните плаќаат, олигарсите заработуваат. Македонија се претвора во земја на сиромаштија и неизвесност. Што друго може да го објасни фактот дека власта ништо не презема за инфлацијата и растот на цените“, изјави Филипче.

Тој посочи дека додека соседните држави, вклучително и Србија, редовно носат мерки за контрола на цените и заштита на стандардот, македонската Влада останува целосно пасивна.

„Сите земји во околината, вклучително и Србија, имаат редовни и навремени мерки за цените и инфлацијата. Кај нас тоа веќе не е тема – власта нема намера да регулира буквално ништо за да ги заштити граѓаните“, рече Филипче.

Во однос на изјавата на премиерот Мицкоски дека платите „не смееле да растат затоа што имало инфлација“, Филипче изјави дека тоа е економска неукост.

„Продуктивноста расте само ако платите растат – тоа е елементарна економска логика. Или, ако сака премиерот со конкретни бројки – нашата продуктивност е 55% од европскиот просек, а платите само 35%. Значи проблемот не е во работниците – проблемот е во владата што ги држи платите ниски за да им одговара на бизнис-елитите“, рече Филипче.

При тоа, тој посочи дека цените во Македонија достигнуваат 60% од европскиот просек, додека платите остануваат далеку под нивото – само 35% од европскиот просек.

„Сите економски експерти на власта постојано повторуваат дека кај нас се живеело добро ако биле ниски платите, а куповната моќ била висока. Но фактите повторно зборуваат друго. Македонската просечна плата е само 35% од просечната плата во ЕУ, а цените достигнуваат 60% од европскиот просек на цени. Поразително е тоа што го покажуваат последните податоци на Евростат“, нагласи претседателот на СДСМ, Венко Филипче.

„Само неколку дена по кандидатурата на Амар Мециновиќ за градоначалник на Скопје, ВМРО-ДПМНЕ сфати дека освојувањето на главниот град нема да биде така лесно. Наместо со идеи и програма, побрзаа со обвинувања дека Левица наводно влегла во политички договор со СДСМ и ДУИ за да се обезбеди втор круг“, велат од партијата Левица.

„Ваквите конструкции се ништо друго освен израз на паника и признавање на сопствената слабост. Левица пред избори ниту се договара, ниту коалицира со било која партија, тоа е јасна и недвосмислена позиција. Но, очигледно е дека ВМРО-ДПМНЕ стои на стаклени нозе и бара начин да се оправда пред сопствените гласачи, особено што деновиве излегоа и податоци дека имаат губитоко од околу 150.000 гласа.

Патетично претставуваниот „лав“ излезе дека е само мало маче, немоќно да се соочи со вистински политички предизвик. А на избори, токму Амар ќе им покаже колку е тенка нивната лага и колку лесно нивниот „лав“ се претвора во маче пред граѓаните на Скопје. Амар ќе биде обединувачката сила која ќе ги сплоти сите чесни и слободоумни луѓе на кои им е преку глава од 30-годишните деструктивни и ограбувачки политики на ДПМНЕ, СДС, ДУИ и ВРЕДИ“, се наведува во соопштението на партијата Левица.

Министерството за здравство информира дека сите граѓани имаат можност да пријават сознанија за евентуални неправилности во врска со вршењето кардиолошки и кардиоваскуларни интервенции преку алатката „Пријавете неправилност“, достапна на веб-страницата на Министерството за здравство.

„Транспарентноста во секој процес е наш приоритет, така што кон секоја пријава на каква било неправилност во здравствениот систем пристапуваме со максимална одговорност и постапуваме во согласност со законските процедури. Токму затоа потсетувам дека преку оваа алатка на веб-страницата на Министерството граѓаните може да пријават и сознанија за евентуални неправилности во врска со кардиолошките интервенции. Министерството за здравство останува посветено на унапредување на здравствениот систем, а наш приоритет се здравјето и безбедноста на пациентите“, истакна министерот за здравство, Азир Алиу.

Пријавувањето е доверливо и по секоја пријава се постапува во согласност со законските процедури.

Потсетуваме дека веќе почна со работа интерната комисија задолжена за изготвување прелиминарна анализа на кардиолошките и кардиоваскуларните интервенции во здравствените установи во државата. Наодите од анализата на интерната комисија ќе бидат најбргу што доставени до стручната комисија составена од странски експерти.

Истовремено, Министерството за здравство испрати допис до јавните здравствени установи да достават податоци за вкупниот број извршени процедури и операции за периодот јануари 2022 – август 2025 година за извршени интервентни кардиолошки процедури, како што се коронарографии и стентирања, васкуларни ангиографии и кардиохируршки/васкуларни операции.