Знам дека не е лесно. Знам дека животот и денес е тежок за многумина. Последиците од погубното владеење на СДСМ и ДУИ сè уште се чувствуваат, и во семејните буџети, и на шалтерите, и во болничките чекални, и во училиштата. Знам дека инфлацијата што кулминираше во нивното време, под влијание и на надворешни кризи, но и поради нивната неспособност, остави длабоки траги. Системот беше осакатен и тоа не се поправа преку ноќ, рече премиерот, Христијан Мицкоски на денешната трибина во Струмица насловена „Една година ги градиме темелите на македонското земјоделство и храна“.

„Ние не се правиме недопирливи. Ние сме дел од овој народ, ги живееме истите предизвици. Затоа и ја знаеме тежината на задачата што ја преземавме. Но уште повеќе, ја знаеме одговорноста. Има многу што треба уште да се направи. И потребно е време тие промени да се почувствуваат во секое семејство, во секој живот. Но едно можеме да ви го ветиме, нема откажување. Нема враќање назад. Македонија нема алтернатива освен да одиме напред. И ние ќе продолжиме со уште повеќе сила, со уште поголема посветеност“, рече тој.

Мицкоски кажа дека во изминативе нешто повеќе од 365 дена работеле на темелите, на системски промени, на враќање на довербата на институциите.

„Работевме да ја стабилизираме државата, да ги консолидираме состојбите, да го вратиме правецот. И токму затоа, денес не зборуваме за спектакли, туку за промени. Промени што се случуваат секој ден, во секоја општина, во секоја болница, во секој административен шалтер, во секоја училница. Почнавме да градиме држава по мерка на граѓанинот. Држава која што ќе те слушне. Држава што ќе те почитува и она што е најважно, држава што ќе ти служи“, рече Мицкоски.

Според него, премногу долго Струмица и сите негови околни места беа заробени од една фамилија која се однесувала како Струмица да е нивен личен имот, а не град на горди Струмичани.

Градот Крушево е симбол на непокорот, симбол на визијата и напредокот, симбол на единството истакна денеска на граѓанската трибина „Мугра на слободата“, Томе Христоски, актуелен градоначалник и кандидат за градоначалник на Крушево од Социјалдемократскиот сојуз.

„Со особена чест и голема одговорност денеска ви се обраќам од името на граѓаните на Крушево – градот на храброста, историјата и надежта. Градот симбол на слободата и непокорот. Денес сме тука, не само да зборуваме за политиката, туку да зборуваме за прогресот, визија и иднината што сите заедно ја градиме под знамето на Социјалдемократскиот сојуз на Македонија. СДСМ отсекогаш бил гласот на народот, заедништвото, двигател на реформи и симбол на напредокот. Денес не сме тука заедно без разлика на верска или било каква друга поделеност, само за да одбележиме уште еден момент во политичкиот календар, туку сме тука за да потврдиме дека веруваме во иднина – иднина на развој, правда, еднаквост, слобода и просперитет. Иднина која ја градиме заедно, со дело и посветеност, чекор по чекор, за секоја улица, за секое населено место, за својот град, за својата општина. Тука сме да го потврдиме нашето заедничко уверување – дека Македонија може повеќе, а Крушево уште повеќе. Дека со планско работење, труд и единство – и највисоките цели се достижни“, истакна Христоски.

Градоначалникот нагласи дека Крушево отсекогаш било симбол на борба и достоинство.

„Токму тоа ни дава сила да продолжиме со конкретни чекори кои го подобруваат животот на секој наш сограѓанин. Во времиња на неизвесност, ние нудевме стабилност. Во времиња на неправда, ние се боревме за правда. Во времиња на поделби, ние градевме мостови на соработка и хармонија по примерот на Крушевскиот Манифест, со една цел, за едно поинакво, поубаво и заедничко Крушево во кое сите придонесуваме“, вели Христоски.

Градоначалникот наброја и дел од најважните проекти реализирани од локалната самоуправа.

„Иако имаше забелешки и критики дека фокусот бил повеќе насочен кон населените места, одредени населени места или во некои делови од општината повеќе или помалку се реализирале проекти, верувајте цел изминат период бевме насочени да рамномерно се гради како во градот така и во секое населено место. За мене зборот важи, ако до сега се поврзуваа населените места со патна инфраструктура и се она што беше најнеопходно за живот, Затоа сега јавно и одговорно ветуваме дека следниот период приоритет ќе биде решавање на сите актуелни проблеми на нашите сограѓани во градот, но и во населените места, со конкретни мерки и видливи резултати. Нашата работа продолжува, но овојпат со поголема рамнотежа и интензитет и во градот“, рече Христоски.

Ние во текот на оваа година можеби успеавме да поставиме добри темели на кои понатаму ќе ги работиме идните реформи. Оваа една година можам да кажам дека вреди многу повеќе од седумте години измината власт на СДСМ и ДУИ, истакна пратеничката од ВМРО-ДПМНЕ Ели Панова на денешната трибина во Струмица насловена „Една година ги градиме темелите на македонското земјоделство и храна“.

„За оваа една година ние сфативме со каков буџет располагаме, односно наследивме во исто време во првите 100 дена се снаоѓавме со долговите кои ни беа оставени, морам да напоменам дека исплаќавме задоцнети плати во делот на АД „Водостопанство“ и задоцнети плати во Македонски шуми, пари кои воопшто не беа предвидени во буџетот на изминатата 2024 година но, ете Владата и ние заеднички најдовме средства и тие пари беа изнајдени од средства кои не биле правилно испланирани“, кажа Панова.

Панова истакна дека ребалансот на буџетот кои повторно е во Собрание претставува една нужна алка во работењето на целиот македонски систем.

„Со ребалансот на буџетот кој повторно е во Собрание како една нужна алка во работењето на целиот македонски систем беа и неисплатените субвенции, тие мораа да бидат повторно обезбедени од некаде за да може да се подмириме тоа што сме должни и за да бидеме на позитивна нула и да знаеме дека во иднина нашите земјоделци субвенциите ќе ги добиваат редовно и не како што било досега, туку навремено, однапред платено онака како што заслужуваат“, вели Панова.

Панова потенцираше дека Собранието во изминатата година донело повеќе од 297 закони што е повеќе од половина за време на владата на СДСМ и ДУИ.

„Она кое би сакала да го потенцирам е исто така моментот што во изминатата една година Собранието успеа да донесе повеќе од 297 закони што значи за повеќе од половина од целиот изминат мандат на владата на СДСМ и ДУИ. Можеби оваа бројка е огромна и еден дел од истата се однесува на одредени усогласувања но, добар дел се однесува и на закони кои се наменети токму на земјоделието и она кое значи исправање на грешките со кои се соочува македонските земјоделци во изминатите периоди“, заклучи Панова.