Јавните набавки се најризичната област во која функционерите и државните службеници можат да бидат пристрасни и да им дадат предност на приватните интереси пред општествените.

Антикорупциска рампа за функционерите и службениците

КАТИЦА ЧАНГОВА

Јавните набавки се најризичната област во која функционерите и државните службеници можат да бидат пристрасни и да им дадат предност на приватните интереси пред општествените. Изминативе петнаесетина години во донесувањето одлуки имаше премногу мислење на личните, роднински, пријателски и партиски врски, а се забораваше заштитата на јавниот интерес. Многу битна антикорупциска рампа за независна и објективна процена ќе биде законот за спречување на судирот на интереси, беше потенцирано на вчерашната промоција на работниот текст што ја организираше "Транспарентност-Македонија". Притоа беше нагласено дека за секоја функција, хиерархиски, почнувајќи од шефот на државата, премиерот, министрите… мора да се дефинира приватниот интерес кој е неспојлив со јавниот интерес, оти во спротивно, нема да се постигне ништо.

Озаконетиот етички кодекс за однесување на службениците, избраните и именуваните функционери во сите државни и јавни тела, одговорните во јавните претпријатија со државен капитал, ќе ги прошири обврските и забраните за овие категории лица. "Претпоставка за успешно спречување на корупцијата е спречувањето на постоење судир на интереси кај носителите на јавни овластувања. Мора да бидеме искрени и да признаеме дека од оваа современа болест изразена преку судир на интереси, непотизам и протекции, страда и нашето општество. Таа болест ја подјадува довербата во институциите, довербата во правната држава. Оттаму е и поголема обврската на сите сегменти на власта – извршната, законодавната и судската – со целосна посветеност и заемна координација да се борат против ова зло", беше пораката на премиерот Владо Бучковски за кого најуспешен начин за спречување на судирот на интереси е донесувањето на посебен закон за регулирање на оваа материја.

Соодветното третирање и решавање на судирот на интереси значи ефикасна борба против корупцијата, но и зајакнување на одговорноста на лицата што вршат јавни функции, смета министерот за правда, Мери Младеновска-Ѓорѓиевска. Таа оцени дека со квалитетна законска регулатива ќе се овозможи успешна борба на институциите на системот во спречувањето на општествено негативните појави. Претседателот на "Транспарентност", Зоран Јачев истакна дека главна порака на законот е да се спречат луѓето кои се на функција да мислат само на себе и на своите и да почнат да мислат за сите. "Македонија е меѓу последните земји во регионот што немаат закони за спречување судир на интереси и за слободен пристап до информации од јавен карактер. Тоа може биде лошо бидејќи сме последни, но може да биде и добро ако успееме да ги извлечеме поуките од грешките што другите земји ги направиле во изготвувањето на овие законски текстови за да направиме подобри", нагласи Јачев.

Промоцијата беше можност премиерот Бучковски и министерот Младеновска-Ѓорѓиевска да ги стават своите потписи на декларацијата – Нулта толеранција за корупцијата, иницирана од "Транспарентност".