Македонија
Груевски: Нема место за скепса за ,,Проектот 45,,

„Никогаш не е доцна да се започне и заврши факултет и да се собере знаење. Ако некој има 35 години кога ќе заврши ќе има 39, тоа не е човек кој е стар. Ако некој запише факултет на 45 години, додека заврши ќе има 49 години.
„Никогаш не е доцна да се започне и заврши факултет и да се собере знаење. Ако некој има 35 години кога ќе заврши ќе има 39, тоа не е човек кој е стар. Ако некој запише факултет на 45 години, додека заврши ќе има 49 години. Зошто тие 20 години до пензија не ги искористи за нешто што може да му донесе подобра плата или бизнис, поголеми можности“ – порача премиерот Никола Груевски, на денешната средба со новинарите.
Груевски смета дека нема место за скепса, за ,,Проектот 45“ на Министерството за образование со кој им се овозможува на граѓаните постари од 45 години за мажи, односно 35 за жени да стекнат високо образование. Според него има голем број луѓе кои поради транзицијата не успеале да се запишат или да завршат високо образование.
„Во почетокот на 90-тите имаше едно искривување на вредностите. Транзицијата си го направи своето и многу луѓе почнаа да веруваат дека знаењето не е вистинската вредност и дека тоа нема многу да им помогне во животот, затоа што гледаа примери наоколу, како преку ноќ се раѓаат транзициски богаташи, со разни направени зделки со властите во тоа време, преку разни трикови, заобиколување на законот и голем број граѓани. Почнаа да веруваат дека треба да се фокусираат на друго, а не на знаењето,, рече Груевски
Со овој проект Владата сака да постигне зголемување на бројот на високо образувано население, што е современ европски образовен тренд, а според Груевски, до работа секогаш полесно се доаѓа со високо отколку со средно образование.Проектот ќе се реализира на Природно-математичкиот факултет, Шумарскиот, Правниот, Градежниот, како и на факултетите за Стоматологија и Машинскиот факултет.
Бројот на предвидени слободни места на јавните универзитети во Македонија е 1570, односно на Универзитетот Св. Кирил и Методиј во Скопје 795 места, на Св.Климент Охридски во Битола 130 возрасни лица, на Универзитетот во Тетово 525, како и 120 места на Универзитетот Гоце Делчев во Штип.
Уписите ќе бидат организирани на 7 и 8 септември и ќе се вреднува успехот од средното образование. Сите студии ќе бидат вонредни во согласност со веќе акредитираните студентски програми и според постојниот ЕКТС систем, а школарината предвидена со кофинансирање изнесува 200 евра за студиска година..крај/к.с.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гори кај Прилеп, Македонски Брод, Чашка и Велес – најнов пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.
Македонија
(Видео) Според СДСМ, надворешната политика доживува дебакл

Андреј Жерновски од СДСМ, на денешната прес-конференција ја оцени надворешната политика на Владата предводена од ВМРО-ДПМНЕ како дебакл без ниту еден успех.
Жерновски изјави дека, по една година владеење, Македонија се соочува со „сериозно влошена меѓународна позиција“, без напредок на европскиот пат, без нови инвестиции и со зголемена царина од страна на САД. Според него, министерот за надворешни работи Тимчо Муцунски не остварил ниту еден договор или резултат на дипломатски план.
СДСМ ја критикува и состојбата со дипломатската мрежа, која, како што рече Жерновски, е „разурната, партизирана и нефункционална“, а Македонија се наоѓа „на периферијата на демократскиот свет“.
Како посебно загрижувачка точка беше истакната и заканата, како што наведуваат од СДСМ, за можно бришење на македонскиот јазик од Извештајот на Европскиот парламент, што партијата го поврзува со актуелната надворешна политика на МНР.
Жерновски рече дека за време на владеењето на СДСМ бил обезбеден македонскиот јазик во официјални документи на ЕУ, вклучително и договорот со ФРОНТЕКС, без фусноти и дополнителни објаснувања.
„Тој успех денес е доведен во прашање поради вазалската политика на Муцунски и неговиот шеф Мицкоски“, рече Жерновски.
На крајот, порача дека СДСМ ќе продолжи да се бори за враќање на Македонија на патот на меѓународни успеси, европска иднина и заштитен идентитет и јазик.
Македонија
(Видео) Со див приклучок на водоводната мрежа полевал илјадници метри земјиште – Град Скопје поднесе кривична

Град Скопје информира дека денеска е откриен нов див приклучок на мрежата за питка вода на подрачјето на општина Сарај, при што сторителот незаконски се приклучил за да наводнува неколку илјади метри квадратни пластеници. За случајот е изготвена и поднесена кривична пријава.
Ваквите појави сериозно го нарушуваат водоснабдувањето во градот, особено во урбаните и руралните средини кои секојдневно се соочуваат со намален притисок и недостиг на вода. Покрај директната штета врз системот, сторителот избегнувал и плаќање за потрошена вода во висина од илјадници евра, нанесувајќи штета на Јавното претпријатие „Водовод и канализација – Скопје“, соопшти Град Скопје.
Согласно системот за мониторинг и мерење на дневната потрошувачка, во јуни е забележана енормна потрошувачка на вода, која на одредени денови достигнала рекордни 356.000 м³. Тоа претставува околу 700 литри вода дневно по жител. Високата потрошувачка најчесто се должи на нерационално користење на вода – за наводнување, перење возила и полнење базени – дел од тоа и преку нелегални приклучоци.
Град Скопје апелира до надлежните институции, вклучително и МВР и Јавното обвинителство, активно да се вклучат во процесот на справување со дивите приклучоци и заштита на системот за водоснабдување. Се додава и дека неказнивоста води кон безредие, а граѓаните заслужуваат безбеден, редовен и правичен пристап до вода.