Свет
Обама: „Бритиш петролеум“ ќе ја плати сметката
Американскиот претседател Барак Обама изјави дека неговата администрација нема да штеди средства за да ја спречи кризата вo Луизијана, откако минатонеделната експлозија на нафтената платформа на компанијата „Бритиш петролеум“ предизвика големо истекување на нафта.
Американскиот претседател Барак Обама изјави дека неговата администрација нема да штеди средства за да ја спречи кризата во Луизијана, откако минатонеделната експлозија на нафтената платформа на компанијата „Бритиш петролеум“ предизвика големо истекување на нафта .
„БП“ е одговорен за ова истекување. „БП“ ќе ја плати сметката“, рече Обама по посетата на Луизијана, додавајќи дека нема да штеди средства и дека ќе направи се за да не се зголеми штетата.
По експлозијата на нафтената платформа „БП“ во Мексичкиот залив на 20 април во која животот го загубија 11 работници, дојде до големо истекување на нафта, кое се уште не е запрено и кое создаде нафтена дамка со површина од 10 илјади квадратни километри.
„Владата ќе направи се што е потребно за да се спречи кризата. Ќе направиме се да ги заштитиме нашите природни богатства, да се обештетат оние на кои им е направена штета, да се обнови оштетеното и ќе му помогнеме на овој регион да истрае како и неколку пати претходно“, истакна Обама.
Тој додаде дека на подводниот нафтовод со должина од скоро два километри се откриени три места од каде што истекува нафта и дека до сега нафтената дамка е на скоро 15 километри од брегот на Луизијана.
„Нема да бидеме задоволни додека истекувањето на нафтата не биде запрено и исчистено и додека луѓето не се вратат во своите домови“, додава американскиот претседател./крај/бл/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Турист во Италија уништил фрески стари речиси 2000 години
Холандски турист уништил ѕид со фрески во античка римска куќа во Херкуланеум, во близина на Неапол, оштетувајќи ја зградата што ја преживеала вулканската ерупција на Везув во 79 година од нашата ера, соопшти денеска италијанската полиција.
Во соопштението на полицијата се вели дека 27-годишниот турист бил брзо идентификуван откако вработените во археолошкиот локалитет откриле графити исцртани со црн, неизбришлив фломастер на бел дел од насликан ѕид.
Полицијата соопшти дека тоа е потпис на маж кој сега се соочува со обвинение за оштетување на уметничкото дело.
Помалиот град од неговиот попознат сосед Помпеја, Херкуланеум бил покриен со подлабок слој пепел, кој ги заштитил неговите урнатини од крадци и оставил особено добро сочувани остатоци.
Како одговор на зголемениот вандализам, Италија оваа година воведе построги казни за оние кои ги оштетуваат спомениците и културните места, одредувајќи казни до 40.000 евра.
Свет
Кристоферсен: НАТО има две до три години да се подготви за одбрана од Русија
Началникот на Генералштабот на норвешката армија, генерал Еирик Кристоферсен денеска изјави дека НАТО има две до три години да се подготви за одбрана пред Русија повторно да биде во можност да изврши конвенционален напад.
„Во еден момент некој рече дека ќе ни требаат 10 години, но мислам дека се работи за помалку од 10 години поради индустриската база што сега постои во Русија“, рече генералот Кристоферсен, пренесе Блумберг.
Тој посочи дека ќе биде потребно „некое време“ за спроведување на овој план, кој им дава простор на сојузниците на НАТО да ги обноват своите сили и резерви во следните две до три години, истовремено поддржувајќи ја Украина.
„Норвешка, членка на НАТО од 1949 година, не забележа значителна промена во однесувањето на Русија на својата граница во последната година, вклучувајќи ги нуклеарните сили и нејзината северна флота, но руските копнени сили на полуостровот Кола беа десеткувани по големите загуби во Украина“, рече тој.
Норвешкиот парламент допрва треба да одобри план со кој речиси ќе се удвои распределбата за одбранбениот систем во следните 12 години со цел да се прилагоди на заканите, со фокус на поморската и воздушната одбрана, пренесува Танјуг.
Свет
Уапсени 18 лица во Полска: планирале непријателски активности во име на Русија, вклучувајќи и убиство на Зеленски
Полските власти уапсија 18 лица под сомнение дека планирале непријателски активности и саботажи во име на Русија и Белорусија, вклучувајќи го и убиството на украинскиот претседател Володимир Зеленски, соопшти денеска министерот за внатрешни работи Томаш Сјемоњак.
Полските власти поврзаа некои неодамнешни подметнати пожари или обиди за подметнување пожари со агенти спонзорирани од Русија. Меѓу уапсените во последните месеци има државјани на Полска, Белорусија и Украина, се наведува во соопштението на Агенцијата за внатрешна безбедност.
Семењак рече дека актите на саботажа се јасно дел од поширок план кој вклучува сајбер напади, притискање на мигрантите да преминат од Белорусија во Полска и загрозување на нејзината безбедност, бидејќи ја поддржува Украина во нејзината одбрана од инвазијата на Русија.
Полјак беше уапсен во април под обвинение дека е подготвен да шпионира за руското воено разузнавање и да учествува во наводен заговор за убиство на Зеленски, соопштија полските обвинители.
Тој, наводно, побарал контакт со Руси директно вклучени во војната во Украина и се очекувало да пренесе детални информации за стратешкиот аеродром во југоисточна Полска, во близина на границата со Украина.