„Еднаквоста меѓу мажите и жените е основно право на заедничка вредност на ЕУ и неопходен услов за постигнување на раст на ЕУ, вработување и социјална кохезија“.

„Еднаквоста меѓу мажите и жените е основно право на заедничка вредност на ЕУ и неопходен услов за постигнување на раст на ЕУ, вработување и социјална кохезија“.

Ова денеска го истакна на јавната расправа организирана од Клубот на пратенички на тема „Родова еднаквост во ЕУ“ евроамбасадорот Ерван Фуере.

„Во ЕУ постигнавме значаен напредок во последните декади во постигнувањето еднаквост меѓу мажи и жени, иако не се постигнати сите цели, сепак напредокот е многу значаен“, нагласи Фуере.

Тој изрази разочараност од текстот на нацрт законот за заштита од дискриминација кој што го достави Владата на Република македонија.

„Со тој нацрт Владата создава впечаток дека креира едно општество кое почива на нетолеранција, предрасуди и маргинализација на граѓанското општество“, рече Фуере.

Тој апелираше Владата да го повлече овој нацрт закон и да го замени со претходната верзија каде што е содржана категоријата за  сексуална ориентација.

„Треба да се обезбеди нацрт закон кој што во целост ќе ги одразува интересите на македонското општество и граѓаните, кој што ќе го промовира начелото на толеранција и почит и ќе го обезбеди почитувањето на стандардите на ЕУ“, подвлече Фуере.

Тој на крајот од своето обраќање рече дека ЕУ ќе и помогне на Македонија за промовирање на еднакви можности на родовите.

Симоне Филипини, амбасадор на Кралството Холандија во Република Македонија  нацрт законот за заштита од дискриминација го нарече канцер за македонското општество и таа побара враќање на ноемврискиот нацрт.

Таа преку некои народски изреки потсети на стереотипите кои што постојат во општеството и рече дека прашањето за еднаквост на родовите треба да се стави на врвот на агендата.

„Потребно е постојано да се работи на одржување на еднаквоста меѓу мажите и жените. Треба напорно да се работи на тој процес, а родовите политики да бидат приоритет во работата на пратениците“, истакна Наталија Дрозд, амбасадор, заменик-шеф на мисијата на ОБСЕ во Република Македонија, која исто така учествуваше во собраниската панел расправа.

Според Асја Варбанова, програмски менаџер на УНИФЕМ Македонија родовата политика важна и таа препорача создавање на поамбициозна агенда за учеството на жените во политиката и во раководните функции.

„Родовата политика е важна за вашата земја и тоа ќе го почувствувате со приближувањето кон ЕУ“, подвлече Варбанова./крај/бд

Фото:Филип Поповски/Макфакс