Очевидци изјавиле дека либиската воена авијација извршила масивно бомбардирање врз главниот град Триполи, јави Reuters, цитирајќи ја катарската телевизија Al Jazeera.Како што пренесува агенцијата, арапската телевизија емитувала во живо исказ на еден од жителите на Триполи, за тоа што се случува во моментов во главниот град на Либија. „Она што ние сега можеме да го видиме е едноставно незамисливо. Воени авиони и хеликоптери безобѕирно бомбардираа еден по друг неколку реони. Многу, има многу мртви,..“, изјавил жителот на Триполи кој се претставил како Адел Мухамед Салех. Засега нема официјални потврди за овие информации. Во судирите на демонстрантите со безбедносните сили кои се разгореа во понеделникот во либискиот главен град Триполи, загинале 160 лица, јавува Reuters повикувајќи се на арапските медиуми. Податокот за бројот на лица убиени во Триполи како итна вест го јави телевизијата Al-Arabia, која не го откри изворот на информацијата. Претходно, либиските и арапските телевизиски канали објавија дека во Триполи започнала обемна операција за задушување на народните протести. Како што претходно пренесовме по информации на телевизискиот канал Al Jazeera, за растурање на се помасовните протести, либиските власти ја вклучија и воената авијација. Низ целата територија на Либија исклучени се телефонските врски.  Протестите избија од 15-ти февруари прво во либискиот провинции со кои се бара повлекување на Моамер ел-Гадафи, кој управува со земјата 42 години. Според меѓународните организации, пред бомбашкиот напад на Триполи, бројот жртви во немирите во сите либиски градови изнесува 500 лица, додека бројот повредени достигнува до четири илјади луѓе./крај/аа/ро/сн