Во девет од десет косовски општини со српско мнозинство на изборите за градоначалници победиле кандидатите на Граѓанската иницијатива „Српска“ поддржана од официјален Белград, додека најмногу градоначалници во албанските општини ќе имаат владејачката Демократска партија на премиерот Хашим Тачи и опозицискиот Демократски сојуз на Косово на Иса Мустафа, според прелиминарните резултати од вториот круг на локалните избори одржани во неделата на Косово.

Фокусот на косовските локални избори беше ставен на првото учество на српското малцинство во оваа поранешна јужна покраина на Србија, каде што од вкупно 38 општини, српската зеница ќе има градоначалници во 10, со што е исполнет условот да биде формирана Заедница на српските општини (ЗАС), политичко административно тело коешто треба да ги застапува интересите на српското малцинство на Косово но во тамошниот правен систем, постигнат со Бриселскиот договор за нормализација на односите меѓу Белград и Приштина.

Во политички најважната општина за Србите, северна Косовска Митровица, победа прогласи Крстимир Пантиќ, кандидатот на листата „Српска“, а кандидатот на оваа коалиција победија во првиот круг во уште три општини северот, а во вториот круг во пер општини во централно Косово. Исклучок е гратчето Штрпце на крајниот југ од Косово, каде за градоначалник стана кандидатот на Самостојната либерална партија, српска партија која веќе учествува во владата на Хашим Тачи.

Откако се прогласи за победник, Пантиќ оцени дека победиле листата „Српска“ и владата на Србија. „Ова не обична победа, туку победа којашто на владата на Србија ѝ остава можност да го чува Косово и Метохија во Србија, бидејќи имаме девет градоначалници кои ќе ја предводат политиката на владата и доследно ќе говорат дека Косово е дел од Србија и во светот ќе ги застапува нејзините интереси“, изјави Пантиќ, истакнувајќи градоначалниците постојано ќе повторуваат дека не го признаваат независно Косово, како и дека „не се државјани на таканаречената Република Косово, туку на Србија“. Нагласи и дека по овие избори Косово нема никогаш да стане членка на Обединетите нации.

Пантиќ и отфрли тврдењата дека Србите се согласиле да се интегрираат во косовските институции, оценувајќи дека огромно мнозинство покажало дека не прифаќа со сила наметната состојба со прогласувањето на косовската независност.Според прелиминарните резултати од Централната изборна комисија на Косово, врз основа на 85 отсто од преброените резултати, најмногу резултати во општините со албанско мнозинство добиле Демократската партија на Косово и Демократскиот сојуз на Косово. Алијанса за иднината на Косово на Рамуш Харадинај и Алијансата ново Косово на еден од најбогатите косовари Беџети Пацоли ќе имаат градоначалници во по две општини, додека Граѓанската иницијатива за Малишево е победник во истоимената општина.

Претходно беше објавено дека во трката за главниот град Приштина води Шпенд Ахмети од движењето Самоопределување со 51,5 отсто, додека Иса Мустафа, челникот на Демократскиот сојуз на Косово кој добил до 48,5 отсто од гласовите. Самиот Мустафа на вонредна конференција за медиумите, изјави во неделата доцна вечерта дека загубил од Ахмети од движењето Самоопределување.

Во вториот круг од локалните избори на Косово беа избирани градоначалници на 25 општини, а на избори излегоа 42,5 отсто од вкупно 1.371.524 избирачи, а според првите неофицијални податоци, гласеле околу 41,5 отсто. Официјалните резултати треба да бидат објавени најдоцна до вторник, 3-ти декември. Откако Централната изборна комисија ќе ги потврди резултатите од изборите, градоначалниците пред избраните советници треба да ја дадат свечената обврска во рок од 30 дена./крај/мф/сн