Откако неколку денови го прашуваме директно на прес-конференции Филипче, за потеклото на неговата виза, тој сиве овие денови не бил тука, туку во Дубаи? Венко Филипче вчера далеку од тука, најверојатно уживајќи на грчките плажи или пак на увид на градежни активности на 50катница во Дубаи, заедно со својот партнер и ментор Заев пишуваше фејсбук статуси за памфлетот од Закон за настраданите од Кочани, за кои што морам да потенцирам дека Владата презема дури двојно од мерките кои СДС ги нуди со законот, истакна на прес-конференција Валентин Манасиевски, член на ЦК на ВМРО-ДПМНЕ.

„Имено, Венко Филипче по информација добиена од свиркачи, на 10.05.2025 е излезен од Македонија на граничниот премин Богородица, одејќи во Грција. Оттука, го прашуваме Филипче, дали е точна информацијата дека од Солунскиот аеродром се упатува кон Дубаи со златната виза? Дали Филипче е во Дубаи на увид со Заев на изградба на 50катница или можеби некој друг бизнис?

Македонската јавност заслужува одговор, за тоа каде е Венко Филипче? Затоа ли имавме молк од 5 дена?

Додека тој ужива во украдените пари, лицемерно поднесува Закон за настраданите од Кочани, на којшто не ни присуствува“, вели Манасиевски.

Филипче, како што додава, е само обичен лицемер, лажго и манипулатор.

Според него, Филипче и СДС се синоним за криминал, корупција и предавства.

Легализацијата на еден од објектите за кој бев осуден, ја водел како полномошник, адвокат Панче Тошковски, човекот кој заедно со Миле Јанакиевски беше дел од тимот што го изготвуваа законот за легализација, изјави денеска градоначалникот на Карпош Стевчо Јакимовски на прес конференција на која презентираше нови докази кои, како што рече тој, ја потврдуваат неговата невиност во осудителната пресуда.

„Овие докази се однесуваат на постапката водена за легализација на четирите објекти кои се наоѓаат покрај „Илинденска“. Што е интересно? Интересно е што легализацијата на еден од овие објекти ја водел како полномошник адвокат Панче Тошковски. Урбанистичката согласност ја подигнал адвокат Панче Тошковски, а на пресметката на комуналиите потпишан е Александар Јанакиевски. Тој е сега раководител на сектор за урбанизам во Гази Баба. Претходно бил раководител на сектор за урбанизам во Град Скопје, а претходно раководител за урбанизам во општина Центар“, рече Јакимовски.

„Господинот адвокат, сега министер Панче Тошковски, не го потенцирам за да го инкриминирам, напротив. Сакам да кажам дека господинот Тошковски ја познава оваа материја одлично“, нагласи градоначалникот и додаде:

„Тој не би поднел барање за легализација како полномошник на сопственикот на ДОТ Мебел, ако не е сигурен дека објектот има право на тоа, од причини што господинот Панче Тошковски заедно со Миле Јанакиевски учествуваше во тимот што го изготвуваше законот за легализација. И она што е уште најинтересно, полномошникот Панче Тошковски до нас има доставено изјава заверена на нотар од страна на сопственикот на објектот дека објектот го поседува повеќе од 20 години и дека потенцирам објектот е дивоградба. Значи сега имаме мртва трка меѓу оној што го чита законот и оној што го правел законот. И сега треба да погодиме од прилика кој подобро ја познава оваа материја“, рече Јакимовски.

Според него, ова е уште еден доказ дека во моментов оваа пресуда е само политичка и ништо повеќе и ова, како што рече, само покажува дека кога е во прашање струка тогаш адвокат Панче Тошковски совесно си ја завршил својата работа бидејќи објектот имал право на легализација.

Јакимовски пред три недели беше прогласен за виновен за две кривични дела и е осуден на затворска казна од 3 години и шест месецизатвор.

Тој е осуден за бесправна изградба и злоупотреба на службената положба кои според пресудата се сторени за време на изградбата на новата општинска зграда на Карпош.

Општина Кисела Вода спроведува голема акција за косење на нараснатата трева на јавните површини. Во акцијата се вклучени сите сезонски работници, кои со тримери темелно ја уредуваат зелената површина низ целата територија на општината.

Од Општината информираат дека денес се работи на трим патеката, која поради убавото време интензивно се користи од граѓаните за рекреација и прошетки, како и на поголемите паркови и детски игралишта. Паралелно со косењето, со специјално возило се пере трим патеката, со цел одржување на хигиената и поголем комодитет.

Од Општината најавија дека акцијата продолжува и во наредните денови, при што ќе бидат опфатени сите месни и урбани заедници. Станува збор за редовна активност која се интензивира секогаш кога временските услови предизвикуваат побрз раст на вегетацијата.

„Зелените и чисти површини не се само естетски елемент, туку и суштински дел од здравата и квалитетна животна средина. Затоа, вложуваме максимални напори за редовно и темелно одржување на парковите, детските игралишта и патеките за рекреација, како и на сите останати јавни простори. Ваквите големи акции, со вклучен ангажман од голем број на сезонски работници, ќе продолжат и во периодот кој е пред нас“, изјави градоначалникот Орце Ѓорѓиевски.