Во Македонија има потреба од воведување сексуално образование во училиштата, покажуваат резултатите од истражувањето со кое се утврдија потребите на родителите, наставниците и учениците, истакнуваат од Х.Е.Р.А

Со истражувањето насловено „Љубов само по часови“, од оваа организација прават преглед на постојните образовни програми и според нив, „не само што не постои усогласен пристап за начинот на кој се даваат информациите за една тема низ наставната програма, туку често, иста тема може да биде изложена со двојни вредности во ист учебник“.„Некои од наставните материјали промовираат стереотипи (на пр. За сексуалната различност, хормоналната контрацепција итн.) и имаат негативни ставови кон љубовта и сексуалноста,“ истакна Драшко Костовски, програмски директор на Х.Е.Р.А.Од организацијата известуваат дека според нивните истражувања спроведени во 2009 година на Македонија и е потребно сеопфатно сексуално образование и потврдија дека тие и понатаму ќе продолжат да лобираат и да соработуваат со граѓанските организации и со одговорните државни институции за подобрување на пристапот до бесплатни, доверливи и квалитетни здравствени и социјални услуги за сите. „Посебни напори ќе се вложат за унапредување на сексуалното и репродуктивното здравје како и сексуалните права на младите, ранливите групи, особено лицата кои живеат со ХИВ,“ велат од оваа организација.Оваа година Х.Е.Р.А стана рамноправна членка на Меѓународната федерација за планирано родителство, која што е една од најголемите светски организации во полето на сексуалното и репродуктивното здравје.