Свет
СДСМ, ВМРО-ДПМНЕ, ДУИ и ДПА под лупа на државниот ревизор
Државниот завод за ревизија ќе го испитува финансиското работење во минатата година на четирите најголеми политички партии СДСМ, ВМРО-ДПМНЕ, ДУИ и ДПА. Тие партии влегле во програма на Државниот ревизор за 2005 година.
Александра М. Митевска
Државниот завод за ревизија ќе го испитува финансиското работење во минатата година на четирите најголеми политички партии СДСМ, ВМРО-ДПМНЕ, ДУИ и ДПА. Тие партии влегле во програма на Државниот ревизор за 2005 година.
Мијалче Дургутов, одговорен за односи со јавноста во ДЗР, вели дека политичките партии првпат се под лупа на државната ревизија, бидејќи пред неколку месеци беше донесен Законот за финансирање на политичките партии, со кој се предвидува надзорот над финансиско-материјалното работење на партиите да го вршат Министерството за финансии и Државниот завод за ревизија.
– Во текот на годинава ќе се анализира целокупното нивно финансиско работење, вклучително и финансирањето на изборните кампањи – вели Дургутов.
Меѓу критериумите за ревизија се задолжителноста, предвидена со законот за државна ревизија, степенот на ризичност, обемот на јавните средства, барањата на надлежните органи и правни субјекти, сознанијата или индициите за незаконско и ненаменско трошење на јавните средства, обезбедување соодветна застапеност на правните субјекти.
СДСМ, ВМРО-ДПМНЕ, ДУИ и ДПА имаа свои кандидати на претседателските избори во април 2004, а водеа кампања и за референдумот.
Четирите партии, во согласност со законската обврска, поднеле извештаи за финансирањето на кампањата до антикорупциската комисија.
– Тие извештаи содржеа само податоци колку средства се потрошени, без да се наведе изворот на финансирање. Така, комисијата практично не можеше да ги скенира извештаите, бидејќи нема механизам за да се провери нивната веродостојност. Вистинска контрола врз финансиското работење на политичките субјекти може да се воспостави само ако Државниот ревизор ја преземе работата во свои раце – велат нашите соговорници.
Лани имаше и референдумска кампања, во која беа вклучени повеќе партии, а ниту една не поднела извештај за нејзиното финансирање до антикорупциската комисија.
– Партиите не поднесоа извештај за референдумот, бидејќи во тој случај законот не предвидуваше класична кампања. По претседателските избори партиите поднесоа извештаи за финансирањето на кампањата, бидејќи комисијата е должна да ги изанализира тие извештаи и да се изјасни ако се утврдат евентуални злоупотреби. Во прв план е да се утврди дали во кампањата се злоупотребени буџетски пари, а потоа извештајот се доставува до Собранието – објаснува Драган Малиновски, претседател на антикорупциската комисија.
Според изборната регулатива, партиите во текот на изборната кампања може да потрошат најмногу по 15 денари од запишан гласач. Потоа дел од тие средства се надоместува од државниот буџет во висина од 15 денари по освоените гласови на изборите. Според таа математика, една партија на овие избори би можела да потроши околу 400 илјади евра. Бидејќи станува збор за локални избори, таа сума ќе се подели според бројот на гласачите во општините во кои партијата има кандидати. Така, на пример, кандидатите за скопски градоначалник може да потрошат по околу 100 илјади евра. Меѓутоа, уште во првата половина од кампањата партиите почнаа да се обвинуваат меѓусебе дека е надмината законски дозволената сума и дека се направени низа неправилности во финансиското работење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Остин: Бајден ја запре испораката на оружје за Израел
Американскиот министер за одбрана Лојд Остин денеска изјави дека одлуката на американскиот претседател Џозеф Бајден да ја прекине испораката на муниција за Израел е донесена поради израелските планови да изврши офанзива врз градот Рафах на југот на Појасот Газа.
„Од самиот почеток бевме многу јасни дека Израел не треба да започне голема офанзива во Рафах без да ја земе предвид заштитата на цивилите во областа. Откако ја преиспитавме ситуацијата, престанавме да испраќаме муниција во Израел“, рече тој на сослушувањето во Сенатот и потврди дека конечната одлука „што ќе се случи со таа пратка“ се уште не е донесена, пренесува Ројтерс.
Администрацијата на САД ја запре испораката на околу 3.500 бомби во Израел минатата недела поради загриженоста за најавената копнена офанзива на Рафах, објави претходно денеска Асошиејтед прес, повикувајќи се на неименуван претставник од администрацијата.
Овој функционер појаснил дека не е донесена конечна одлука за испораката на бомбите и дека во суспендираната пратка имало 1.800 бомби од по 900 килограми и 1.700 бомби со тежина од 226 килограми.
Во понеделникот, израелскиот воен кабинет одлучи да ја спроведе планираната операција во Рафах за да „изведе воен притисок врз Хамас“, и покрај претходната најава на Хамас дека се согласува со египетско-катарскиот предлог за прекин на огнот.
Европа
Намалениот број на станови доведе до раст на кириите во Германија
Растат кириите во Германија поради немањето станови во услови на високи градежни трошоци и кредити. Сето тоа го запре градежниот сектор и побарувачката, но и ги намали цените на квадратот, се вели во извештајот на здружението на банките.
Становите во Германија поевтиниле за 4,3 отсто во првиот квартал во однос на истиот период лани, објави здружението на германските банки„Pfandbrief“.
Цените за изнајмување на нови станови се зголемени за 5,6 отсто. Трендот на поскапување на кириите нема да запре, оценуваат од здружението.
„Пазарот за изнајмување станови е под огромен притисок. Побарувачката значително ја надминува понудата“, рече извршниот директор на здружението, Јенс Толкмит.
Трошоците за изградба значително се зголемија во последните години поради повисоките каматни стапки на кредитите и значително повисоките трошоци за работна сила и цените на градежните материјали. Во вакви услови се намали бројот на одобренија за градба, а побарувачката ослабе, што резултираше со пониски цени на становите, смета министерот за финансии.
Според податоците на здружението на банките, цените на недвижностите најмногу паднале во Минхен, за 5,3 отсто.
Во исто време, падот на градежната активност го продлабочува „недостигот“ на станови, зголемувајќи го натамошниот раст на закупнината, кој би можел да продолжи уште некое време.
Здружението оценува дека цените на станбените недвижности треба да се стабилизираат во догледна иднина, за разлика од комерцијалните недвижности, како што се деловните згради и трговските центри.
Цените во тој сегмент паднаа за речиси 10 проценти на годишно ниво и се уште не се гледа „дното“, вели првиот човек на здружението.
Проценките се базираат на податоци за работењето на повеќе од 700 банки кои се активни во финансирањето на недвижен имот, а не на понуди за купување и изнајмување кои служат како основа за Заводот за статистика, забележуваат тие во здружението.
Европа
(Видео) Драма на небото над Трст: забележана несекојдневна појава
Во внатрешноста на заливот Трст, во близина на границата со Словенија, во вторникот попладне се формирал вител.
Италијанските медиуми јавија дека невремето не предизвикало материјална штета, ниту било закана за населението. Интервенцијата на пожарникарите и на пристанишните служби не била потребна.
Waterspout reported in the North Adriatic between the town of Muggia and Koper a few hours ago.
Original video shooting from meteoradar
➡️ https://t.co/SXbq5rbWaj pic.twitter.com/XxRu57Gohs— Alpine-Adriatic Meteorological Society (@aametsoc) May 7, 2024
Италијанската метеоролошка агенција објасни дека ваквите појави не се воопшто ретки и дека се резултат на екстремна нестабилност на атмосферата.
Областа на низок воздушен притисок, која владее со поголемиот дел од Италија, донесе влажни струи во Трстскиот Залив.
„Во овие временски услови, неколку пати годишно може да се појават воздушни вртлози, кои во повеќето случаи се распаѓаат на море“, објаснуваат италијанските метеоролози.