Свет
Бучковски ја призна даночната пирамида
Им дишеме во врат на фирмите вплеткани во пирамидата на даночно затајување, изјави вчера во Кавадарци премиерот Владо Бучковски.
ФИРМИТЕ ГИ ИЗБЕГНУВААТ ДАНОЦИТЕ според НЕКОЛКУ ШЕМИ
Им дишеме во врат на фирмите вплеткани во пирамидата на даночно затајување, изјави вчера во Кавадарци премиерот Владо Бучковски. Со ова тој ги потврди изјавите на министерот за финансии Никола Поповски дека Финансиската полиција и Управата за јавни приходи прибираат докази за педесетина фирми, кои имаат разработено шема за избегнување на даночните обврски.
– По тримесечна макотрпна работа на повеќе владини институции, ќе се направат обиди да се урне пирамидата. Таа веќе има фатено корени. Вчера изутрина МВР презеде и конкретни чекори, а сега на потег во борба против овој софистициран облик на организиран криминал е Јавното обвинителство – рече Бучковски.
Тој е оптимист дека пирамидата ќе се урне и истакна дека преку неа стотици милиони евра годишно се одлеваат од државата. Тој не сакаше да ги каже имињата на фирмите, велејќи дека сами ќе се препознаат и нема мирно да спијат.
Во МВР велат дека нивни инспектори не ја водат акцијата, туку неа ја спроведува Финансиската полиција, а тие само помагале. Во Министерството за финансии, во чии рамки работи Финансиската полиција, не сакаат да дадат никаква изјава.
Стопанствениците велат дека државната каса е оштетена од фирми за околу 50 милиони евра годишно поради избегнување на обврската да плаќаат ДДВ и акциза, а кај холдинг-компании, кои имаат многу мали и фиктивни фирми, се вртат дури 40 милиони евра, кои ниедна државна институција не ги евидентира.
Поповски неодамна посочи дека даночната пирамида ја чинат околу 50 фирми на познати бизнисмени, кои високо котираат во општествениот живот. “Дневник” по разговорот со неколку бизнисмени ги открива шемите по кои се прават најголемите даночни малверзации за прикривање на данокот на добивка, ДДВ, акциза и персонален данок. Тие укажуваат на неколку разработени системи за избегнување на даночните обврски, кои најчесто ги применуваат поголемите компании, но не им се непознати и на малите фирми. Како поттикнувач на овие злоупотреби бизнисмените ја сметаат и државата, која им дава даночни привилегии на одредени фирми, а потоа не го контролира нивното работење.
– Многу фирми ќаруваат на можноста да бидат ослободени со 50 отсто од данокот на добивка за инвестирање во екологија, како и странските инвестиции кои државата целосно ги ослободува од овој данок дури и до 10 години. Во вториот случај тие прикажуваат огромни разлики во цени, големите добивки ги пренесуваат надвор и не прават никакви инвестирања во земјава. Државата не пројавува моќ за да им застане на патот, а им дава многу погодни услови како евтина струја и работна сила и им ги продава фабриките по багателни цени – коментираат стопанственици.
Во бизнис круговите прилично разработена шема се оф шор фирмите во странство, кои најчесто им припаѓаат на домашни фирми во кои е влезен странски капитал и преку кои ги пеглаат добивките и плаќаат малку данок на профит.
– При увоз на репроматеријали оф шор фирмите фактурираат нереално големи вредности. Тоа ги зголемува вкупните производни трошоци и на крај нема добивка. Само кај нас фирмите може да имаат огромен годишен промет, а да пријават минорни добивки – велат бизнисмените. Според нив, финансиските малверзации со оф шор фирмите никогаш нема да се откријат. Тие ги потсетуваат надлежните институции да го проверат потеклото на парите на елитните бизнисмени во земјава.
– Така ќе можат да ги прашаат од каде им се парите за скапите коли, куќи, станови, викендички, кога нивните фирми пријавуваат годишна добивка од 10.000 евра, а некогаш и загуба. Само кај нас им се исплати на фирмите да работат со загуба, а во секоја нормална држава веднаш пропаѓаат – укажуваат во бизнис круговите. Стопанственици посочуваат дека при увозот на суровини се прават малверзации и со пониска фактурирана вредност од реалната за да се избегнат царинските и даночните обврски. Во овие случаи се користеле сефовите што ги имале македонски бизнисмени во странски банки, од каде дел од цената на суровините ја плаќале во готово. Голем дел од добивката фирми пеглале и преку консултантски услуги, во што признаваат стопанствениците, дека многу им се наоѓаат адвокатите и маркетинг агенциите.
– Адвокатите мора да станат даночни обврзници, а не да плаќаат годишен паушал. Многу од нив често наплаќаат непостојни услуги, парите им ги враќаат на клиентите во готово и им помагаат да ја намалат добивката – велат нашите извори.
На врвот на даночната пирамида во земјава се посочуваат компаниите што секојдневно регистрираат “роднински” фирми, кои на големи даночни обврзници им пуштаат лажни фактури. Доброупатените кажуваат дека токму така се вртат парите и не се плаќа ДДВ. Според нив, голема вина за овие појави сноси судството, кое им дозволува на исти луѓе постојано да регистрираат фирми што не вршат никаква дејност. Овие фирми во Бугарија се нарекуваат пилот-фирми бидејќи имаат краток живот или откако ќе си ја одиграат улогата, се држат на нула додека законски не згаснат. Слична е и шемата со локалните фирми што ги отвораат поголемите производители, а кои им служат како дистрибутери.
– Преку овие фирми се врши класично продавање на црно бидејќи производителот наплаќа многу ниска излезна цена, а на дистрибутерот му дозволува половина и повеќе од стоката да ја продава на црно. Така се избегнува и ДДВ и акциза – велат стопанственици.
Тие сметаат дека за да се стави ред, мора итно да се спроведе фискализацијата целосно, надлежните институции да сакаат да го следат текот на парите во банките и да вршат неселективни контроли, а судството да го среди хаосот со регистрација на фирми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах лансира ракети врз северен Израел
Хезболах лансира 140 ракети кон северниот дел на Израел, само еден ден откако лидерот на екстремистичката група, Хасан Насрала, најави одмазда за серијата експлозии во Либан во последните три дена.
Израелската армија објави дека ракетите паднале во три брана во петокот попладне, а цел биле места по должината на разурнатата граница со Либан, пренесува „Јутарњи“.
Хезболах соопшти дека цели биле неколку места по должината на границата со ракетите „Катјуша“, вклучително и неколку бази за противвоздушна одбрана, како и штабот на израелската оклопна бригада, која, според нив, била првиот погоден, пренесува „Н1 Загреб“.
Хезболах рече дека ракетите биле како одмазда за израелските напади врз села и домови во јужен Либан.
Свет
Камала Харис: Ако некој упадне во мојот дом, ќе биде застрелан
Потпретседателката на САД, Камала Харис, изјави дека е подготвена да употреби пиштол доколку натрапник упадне во нејзиниот дом.
„Ако некој упадне во мојата куќа, ќе биде застрелан“, рече Харис, гостинка на Опра Винфри.
„Веројатно не требаше да го кажам тоа, но мојот персонал подоцна ќе се справи со тоа“, додаде таа и се насмеа. Харис, која потврди дека поседува пиштол за време на неодамнешната претседателска дебата, ја повтори својата поддршка за забраната на автоматските пушки.
„Огненото оружје од овој тип е буквално дизајнирано да биде воено средство. За него нема место на улиците на граѓанското општество“, нагласи таа.
Рече дека е поддржувач на американскиот втор амандман, кој го штити правото на поседување оружје, но се осврна и на американскиот проблем со престрелките во училиштата.
Таа предупреди дека е вознемирувачко што децата мораат да поминат вежби за да се подготват за вакви инциденти. „Не мора да биде така“, убедена е таа. По едно од најновите масовни престрелки во САД, 14-годишно момче е обвинето за убиство на четири лица во средно училиште во Џорџија.
„Поседувам пиштол веројатно од истата причина како и многумина што го имаат – за лична безбедност. Бев обвинител“, рекла Харис во 2019 година, според Би-би-си.
За време на минатонеделната дебата со републиканскиот кандидат Доналд Трамп таа ги негира обвинувањата на Трамп дека „ќе им го одземе пиштолот на сите“ доколку биде избрана во Белата куќа.
Трамп поседуваше и три пиштоли, но мораше да предаде два од нив и да се соочи со ограничувања за третиот откога беше обвинет.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.