Македонија
Виновни ли се единаесетмината од Сопот?!
Седум години 11 души од Сопот седат во затвор, осудени на вкупно 156 години за тероризам, а јавноста и меѓународната заедница не се убедени дека токму тие луѓе се виновни за смртта на двајцата војници на КФОР кои со џипот налетаа на мина во 2003 година
Единаестмината кои лежат во затвор осудени од сите судски инстанци во земјава, додека чекаат на одлуката на Врховниот суд, до кој нивниот адвокат има поднесено жалба, штрајкуваат со глад. На денешната дебата организирана од невладината „Разбуди се“ со цел да се помогне во обновување на случајот и конечно да се дојде до вистината, сите учесници и гости беа загрижени за нивната здравствена состојба.
Како што соопштија нивните роднини кои не можат многу да ги видат затворениците, но и народниот правобранител, Иџет Мемети, кој има директен контакт со нив, здравствената состојба им се влошува од ден на ден.
„Иако сите се запознати со нивните права при стапување во штрајк со глад, сепак сите, освен најстариот одбиваат да примаат вештачка храна. Најстариот прима храна преку инфузија два пати во денот“, рече Мемети.
Тој неколкупати се обидел да ги разубеди, да не стапуваат во штрајк со глад, но тие не го слушале, а како што вели Мемети, никој не може да им го одземе тоа право.
„Јас отворив постапка за лицата кои се на издржување казна затвор за случајот Сопот, од кога дознавме дека тие стапила на штрајк со глад. Ги посетивме со лекар и секојдневно сме во комуникација со управата на затворот, а и со самите затвореници, се со цел да ја следиме нивната здравтвена состојба“, вели Мемети.
Денешната дебата беше организирана со цел да се придонесе за решавање на случајот.
„Целта на дебатата е јавноста уште еднаш да биде запозната со сите докази, сите случувања за случајот Сопот, за тоа дека дека вистината веќе се гледа. Осудените апсолутно не се виновни за тоа што се осудени. Осудени се за најтежок вид кривично дело – тероризам, без докази. Доказите врз кои судот ја засновал својата пресуда, ние со аргументи и со материјални докази успеавме да ја побиеме“, рече Вулнет Пачуку, адвокат на осудените .
Според него, докажано е повеќекратно дека исказот на Рамадан Бајрами, врз основа на кој се осудени единаесетте сопотчани, е кажан по употреба на физичка сила и психичка тортура.
„Пред околу десет дена поднесовме барање за вонредно преиспитување пред Врховниот суд. Ќе бидат превземени и другите вонредни правни лекови, а тоа е барање за заштита на законитоста и барање за повторување на постапката, меѓутоа прво ќе чекаме исход од Врховниот суд“, рече Пачуку.
Тој очекува правдата да излезе на виделина, поточно, осудените да бидат прогласени за невини и тоа во рок од два до три месеци, затоа што тоа е рокот во кој можат да се завршат сите правни процедури.
„Јас сум најдлабоко убеден дека истите еден ден ќе бидат ослободени, се соочуваме со пресови кои се во насока на осудување на лицата, меѓутоа вистината е веќе јасна, крајот ќе биде со ослободителна пресуда иако тоа се одолговлекува“, вели Пачуку.
Вчера, бил доставен и извештајот од Анкетната собраниска комисија за заштита на човековите права и слободи, по заклучокот што беше донесен од Работната група за Сопот формирана во Собранието. Пратениците Албанци кои присуствуваа на оваа дебата беа разочарани од односот на претседателот на Собранието, Трајко Вељаноски, затоа што иако Извештајот е донесен пред повеќе од еден месец, дури вчера успеал да го прати до судот.
„Сами гледате какви работи прави претседателот на парламентот. Значи парламентот не го познава заклучокот од комисијта која ја формираше самиот парламент, што значи дека претседателот на парламент ги кочи работите. Тој беше должен да го поднесе барањето до Врховниот суд и ова да се реши“, рече Абедин Зимбери од Нова демократија на Имер Селмани.
Според него, доколку нештотрагично се случи со здравјето на овие луѓе, виновни ќе бидат претсеателот на државата, на собранието и премиерот.
Зимбери смета дека не е само овој случај таков во државава, туку наброи уште неколку, каде како што вели врз основа на сомнителни докажи, невини луѓе лежат во затвор.
Деновиве се спомнува и организирање протест по улиците на Скопје, од неколку невладини организации со цел да се обрне внимание на случајот Сопот. Дел од пратениците го поддржуваат протестот, а дел се против.
„Ние сакаме случајот да се реши на институционално ниво, а не на улица“, рече Хајрула Мисини од ДУИ, додека неговиот колега од Нова демократија, Зимбери, вели дека ќе поддржат какво било движење и акција, само да се дојде до вистината.
Професорот Ким Мехмети укажа на еден непобиден факт, дека сите учесници на дебатата се од една етничка заедница, а тоа според него е проблем, бидејќи не се развива дијалог меѓу заедниците, преку кој би дошло до разбирање.
„Албанците од осамостојувањето, наваму, се жртви на вакви процеси, а ако чекаме Али Ахмети да го актуелизира процесот, никогаш нема да дочекаме. Албанските партии имаат еден проблеЧ 15 дена се за народот, а четири години се послушни на коалицијата“, рече Мехмети.
Од друга страна пак, народниот правобранител верува во судскиот систем и дека на крај, по фер и правично судење ќе се донесе квалитетна пресуда со што ќе се отстранат сите сомнежи од овој случај.
Во 2003 година од подметната експлозивна направа загинаа двајца НАТО војници од полскиот контингент. Единаесет жители на Сопот се осудени на 156-годишна затворска казна. Случајот по шест години се актуелизираше по изјавата на тогашниот амбасадор на НАТО, Никлас Бигман, дека не верува оти тие единаесетмина се виновни и дека најверојатно се повредени човековите права.
Беше формирана Работна група во Собранието која разгледа многу документи од сите релевантни институции, повика доста јавни личности кои можеа да посведочат за случајот, меѓу кои и Бигман, и главниот сведок Рамадан Бајрами, и тогашните министри за внатрешни и одбрана, Хари Костов и Владо Бучковски.
Во Заклучпкот на Анкетната комисија стоеше дека при истрагата биле повредени човековите права.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски до ДУИ и Ковачевски: Европски ли е кога Ахмети викаше УЧК во Скопје?
Додека се колнат во ЕУ, ја купуваат Соравија, додека зборат за правда делат шамари во контролата на летање во Скопје. Додека народот гладува тие си слават родендени во државни институции. Додека зборат за стандарди, на онкологија ги крадат болните од рак. И треба да знаете дека ниту една лекција не ја научија. СДСМ не се огради од криминаот на ДУИ, ниту пак има намера. А од ДУИ го употребуваат истиот наратив дека биле европска партија, во исто време кога џебовите им се полни со Европски пари, кажа претседателот на ВМРО-ДПМНЕ, Христијан Мицкоски на вечерашниот митинг во Виница.
Претседателот упати и прашање до ДУИ, а и Ковачевски, кој продолжува да молчи, дали кога Али Ахмети викаше среде Скопје УЧК, УЧК е европски чин? Дали тоа доликува на европскиот фронт на ДУИ СДСМ праша тој.
Исто како што купувањето на Соравија што е европски чин, од страна на голобрадо момче, случајно кој е внук на Ахмети исто како што Мерко е европски градоначалник, море светски… како Артан што возеше ауди со полициски флешери на име на фирмата што зела тендер на Шапка? Е сето ова е многу европски, директно не носи во ЕУ, кажа претседателот.
Тој потенцира дека однесувањето на ДУИ и СДСМ ја подрива европската идеја во Македонија. Тие стануваат минери на европската идеја затоа што народот нив не ги идентификува со Европа и има европски функционери кои се срамат што ликови како Артан, Мерко и Талат овде зборуваат за ЕУ. Затоа што ЕУ не е олицетворение на корупција како што се Артан, Мерко и Талат.
И затоа резултатот е таков во првиот круг. Овде во Виница победивме со 4571 на 1764 гласови за СДСМ. Народот е определен, и јас искажувам длабока благодарност и почит до секој еден од вас. Но работата не е завршена. Ова беше само првиот круг, и жолтиот картон, мора да стане црвен на изборите на 8 мај. Народот да го зададе финалниот удар против корупцијата, криминалот и сиромаштијата. Повикувам на масовна излезност, затоа што излегувањето на овие избори меѓудругото е и патриотска должност и обврска кога Македонија е толку силно разградена со криминал и корупција. Да одиме напред, и да ги победиме сите сценарија кои ги разработува дуото СДСМ и ДУИ, заклучи претседателот.
Македонија
(Видео) Ковачки: СДС не е противник само на ВМРО-ДПМНЕ, туку и на народот
Победата во првиот круг е огромна. Победата е ваша на сите граѓани. Затоа што вие одлучувате во каква Македонија ќе живеете. Сакам да ви честитам на сите кои се обединивте и се приклучивте на промените. Но имаме уште работа. Пред нас е вториот круг за избор на претседател на Македонија и избор за нова влада. Во вас е силата за конечна промена на Македонија и враќање назад на државата, во вашите раце, вели Драган Ковачки, носител на изборната единица 3 на денешниот митинг во Виница во рамки на парламентарната и претседателска кампања.
Ковачки, посочи дека по победата на ВМРО-ДПМНЕ следи одговорност за власта на СДС и ДУИ за криминалот и сите штетни политики кои ја потонаа Македонија.
Има уште два удари кои треба да ги зададеме на оваа криминална влада на СДС и ДУИ. Едниот на 8 мај. А потоа по победата на ВМРО-ДПМНЕ следува и третиот удар за секој еден кој се огрешил пред законот. Тоа се вика одговорност. Одговорност за сите штетни политики кои ја потонаа Македонија. И одговорност за целиот криминал кој го правеше ДУИ и измеќарите од СДС, дециден е тој.
Ковачки истакна дека народот е силата и одговорот на сите порази и скандали на Ковачевски и Ахмети.
Вие покажавте што значи кога некој си игра со вашите судбини. Вие сте силата и одговорот против сите порази, скандали и афери на Димитар Ковачевски и Али Ахмети, рече тој и додаде дека порано СДС поразот го славел како победа, а денеска се тешат со истиот тој пораз, укажувајќи дека 360 илјади граѓани им порачаа дека се готови.
Деновиве после поразот ги слушам како велат ја примивме пораката од народот. Ќе се промениме. Но лажат. И тогаш ви кажав и сега ви кажувам, лажат сушат. Лажат за да продолжат да крадат, малку им е што ве покрадоа. Сакаат уште. Денеска ги слушам како велат резултатот е нула. Се сеќавате порано поразот го славеа како победа, како триумф, денеска се тешат со поразот. Но, не сфаќаат дека 360 илјади граѓани му дадоа црвен картон на СДС, Ковачевски, Пендаровски, Али, Груби. 360 илјади граѓани им порачаа ГОТОВИ СТЕ! Затоа ајде да го тродуплораме овој резултат овде и секаде низ општините во Македонија, порача Ковачки.
Ковачки, додаде дека СДС не е противник само на ВМРО-ДПМНЕ, туку и противник на народот.
Затоа што СДС не е противник само на ВМРО-ДПМНЕ, туку и противник на народот, противник на Македонија, затоа што изминатите 7 години од политичка партија се претвори во обичен измеќар на ДУИ. Ковачевски прифаќаше секаква наредба од Али само за да опстои на власт, Стево пак не го видовме воопшто да се спротивстави на криминалот и корупцијата на СДС и ДУИ, напротив коленичи пред ДУИ. се фасцинира од Али и Груби. Епа не ни треба таков човек кој е нем посматрач додека Македонија ја распродаваат. Не ни треба Ковачевски кој за секој скандал на ДУИ и Али има оправдување, затоа што и тој е вмешан. За пусти пари го брани и она неодбранливото. Епа доста е!Нашата визија е Македонија повторно ваша. Во вашите раце. Затоа што вие сте сила на една држава.
Во однос на проектите, Ковачки кажа дека Платформата 1198 за Виница се обврзува на реализација на:
Изградба на Булевар Илинденска на влез во Виница, изградба на кружен тек, ул. Браќа Миладинови, изградба на локален пат до туристичка и викенд населба на Плачковица, село Градец – Маринково, Блатец – Детлово (2 фаза), регулација и партерно уредување на Виничка река, регулација на Градечка река – Виница, партерно уредување на кеј на Градечка река во Виница, изградба на локален пат Трсино – Голак (1 фаза), изградба на спортска сала во ООУ Гоце Делчев – Виница, изградба на спортски терени во село Градец и село Трсино, изградба на канализациона мрежа во село Липец, изградба на пречистителна станица за отпадни води во село Блатец, регулација на речно корито на Кајанечки дол село Истибања, изградба на водоводна мрежа во Големчево – село Истибања, изградба и реконструкција на улици во Виница и други населени места. И уште многу други проекти за кои се обврзуваме да ги реализираме во 4 годишниот мандат.
На крај, Ковачки побара поддршка од граѓаните на 8 мај за ВМРО-ДПМНЕ за идна влада и Гордана Силјановска Давкова за нов претседател на Македонија.
Ни треба вашата поддршка и масовна излезност на 8 мај за бројот 2, за двојна победа. 2 за ВМРО-ДПМНЕ за идна влада, и 2 Силјановска Давкова за претседател на Македонија. За Макаедонија да ја трансформираме напред кон нови победи, проекти и реформи. Ни треба поддршка сплотеност и обединетост за да создадеме иднина овде во сопствената Македонија.Ни треба вашата поддршка за да си ја вратиме изгубената држава, за институциите да бидат во ваша служба, а не во служба на криминалците од СДС и ДУИ. Ние ја сакаме Македонија повторно твоја. Македонија на земјоделците, на здравствените работници. Македонија повторно твоја на просветните работници, Македонија на пензионерите. Македонија на младите. Македонија на успешни компании и странски инвестиции. Македонија земја на горди граѓани, порача Ковачки.
На 24 април го делегитимиравме Ковачевскии Ахмети и бандитите. А на 8 мај да ги срозиме. И да го победиме ова зло поради кое Македонија и вие граѓаните тонете, изјави тој.
Македонија
Пендаровски: Наместо да се извинат за 27 април, кандидатката на ВМРО-ДПМНЕ за претседател најавува амнестија за насилниците
Претседателскиот кандидат Стево Пендаровски на 7 -годишнината од упадот во Собранието, кој се случи на 27 април 2017-тата година, истакна дека насилниците коишто влегоа да тепаат пратеници и новинари, не им се извинија ниту на граѓаните, ниту пак на луѓето кои ги поттикнуваа на насилство против своите сограѓани, само за да ги зачуваат своите фотелји затоа што не сакаа мирно да ја предадат власта, туку повеќе беа подготвени да ја жртвуваат државата. Наместо извинување, сега ВМРО – ДПМНЕ и нивната кандидатка за претседател најавуваат амнестија на насилниците доколку дојдат на власт.
„За жал истите луѓе кои на тој ден упаднаа во Собрание, сега бараат власт. Претседателот на главната опозициона партија беше влезен исто така. Не велам дека сите што влегоа внатре се криминалци, меѓутоа сакав да го прашам и тогаш и сега што бараше внатре во Собранието? Дали да ја заврши работата која ја организираа од неговата партија, да не дозволи мирен трансфер на власта – сите знаеме дека беше тоа, имаше судски пресуди на таа тема. За жал од тогаш поминаа 7 години, ни еден од актерите, особено ниту еден од организаторите не се извини затоа што за прв пат во историјата партијата на власт за да не ја даде власта организира бунт и со помош на пратеници, нападна пратеници, еден, двајца беа на работ на смрт. Освен што не се извинија, денеска нивната кандидатка за претседател најавува нивна амнестија“, рече Пендаровски.
И дополнително, како што додаде Пендаровски се претставуваат како патриоти кои ја бранеле Македонија.
„Јас разбирам да кажеш криви биле тие и тие, по име и по презиме и да речеш дека многу им се високи казните или во име на некакво национално помирување да им простиме дел од казната, да си одат дома, било што било. Но ништо од тоа не се случува, само се најавува амнестија. Според мене тоа е јасен индикатор дека на таков начин, ако дојдат на власт и ќе се владее“’, додаде Пендаровски денеска во Пештани.