Македонија и Грција, како што и се очекуваше не ги приближија дијаметрално спротивставените позиции околу разликите за името, по денешната директна средба на премиерско ниво.

Македонија и Грција, како што и се очекуваше не ги приближија дијаметрално спротивставените позиции околу разликите за името, по денешната директна средба на премиерско ниво.

Oд двете страни, сепак, се испратени пораки дека добро е што има дијалог и оти тој нов бран може да доведе до решавање на билатералните проблеми.

Македонскиот премиер Никола Груевски по вечерашната средба во Пили со неговиот грчки колега Јоргос Папандреу, изјави дека ваквите директни разговори, кои се водат паралелно со официјалните преговори, под покровителство на ОН, се чекор напред во изнаоѓањето заедничко прифатливо решение.

Груевски апелираше Грција да размисли околу наметнувањето вето на состанокот на Советот на министри а ЕУ, на седми декември, на кој Македонија очекува да добие датум за преговори со Унијата.

Грција со уцени и блокади не постигнува ништо, рече Груевски, посочувајќи како доказ дека по ветото на Самитот на НАТО во Букурешт, односите меѓу двете држави се влошиле.

Груевски изјави дека Папандреу на средбата ги повторил истите позиции за името и идентитетот, што беа презентирани пред медијаторот Метју Нимиц, а кој македонската влада експресно ги оцени како максималистички.

Грчкиот премиер Папандреу во изјавата дадена само за грчките новинари, изјавил дека е оптимист во поглед на решавањето на спорот со Македонија.

„Едно прашање, кое трае 18 години не може да се реши за неколку дена. Има надеж дека е можно решение во наредните неколку месеци или една година“, изјави Папандреу по средбата со Груевски, додавајќи дека процесот на решавање на спорот продолжува под мандатот на ОН. /крај/ил/ег/мс

Предходни вести:

(17:58) Македонските новинари спречени да земат изјава од Папандреу>> Грчки официјални лица вечерва на претставници на македонските медиуми не им дозволија да присуствуваат на изјавата  која грчкиот премиер ја даде по средбата со неговиот македонски колега

(17:40) Груевски: Грција да размисли околу ветото>> – побара македонскиот премиер Никола Груевски на вечерашната средба во Пили со неговиот грчки колега Јоргос Папандреу.

(16:25) Почна средбата Папандреу-Груевски>> Започна средбата меѓу македонскиот и грчкиот премиер Никола Груевски и Јоргос Папандреу.

(15:53) Средбата на Груевски и Папандреу е „добар почеток“>> -„Добар почеток“ е коментарот на грчки официјални претставници за денешната средба меѓу македонскиот и грчкиот премиер Никола Груевски и Јоргос Папандреу, јави репортерот на Макфакс.

(14:52) Почна трилатералната средба, Папандреу и Груевски се ракуваа>>-Македонскиот премиер Никола Груевски и неговиот грчки колега Јоргос Папандреу попладнево пријателски се ракуваа и разменија пригодни подароци во Пили, Мала Преспа, јави репортерот на Макфакс.

(14:25) Папандреу пристигна во Пили>> -Грчкиот премиер Јоргос Папандреу попладнето пристигна во Пили, Мала Преспа, каде треба да започне трилатерална средба на која ќе учествуваат и македонскиот и албанскиот премиер Никола Груевски и Сали Бериша.

Фотографии од средбата тука>> (за превземање на фотографиите контактирајте ја редакцијата на Макфакс 023110125, 023227127)