Свет
Топлификација не смее да исклучува згради

Во „Топлификација“ велат дека поради милионските долгови не можат да го платат ниту ланскиот мазут, а за годинашната набавка допрва ќе разговараат со рафинеријата ОКТА
ИНСТИТУЦИИТЕ И СТРУЧНАТА ЈАВНОСТ ВО ОДБРАНА НА ГРАЃАНИТЕ
Во „Топлификација“ велат дека поради милионските долгови не можат да го платат ниту ланскиот мазут, а за годинашната набавка допрва ќе разговараат со рафинеријата ОКТА
Редовните плаќачи на сметките за топлинска енергија што живеат во станбени објекти каде што 50 отсто од нивните соседи се неплаќачи никако не може да бидат исклучени од системот, бидејќи склучиле индивидуални, а не колективни договори со АД „Топлификација“, тврдат во Хелсиншкиот комитет за човекови права. Мирјана Најчевска, претседателка на Комитетот, вели дека ако се остварат најавувањата на „Топлификација“, секој оштетен граѓанин може да покрене обична граѓанска парница со која на претпријатието ќе му наплати огромна парична отштета.
– Едностраниот прекин на договорот повлекува последици. Така, сите граѓани што ќе бидат оштетени од одлуката на „Топлификација“ слободно можат да тужат и да добијат обесштетување. Но, ако корисниците се повикаат на хуманиот аспект дека во зима претпријатието не може да исклучува парно, ќе го изгубат спорот оти имаат избор да се греат и на друг начин – објаснува Најчевска.
Од „Топлификација“ најавуваат дека ќе продолжат со акцијата за информирање на граѓаните и дека ќе ги исклучуваат зградите во кои има голем број неплаќачи.
Драган Макенаџиев, раководител на финансиската служба во „Топлификација“, вели дека ако е потребно, присилно и со полиција ќе им го исклучуваат парното греење на сите што не ги плаќаат сметките.
– Претпријатието има 50.000 корисници, а 90 до 95 отсто се редовни плаќачи. Но, ако се земе предвид најлошиот случај од 10 отсто неплатени сметки, имаме загуба од милион и пол евра годишно. Поради таквите загуби ние не можеме да го платиме мазутот, кој е примарно гориво за загревање на системот. Таму каде што има 50 отсто неплаќачи, објектот ќе го исклучиме од системот. А, граѓаните што редовно плаќаат ќе ги обесштетиме преку сметката за струја. На пример, ако еден потрошувач за греење требало да плати 1.700 денари, а му дошла сметка за струја 2.000 ние ќе ја платиме разликата од 300 денари – објаснува Макенаџиев.
Долгот на граѓаните е поголем од 7 милиони евра, колку што изнесува и долгот на претпријатието кон ОКТА. Во „Топлификација“ се расположени да овозможат плаќање на долговите на рати.
Според Регулаторната комисија, „Топлификација“ нема право на вакви рестриктивни мерки бидејќи не се во согласност со Законот за енергетика. Од Организацијата на потрошувачи велат дека „Топлификација“ мора судски да си ги наплати долговите.
– Неоспорно е дека секој што должи треба и да плати за услугата. Но, начинот на кој ова претпријатие сака да го наплати долгот не е добар, ниту има законска основа. Граѓаните што редовно плаќаат сметки за парно, едноставно не може да бидат исклучени од системот поради соседите што не плаќаат – вели Татјана Тасевска од Организацијата на потрошувачи.
Од АД „Топлификација“ објаснуваат дека поради милионските ненаплатени долгови (само Министерството за образование должи 200 милиони денари)
Од претпријатието велат дека долгот мора да се наплати иако се свесни дека методот што го избрале не е најсреќното решение. Нивен следен чекор е објавувањето списоци на јавен срам со неплаќачи.
Официјално, грејната сезона почнува на 15 октомври, но во „Топлификација“ велат дека се подготвени да почнат и порано, во зависност од временските услови.
Марија Тасев
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин нема да присуствува на погребот на папата

Руската државна агенција ТАСС објави дека претседателот Владимир Путин не планира да присуствува на погребот на папата Франциско повикувајќи се на портпаролот на Кремљ, Дмитриј Песков.
„Претседателот нема такви планови“, изјави Песков пред новинарите, според агенцијата, додавајќи дека сè уште не е донесена одлука за тоа кој ќе ја претставува Русија на испраќањето во Ватикан.
Путин последен пат го посети папата Франциско во Ватикан во јули 2019 година.
Телото на папата Франциско ќе биде префрлено во базиликата „Свети Петар“ в среда наутро во 9 часот, објави Ватикан.
Неговото тело моментно е положено во ковчег во капелата на Каса Санта Марта, каде што живеел за време на своето 12-годишно папство.
Ватикан денес објави дека погребот на папата Франциско ќе се одржи в сабота во 10 часот на плоштадот Свети Петар. Тој ќе биде погребан во базиликата „Света Марија Голема“ во Рим.
На последното збогување ќе присуствуваат стотици илјади верници, како и странски лидери, како што се американскиот претседател Доналд Трамп, францускиот претседател Емануел Макрон и украинскиот претседател Володимир Зеленски.
Свет
Недостиг на лекови во Газа: ОН предупредува на катастрофа

Палестинските пациенти во Газа се во сè полоша ситуација поради израелската блокада, а недостигот од клучни лекови и медицински потрошен материјал доведува многу животи на работ на смртта.
Затворањето на граничните премини од 2 март ги исцрпе болничките резерви на основни потреби создавајќи ситуации опасни за животот за сите на кои им е потребна терапија – од хронични болести до повреди од војната.
Министерството за здравство на Газа постојано предупредува на влошување на кризата поради недостиг на лекови, што дополнително ги оптоварува веќе слабите капацитети на здравствениот систем.
Во разговор за агенцијата „Анадолијањ, Ала Хилес, директор на Одделот за болничка фармација при Министерството за здравство на Газа, изјави дека повеќе од 37 проценти од основните лекови и најмалку 59 проценти од медицинските потрошни материјали моментно не се достапни во магацините на Министерството.
„Овој недостиг директно влијае на сите медицински услуги вклучувајќи ги ракот и крвните заболувања“, рече Хилес додавајќи дека 54 проценти од лековите за овие болести се исто така недостапни.
Тој исто така истакна дека повеќе од 24 проценти од лековите што им се потребни на пациентите на дијализа во моментот не се достапни.
Хилес изјави дека Министерството редовно поднесува извештаи за недостиг на лекови до релевантни меѓународни организации, вклучувајќи ги Меѓународниот комитет на Црвениот крст и Светската здравствена организација.
Во оваа криза Министерството за здравство се обидува да најде медицински алтернативи за ублажување на последиците од недостигот и намалување на компликациите за пациентите. Но, Хилес предупредува дека овие алтернативи не се секогаш соодветни и дека менувањето на лековите може да претставува дополнителен ризик за здравјето на пациентите.
Обединетите нации во понеделникот одбележаа 50 дена откога Израел целосно ја блокира хуманитарната помош за Газа предупредувајќи на брзо влошување на ситуацијата, што сериозно ги загрозува животите на цивилите.
„Денес, се навршуваат 50 дена откога израелските власти целосно го запреа протокот на какви било резерви во Газа“, изјави портпаролот на ОН, Стефан Дужарик, на прес-конференција.
Повикувајќи се на Канцеларијата на ОН за координација на хуманитарни прашања (OCHA), Дужарик нагласи: „Од почетокот на март на ниеден камион што носи храна, гориво, лекови или други потребни работи не му е дозволено да влезе во Газа, без разлика колку се важни овие резерви за опстанокот на луѓето“.
Свет
Помошникот на Путин: Мировниот план на Трамп за Украина ќе влезе во руските учебници

Планот на американскиот претседател Доналд Трамп за прекин на војната во Украина ќе биде вклучен во руските училишни учебници, изјави Владимир Медински, помошник на претседателот на Руската Федерација и еден од авторите на учебникот и претседател на Руското военоисториско друштво, пишува „Данас“.
„Извонредните напори што новата американска администрација ги вложува за да се обиде разумно да го реши конфликтот во Украина и, генерално, неверојатните трансформации во американската внатрешна политика на кои сега сме сведоци, несомнено ќе се појават на страниците на учебниците за руската и за светската историја кога ќе биде подготвено следното издание“, објави „Данас“.
Тука можеме да кажеме дека Трамп, дефинитивно, влезе во историјата“, рече Медински, пренесува „Данас“ за агенцијата ТАСС.
Тој додаде, како што е наведено, дека нема право да коментира за политиката на американскиот претседател, но истакна дека како набљудувач и историчар може да каже: „Живееме во историска ера“.
Пред тоа, како што напишаа „Волстрит џурнал“ и „Блумберг“, администрацијата на Трамп достави предлози до Украина и до претставниците на Европската Унија за прекин на војната. Според планот, Киев треба да го признае Крим како руски и да одбие да се приклучи на НАТО, според овој медиум.
Во исто време, објави „Данас“, непријателствата ќе бидат запрени по линијата на контакт, а Русија ќе ја предаде нуклеарната централа „Запорожје“ под американска контрола.
Се очекува украинските власти да одговорат на овие предлози на состанок во Лондон на крајот од неделата.
По тоа, според „Волстрит џурнал“, како што објави „Данас“, специјалниот пратеник на американскиот претседател за Блискиот Исток, Стив Виткоф, би можел да ја посети Русија четврти пат за да разговара за планот договорен со Украина и ЕУ со рускиот претседател Владимир Путин, објавува „Москва тајмс“.
Условите на мировниот договор предложени од Соединетите Американски Држави се блиски до барањата на Русија. Претходно, Путин побара од Киев да ги предаде регионите Луганск, Донецк, Запорожје и Херсон на Москва во рамките на нивните административни граници и да одбие да се приклучи на НАТО, се вели во текстот.
Тој исто така инсистира, како што е наведено, на одржување претседателски избори во Украина нагласувајќи дека руската страна не може да потпише мировен договор со нелегитимниот претседател Володимир Зеленски.
Во исто време, САД предупредија дека, доколку мировните преговори не успеат, Вашингтон ќе се повлече од преговарачкиот процес, пишува „Данас“.