Одделот за внатрешна контрола, криминалистички истраги и професионални стандарди при Министерството за внатрешни работи во соработка со DCAF – Женевскиот центар за управување со безбедносниот сектор на 05.03.2025 организираа тркалезна маса на тема „Полициски интегритет – улоги и одговорности на полициските менаџери“.

Според Ивица Станковски, помошник на министерот во Одделот за внатрешна контрола, криминалистички истраги и професионални стандарди, кој го отвори настанот, главен предизвик за Министерството за внатрешни работи, како клучна институција за откривање на случаите поврзани со корупција, како и нејзино спречување, е навременото детектирање и идентификација на ризиците од корупција, како и навременото откривање, документирање и докажување на коруптивните однесувања во кои биле вклучени овластени службени лица.

На тркалезната маса, на која присуствуваа помошниците на министерот, началниците на секторите за внатрешни работи и началниците на регионалните центри за гранични работи, посебно беше ставен акцент на улогата која ја има раководниот кадар во министерството, кој треба да претставува пример за тоа што значи етичко постапување и кој, преку одржување на обуки и други форми на делување, треба да се стреми кон јакнење на интегритетот на работниците.

Тркалезната маса, исто така, означи важен чекор во нашите напори за подобрување на етичките стандарди и професионализмот во полицијата. Во таа насока, во периодот кој следува (2026-2028), заедно со DCAF ќе биде изработен нов план за професионален интегритет во кој ќе се потврдат постоечките или ќе се утврдат и други ризични области во постапувањето на работниците од МВР, кои се најмногу изложени на ризици од коруптивно или друго незаконско постапување.

Во изработката на новиот план за професионален интегритет активно ќе бидат вклучени сите раководители во МВР, кои воедно ќе бидат надлежни за спроведување на планот.

Обвинителството донесе наредба за истражна постапка против пет лица, во случајот со родилката од Куманово која и’ го дала своето бебе на брачна двојка, а потоа, според нејзината пријава, тие не сакале да и’ го вратат назад.

Според описот во диспозитивот на наредбата постои основано сомнение дека осомничените сториле кривично дело „Трговија со дете“.

Обвинителството сподели детали за случајот, објаснувајќи дека кон средината на минатата година, две од осомничените и непознато машко лице, заедно и по претходен договор со осомничената која била бремена со своето седмо дете и се наоѓала во тешка финансиска состојба презеле дејствија со цел да извршат незаконито посвојување на нејзиното новороденче за сума од околу 5000 евра.

Двете од кои едната била евидентирана како згрижувач на деца, во повеќе наврати финансиски ѝ помагале на осомничената трудница исплаќајќи ѝ пари за месечни трошоци во висина од 250-270 евра, а за да ја следат здравствената состојба на бебето ѝ плаќале и ѝ организирале лекарски гинеколошки прегледи во Куманово и Скопје.

Во меѓувреме ја запознале со осомничениот брачен пар кој требало незаконски да го посвои детето. По породувањето, брачниот пар ја однеле на нотар каде потпишала изјава со која го признава првоосомничениот за татко на новороденчето и му го дава старателството, доброволно оставајќи го на чување, воспитување и издржување. Веднаш потоа осомничениот брачен пар ѝ исплатил 4000 евра, а подоцна кога го побарала детето да ѝ го вратат, првосомничениот ја одбил нудејќи ѝ уште 1000 евра и укажувајќи ѝ дека со потпишаната изјава таа веќе се откажала од него, информираа од Обвинителството.

Имајќи ги предвид околностите и тежината на стореното дело, јавниот обвинител на Основното јавно обвинителство за гонење на организиран криминал и корупција на судијата на претходна постапка при Основниот кривичен суд Скопје му предложи мерки кои судот ги прифати и определи мерка притвор за сопружникот и родилката, додека на останатите три лица им определи мерка куќен притвор.

Министерот за надворешни работи и надворешна трговија, Тимчо Муцунски, денес учествуваше и се обрати на панел-дискусијата „Евро-атлантската безбедносна динамика: Предизвици за НАТО, Европа и процесот на проширување кон Западен Балкан“, организирана од Фондацијата Конрад Аденауер (КАС) во соработка со Филозофскиот факултет при Универзитетот „Св. Кирил и Методиј“ – Скопје. Настанот го означи и официјалното отворање на Регионалната школа за безбедност 2025, која традиционално обединува млади професионалци, студенти и експерти за размена на искуства и дискусија за актуелните безбедносни предизвици.

Во своето обраќање, министерот Муцунски ја истакна важноста на меѓународната соработка и стабилноста на Западен Балкан, особено во контекст на актуелните глобални и регионални безбедносни предизвици. Потсети дека оваа година се одбележуваат пет години од членството на Северна Македонија во НАТО, нагласувајќи ја посветеноста на државата во зајакнувањето на колективната одбрана, стабилноста на регионот и поддршката за Источното крило на НАТО.

Министерот ја реафирмираше континуираната поддршка на Северна Македонија за Украина,. Тој нагласи дека во време на зголемени безбедносни предизвици, неопходно е да се гради отпорност кон хибридни и сајбер-закани, дезинформации и економска принуда, при што државата веќе презема значајни чекори, вклучувајќи го и усвојувањето на Националната стратегија за сајбер безбедност (2025-2028).

Безбедноста и стабилноста на Северна Македонија е нераскинливо поврзана со стабилноста на целиот Западен Балкан. Во тој контекст, министерот истакна дека регионалната соработка и европската интеграција се патот кон одржлив мир и просперитет.

Во своите воведни излагања, претставниците на организаторите – Даниел Браун од Фондацијата Конрад Аденауер, Катерина Јакимовска од Центарот за европски студии Вилфрид Мартенс во Брисел и проф. д-р Оливер Бакрески, декан на Филозофскиот факултет, ја потенцираа важноста на ваквите настани за подигнување на свеста кај младите лидери и нивната улога во градење стабилни и безбедни општества.