Црна хроника
Поднесен обвинителен акт за 11 лица во предметот познат како „Удар”
Основното јавно обвинителство за гонење на организиран криминал и корупција до Основниот суд Скопје 1 – Скопје поднесе Обвинителен акт, како и предлог за продолжување на мерките притвор, куќен притвор и за определување на мерки на претпазливост против 11 лица, обвинети за криумчарење мигранти, лосторничко здружување, лихварство и друго.
Со обвинението, лицето Д.А. првообвинет се товари дека сторил кривично дело „Злосторничко здружување”, кривично дело „Изнуда”, кривично дело „Лихварство“ кривично дело „Криумчарење мигранти” и кривично дело „Организирање на група и поттикнување на извршување на делата трговија со луѓе, трговија со малолетно лице и криумчарење мигранти”.Лицата Н.И., С.И., Б.И. и Ш.И. се обвинети дека сториле кривично дело „Злосторничко здружување”, „Изнуда” и „Лихварство”..На обвинетите А.А., Н.А, С.М., Г.И. и Џ.И. им се става на товар дека сториле кривично дело –„Криумчарење мигранти” и кривично дело „Организирање на група и поттикнување на извршување на делата трговија со луѓе, трговија со малолетно лице и криумчарење мигранти”.Единаесетиот осомничен М.С. е обвинет за сторено кривично дело – „Злосторничко здружување” и кривично дело „Злоупотреба на службената положба и овластување”.Имено, првообвинетите Д.А. и Н.И. во почетокот на 2014 година создале група за вршење на кривични дела лихварство и изнуда, на која се придружиле С.И., Б.И. и Ш.И. Во рамките на групата секој од обвинетите имал определена улога во спроведувањето на криминалниот план и извршувањето на криминалните активности организирани и координирани од првообвинетите. Групата неовластено се занимавала со давање пари на заем со усмен договор, при што искористувајќи ја тешката имотна состојба, нуждата и лекомисленоста на оштетените, обвинетите договарале несразмерна имотна корист со намера да прибават противправна имотна корист за себе. Групата со сила и сериозна закана ги присилувала оштетените да сторат дејствија на штета на својот имот.Првообвинетиот Д.А. со цел да прибави имотна корист, со неговите синови А.А. и Н.А. создале група за вршење кривично дело криумчарење мигранти, при што од мај до октомври 2015 година, обвинетите по претходен договор ги прифаќале мигрантите во повеќе наврати откако ќе влезеле на територијата на Република Македонија и ги превезувале со товарни и патнички моторни возила до договорената локација.Во текот на 2015 година првообвинетиот Д.А. создал уште една група за вршење на кривично дело „Злоупотреба на службената положба и овластување”, во која прифаќајќи го криминалниот план станале припадници обвинетиот М.С. и НН лице. Првообвинетиот ги организирал, договарал и координирал криминалните активности на обвинетиот М.С. и НН лицето, а тие ги извршувале. Во својство на службено лице М.С, искористувајќи ја својата службена положба и овластување ги пречекорил границите на своето службено овластување и притоа за себе прибавил противправна имотна корист во износ од 19.000 евра.Надлежниот обвинител предложи oпределената мерка притвор да биде продолжена за обвинетите Н.И., С.И, Б.И., Ш.И., А.А. и Н.А., како и мерката куќен притвор за Д.А.Исто така, надлежниот обвинител предложи да се определат мерки на претпазливост за М.С. и тоа забрана за преземање на определени работни активности кои се поврзани со кривичното дело од причина што постои основано сомнение дека обвинетиот доколку и понатаму ја извршува функцијата, би можел да превзема определени дејствија злоупотребувајќи ја својата положба и барајќи логистичка поддршка од одредени лица, а се со цел негово ослободување од кривична одговорност за кривичните дела што му се ставаат на товар, со што би го попречувал и водењето на кривичната постапка.За останатите С.М., Г.И. и Џ.И. остануваат определените мерки за претпазливост./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.