Протестите на незадоволните грчки земјоделци поради доцнењето на исплатата на субвенциите од Европската Унија денес се проширија во областа на Солун, каде што колони од трактори стигнаа до наплатната рампа Малгара и го блокираа сообраќајот на националниот автопат кон Атина. Припадници на полицијата првично го затворија пристапот до автопатот кај кружницата Малгара и не дозволија трактори да поминат, но подоцна конвојот, во придружба на полицијата, стигна до наплатната рампа и постави блокада, јавува грчкиот канал ЕРТ.

Околу 11:20 часот, правецот кон Атина беше затворен, а кратко потоа двата правци од националниот пат беа затворени.

Во исто време, има голема мобилизација меѓу земјоделците од источен Солун, кои најавија дека ќе им се придружат на своите колеги од Халкидики на заедничка блокада во среда.

Во меѓувреме, земјоделците низ целата земја ги блокираа клучните национални патишта во знак на протест поради, како што велат, високите трошоци за производство, ниските цени за купување и доцнењата во владините плаќања, објави „Јуроњуз“.

На автопатот Атина-Солун, во областа Лариса, блокадата целосно го запре сообраќајот во текот на денот, додека полицијата ги пренасочуваше возилата кон алтернативни патишта.

Земјоделските здруженија најавија дека, доколку не добијат одговор на нивните барања, протестите ќе бидат проширени.

Во неделата, за време на првиот ден од протестите на грчките земјоделци во централните и северните делови на земјата поради доцнењето во исплатата на субвенциите од Европската Унија, тројца земјоделци беа уапсени во судирите со полицијата, додека четири лица беа повредени – двајца земјоделци и двајца полицајци, објавија грчките медиуми.

Стотици земјоделци излегоа на улиците вчера, блокирајќи ги патиштата со своите трактори во неколку области во знак на протест против конзервативната влада поради проценетиот недостиг од 600 милиони евра помош од ЕУ и други исплати, пренесува Танјуг.

Доцнењето на исплатите доаѓа во време на истраги за скандал во кој некои земјоделци наводно фалсификувале сопственост на земјиште и добиток за да добијат земјоделски субвенции од ЕУ. Блокадите беа дополнително засилени по апсењето на неколку лица минатата недела, како дел од истрагата за милионска измама со земјоделски субвенции исплатени од грчката ОПЕКЕПЕ, надлежното тело за распределба на средствата од ЕУ.

Канцеларијата на европскиот обвинител (ЕППО) објави дека прелиминарната истрага утврдила дека 324 лица примиле вкупно 19,6 милиони евра нелегални субвенции.

Фото: ЕПА

Украинскиот претседател, Володимир Зеленски, денес изјави дека по американско-украинските разговори во Флорида, некои тешки прашања сè уште треба да се решат.

Тој соопшти дека сега заминува за Европа за да ја обезбеди поддршката од сојузниците, додека претставникот на американскиот претседател Доналд Трамп треба да отпатува во Москва и да го информира Кремљ за резултатите од преговорите.

Интензивната дипломатија продолжи во понеделник по разговорите меѓу американските и украинските претставници во голф-центар изграден од специјалниот претставник на Трамп и претприемач Стив Виткоф.

Зеленски пристигна во Париз на средба со францускиот претседател Емануел Макрон, а во вторник ќе отпатува во Ирска. Украинскиот министер за одбрана треба да биде во Брисел на разговори со НАТО. Во вторник, Виткоф се упатува кон Москва на состанок со Владимир Путин.

Киев и неговите европски сојузници сакаат Вашингтон да го промени предложениот американски мировен план, кој, според извештаите, првично ги почитувал клучните руски барања: Украина да се откаже од дел од својата територија, да ја намали големината на својата армија, да се откаже од амбицијата да се приклучи кон НАТО и да им забрани на западните сили да влезат на нејзина територија.

Киев тврди дека ова би значело капитулација и би ја оставило земјата ранлива на целосна окупација, откако Русија ја нападна Украина во 2014 година и повторно во 2022 година.

„Постојат некои тешки прашања што сè уште треба да се решат“, објави Зеленски на X, најавувајќи серија состаноци во Европа за да се разговара за заклучоците од преговорите во Флорида. „Ќе биде многу значаен ден“, рече тој.

Државниот секретар на САД, Марко Рубио, кој ги води разговорите во клубот Шел Беј на Виткоф во близина на Мајами, во неделата изјави дека Вашингтон е „реалистичен во врска со тоа колку е тешко ова, но оптимист, особено со оглед на фактот дека постигнат е напредок“.

Претседателот Макрон, кој претходно беше домаќин на разговори за можни европски „мировни сили“ во Украина по војната го потапка Зеленски по грбот на влезот во Елисејската палата.

Преговорите доаѓаат во момент на сериозна пресвртница за Киев: украинските сили губат територија на фронтот, додека земјата е потресена од најголемиот корупциски скандал од почетокот на целосната инвазија.

Шефот на кабинетот на Зеленски, кој ја предводеше украинската делегација на разговорите, поднесе оставка во петокот откако антикорупциските истражители го претресоа неговиот дом. Двајца министри беа отпуштени, а поранешниот деловен партнер на Зеленски беше прогласен за осомничен.

Трамп, кој вети дека брзо ќе ја заврши војната, изрази фрустрација што се чини дека е недостижен договор.

„Украина има некои сериозни помали проблеми“, им рече Трамп на новинарите во авионот „Ер Форс Уан“, осврнувајќи се на скандалот со корупција. Тој го повтори својот став дека и Русија и Украина сакаат да ја завршат војната и рече дека има добри шанси за постигнување договор.

Силна снежна бура во градовите во САД предизвика голем број проблеми на копнениот и во воздушниот сообраќај.

Видео од масовна и исклучително застрашувачка несреќа на повеќе возила во Индијана, САД, се шири на социјалните мрежи, а властите ги предупредуваат граѓаните да не патуваат, освен во итни случаи.

Footage of A massive and extremely terrifying multi-vehicle collision in Indiana, USA, following a heavy snowstorm, and authorities are warning citizens against traveling except in emergency cases. #Vehiclecollision #Indiana #USA pic.twitter.com/LSyTTyeNIj

— Dco Global News (@Dcoglobalnews) December 1, 2025

Поради силна снежна бура и проблеми со софтверот во САД, пријавени се 1.815 доцнења на дојдовни и појдовни летови, а откажани се 490 лета, објави синоќа американската мултинационална компанија, која обезбедува податоци за следење на летовите во реално време, Flight Hour.

Heavy snow blankets roads in Michigan as a winter storm hit the Midwestern US pic.twitter.com/SD91cjFlWg

— TRT World Now (@TRTWorldNow) November 30, 2025

Најмногу доцнења и откажувања имало на аеродромите во Чикаго, Њујорк, Бостон, Минеаполис и во Детроит, објавува Си-би-ес.

Авиокомпаниите исто така пријавија прекини во распоредот на летовите во текот на викендот откога Федералната администрација за авијација (FAA) им нареди на илјадници авиони „ербас A320“ од целиот свет да го ажурираат својот софтвер.

Националната метеоролошка служба издаде серија предупредувања и совети за зимска бура, со прогнози од Монтана до Охајо.

До саботата вечер повеќе од 1.400 лета беа откажани на аеродромите во Чикаго, каде што се очекуваше зимската бура да нанесе дури 25 сантиметри снег, а аеродромите во Детроит имаа повеќе од 300 одложувања на летови и десетици откажувања додека бурата се движеше низ областа.

Фото: ЕПА