Опозициската СДСМ бара оставка од членката на Државната комисија за спречување на корупцијата (ДКСК), Цвета Ристовска, поради судир на интереси по, како што велат, скандалозната одлука поврзана со директорот на АНБ, Бојан Христовски и неговата спорна диплома.

Портпаролката на СДСМ, Богданка Кузеска, изјави дека е алармантно откритието оти членката на ДКСК, која беше задолжена за овој случај и реферираше дека „сè е во ред“ со дипломата на Христовски, истовремено е предавач на Универзитетот за туризам и менаџмент во Скопје – институцијата која ја издала спорната диплома.

„Со пријава до ДКСК оспорена е диплома од Универзитетот на кој Ристовска била професорка во време кога Христовски дипломирал во рок од една година. Ова претставува уште еден основ за директен судир на интереси, што е во спротивност со Етичкиот кодекс на ДКСК, каде што јасно е наведено дека членовите не смеат да одлучуваат за предмети каде постои судир на интереси (член 9). Не смее да има ниту најмал сомнеж за конфликт на интерес кај оние што треба да се борат против конфликт на интерес“, рече Кузеска.

Според СДСМ, Ристовска требало да биде изземена од овој случај, додека ДКСК треба да биде пример, а не да остава впечаток дека штити било кого.

Партијата бара и повлекување и преиспитување на одлуката за случајот со дипломата на директорот на АНБ, како и расчистување на прашањето за евентуалните неправилности во анализата на Државниот просветен инспекторат.

Претходно вчера, од Атикорупциска објаснија дека соработката на Ристовска со Универзитетот за туризам и менаџмент – Скопје била на ниво на гостин предавач и никогаш за финансиски надомест или друг тип договорна соработка. Од тука сметаат дека не постои никаков судир на интерес бидејќи нема никаква поврзност со наведниот универзитет.

Нејзината фотографија беше пред два дена избришана, па повторно вратена назад на страната на Универзитетот во составот на универзитетскиот наставен кадар.

Европскиот Фронт изразува револт и огорченост поради, како што велат, срамните и неодговорни изјави на Претседателот на Собранието, Африм Гаши, во врска со статусот на албанскиот јазик во Република Северна Македонија.

Тврдењето на Гаши дека единствениот службен јазик во земјата е македонскиот, а дека албанскиот јазик е „преведен јазик,“ за оваа партија претставува не само отворена лага, туку и тежок чин на предавство кон албанскиот народ, историјата и тешко стекнатите права.

„Шокантно е, но не и изненадувачки, што Гаши – личност избрана за да служи како марионета во највисоката хиерархија на државата – може да падне толку ниско, достигнувајќи ниво на самопонижување кое дури и најжестоките анти-Албанци не би се осмелиле да го допрат. Овој срамен чин на подаништво и предавство покажува не само недостаток на интегритет, туку и подготвеност за поткопување на уставните принципи на оваа држава само за да ја зачува својата позиција. Да го потсетиме Гаши за некои непобитни факти: Амандманот V од Уставот јасно го дефинира албанскиот јазик како службен јазик покрај македонскиот. Законот за употреба на јазиците понатаму го консолидира користењето на албанскиот јазик како службен во сите сфери на јавниот живот. Во пракса, албанскиот јазик е составен дел од институционалната, културната и општествената структура на нашата земја – реалност која не може да биде избришана со ниту еден чин на сервилност“.

Според Европскиот фронт, со негирање на овие вистини, Африм Гаши не само што го навредува албанскиот народ, туку ја делегитимира и функцијата кој ја има.

Како Претседател на Собранието, како што појаснуваат, неговата должност е да го брани Уставот, да ја зачува меѓуетничката хармонија и да дејствува во интерес на сите граѓани – а не да предизвикува поделби, да сее раздор и да го намалува достоинството на втората најголема етничка заедница во земјата.

Ова, велат од Европскиот фронт е предавство од големи размери.

„Зборовите на Африм Гаши звучат како реторика на оние кои историски настојувале да ги маргинализираат Албанците, да го избришат нашиот идентитет и да ги потценат нашите придонеси во ова општество. Неговите постапки ги предаваат жртвите на генерациите Албанци кои се бореле за еднаквост, претставеност и почит во оваа држава. Африм Гаши не претставува никого освен себеси и тесните интереси на оние кои го поставиле на оваа позиција. Тој не е глас на албанскиот народ и не ги отелотворува нашите вредности, гордост или аспирации.
Африм Гаши ја премина границата која ниту еден Албанец не ја преминал. Историјата ќе го памети ова предавство, а албанскиот народ нема да го прости“.

Бараат негова итна оставка од функцијата Претседател на Собранието.

„Тој ќе остане срам за нашиот народ, за нашата историја“, потенцираат од Европскиот фронт.

Две нови „Роса школи за доење“ се отворија денес во рамки на општите болници во Струга и во Кавадарци, благодарение на донацијата од „Пивара“ – Скопје и „Coca-Cola“, преку брендот „Роса“, а во соработка со Министерството за здравство. Целта на школите е да им помогне на младите родители во справување со предизвиците од нивните нови животни улоги. Во новите модерно опремени школи за доење во Струга и Кавадарци сите нови и идни мајки ќе добијат бесплатна стручна помош, совети и соодветна едукација за процесот на доење и за родителството воопшто.

Ова е дел од долгорочната иницијатива на „Роса“ за поддршка на новите родители, која од 2018 година се спроведува заедно со Министерството за здравство и во рамки на која досега се отворени 9 школи за родителство и 8 школи за доење во повеќе градови низ земјава.

„Пивара Скопје“ заедно со Министерството за здравство и во 2025 продолжува со оваа иницијатива, со цел унапредување, промоција и поддршка на доењето.

„Исклучително сме горди што овој проект бележи успех уште од самиот почеток, со отворањето на првата школа во 2018, па сѐ до денес. Секое отворање нова „Роса“ школа за доење ни носи особена радост и како компанија, бидејќи токму тоа ја отсликува нашата посветена грижа и поддршка за правилна нега на најмалите и обезбедувањето неопходна едукација за новите родители, но и мене лично како родител кој ја разбира важноста на поддршката во таков чувствителен период“, вели Душан Митрев, генерален директор на Пивара Скопје. Според него, оваа иницијатива има за цел „да создаде здрави основи за идните генерации и е пример како со заедничка посветеност може да се поттикне културата на поддршка и солидарност во нашето општество“.

Министерот за здравство, Арбен Таравари, смета дека ваквите иницијативи се многу значајни, при што ја истакна одличната соработка со Пивара Скопје.

„На одделот за гинекологија и акушерство во Општа болница Струга и Општа болница Кавадарци, во соработка со Пивара Скопје, се опремени посебни простории каде штотуку породените мајки и идни родители ќе имаат можност, со поддршка од медицински лица, да се информираат за важноста и придобивките од доењето. По тој повод сакам да ја истакнам одличната соработка со Пивара Скопје, како општествено одговорна компанија, со чија поддршка, во рамки на втората фаза на овој проект, годинава промовираме уште две нови школи за доење во болниците во Струга и во Кавадарци. Во нив младите родители имаат можност за консултација со стручен тим – педијатар, гинеколог-акушер и патронажна сестра – за предностите на ексклузивно доење, како и за други актуелни прашања поврзани со постпородилниот период“, истакна министерот за здравство, д-р Арбен Тарвари.

За реализација на овој проект и опремување и реновирање на просторот, „Пивара Скопје“ одвојува по 1 денар од секое продадено шише „Роса“ од 1,5 и 0,5 литри.

Роса школите за доење и за родителство се клучен дел од заложбите на „Пивара Скопје“ за поддршка на заедницата. Овие школи претставуваат дел од пошироката стратегија на „Пивара Скопје“ за активно учество во унапредување на општественото здравје и благосостојба. Со посебен акцент на важноста на доењето и родителството, проектот има за цел да создаде долгорочен позитивен ефект врз заедницата.

(ПР)