Граѓанската иницијатива „Го сакам ГТЦ“ во следните три дена организира изложба на фотографии на тема „ГТЦ“ собрани преку социјалните медиуми, личните архиви на граѓаните, како и архивски стари фотографии од ГТЦ.

Ова ќе биде најголемата изложба на фотографии посветени на Градскиот трговски центар, а посетителите ќе имаат можност да видат над 300 фотографии кои датираат од почетокот на градењето на објектот кон крајот на 60-ите години на минатиот век, па се до денес.

Меѓу другото, посетителите ќе можат да видат и ретки и оригинални фотографии од ГТЦ кои по првпат ќе бидат јавно објавени, а ќе има и посебен колаж од слики од личната галерија на учесниците во изградбата на објектот. Исто така, на изложбата ќе бидат поставени и сите оние фотографии кои во изминатите денови беа испраќани од граѓаните на Скопје во рамките на конкурсот  „Го сакам ГТЦ“, организиран од страна на истоимената иницијатива.

Изложбата ќе биде поставена денес во паркот Жена – Борец и ќе започне во 16:00 часот, додека, пак, во четврток и во петок ќе биде отворена од 12:00 до 20:00.

Изложбата на фотографии „Го сакам ГТЦ“ е дел од кампањата „Излези за ГТЦ“ која има цел да ги мотивира граѓаните во Општина Центар да излезат на претстојниот референдум кој ќе се одржи на 26-ти април и на кој граѓаните на Општина Центар ќе одлучуваат за изгледот на ГТЦ. /крај/мф/ст