Американскиот државен секретар Марко Рубио ќе ја води работната група која ќе изработи предлог за безбедносни гаранции за Украина, потврди висок функционер на Белата куќа и уште еден извор запознаен со плановите за „Си-ен-ен“.

Рубио, кој во моментов ја извршува и функцијата привремен советник за национална безбедност, ќе соработува со европски советници за национална безбедност на предлог со кој би ѝ се гарантирала одбрана на Украина доколку таа се согласи на договор со Русија за завршување на војната. Прв за ова извести „Аксиос“, кој објави дека Рубио ќе ги води разговорите.

Според изворите, во следните денови ќе се одржат низа состаноци на кои ќе се разговара за можните безбедносни гаранции.

Претходно, американскиот претседател Доналд Трамп ја отфрли можноста за испраќање американски сили на украинска територија како дел од мировните планови, но не ги исклучи другите форми на американска поддршка.

„Претседателот разбира дека безбедносните гаранции се клучни за обезбедување траен мир и им наложи на својот тим за национална безбедност да координира со нашите европски пријатели, како и да продолжи соработката и разговорите за овие прашања со Украина и Русија“, изјави портпаролката на Белата куќа Каролин Левит на брифинг.

Министерството за трговија на САД објави дека ги зголемува царините на челик и алуминиум за повеќе од 400 производи, меѓу кои се и ветерни турбини, домашни апарати, тешка механизација, железнички вагони, мотоцикли, бродски мотори, мебел и стотици други производи.

Министерството соопшти дека на списокот на деривати од челик и алуминиум опфатени со секторските царини се додаваат 407 категории производи, при што на содржината на челик и алуминиум во тие производи ќе се применува царина од 50 проценти, а на преостанатата содржина ќе важи државната стапка.

Финансиските аналитичари на компанијата Evercore ISI во истражувачка белешка наведоа дека мерката се однесува на повеќе од 400 производи, чиј увоз минатата година изнесувал над 200 милијарди долари, и се проценува дека ќе ја зголеми вкупната ефективна царинска стапка за околу еден процентен поен.

Министерството со новите тарифи опфати и увозни делови за издувни системи на автомобили, електричен челик потребен за производство на електрични возила, компоненти за автобуси и клима-уреди, како и домашни апарати како фрижидери, замрзнувачи и сушари.

Одбиено барањето на Тесла

Група странски производители на автомобили го повикаа Министерството да не ги додава тие делови, предупредувајќи дека САД нема домашни капацитети за задоволување на тековната побарувачка.

Компанијата Тесла безуспешно бараше од Министерството за трговија да го одбие барањето за додавање на челични производи кои се користат во моторите на електрични возила и ветерни турбини, тврдејќи дека во САД нема достапни капацитети за производство на челик потребен за погонски склопови на електрични возила.

Новите тарифи стапуваат на сила веднаш и вклучуваат компресори, пумпи и метал.

„Денешната акција го проширува опфатот на царините на челик и алуминиум и ги затвора вратите за нивно заобиколување, поддржувајќи ја континуираната ревитализација на американската индустрија за челик и алуминиум“, порача заменик-секретарот за трговија, индустрија и безбедност Џефри Кеслер.

Производителите на челик поднесоа петиција до администрацијата да ги прошири царините со цел да ги опфатат дополнителни челични и алуминиумски автоделови.

Претседателот на САД, Доналд Трамп, вчера разговараше по телефон со унгарскиот премиер Виктор Орбан, по средбата со украинскиот претседател Володимир Зеленски и европските лидери.

Главна тема на разговорот беше блокадата на Орбан на преговорите за пристапување на Украина во Европската Унија, според извори запознаени со ситуацијата, објави „Блумберг“.

Повикот на Трамп до Орбан следеше по состанокот во Белата куќа, каде што тој разговараше со европските лидери за начините за завршување на војната во Украина. За време на состанокот, европските лидери го замолија Трамп да го искористи своето влијание врз унгарскиот премиер за да го убеди да се откаже од своето противење на кандидатурата на Украина за членство во ЕУ, велат изворите.

Украина со години се обидува да се приклучи на Европската Унија и го гледа членството како дел од поширок пакет безбедносни гаранции што би спречиле нови руски територијални претензии доколку се постигне прекин на огнот.

За време на разговорот со Трамп, Унгарија изрази интерес да биде домаќин на следната рунда разговори меѓу Владимир Путин и Зеленски, според изворите. По разговорот, Трамп ги објави своите планови за организирање самит на лидери меѓу Русија и Украина, по што ќе следи трилатерален состанок на кој и тој би учествувал. Времето и локацијата на тие состаноци сè уште не се објавени.

Фото: ЕПА