Свет
Верушевски помладиот мавтал со пиштол во кафеанска тепачка
Александар Верушевски (18), син на Зоран Верушевски, началник на оперативата во Агенцијата за разузнавање, извадил пиштол во тепачка завчеравечер во кафуле во трговскиот центар „Бисер“.
Дејан Николовски
Александар Верушевски (18), син на Зоран Верушевски, началник на оперативата во Агенцијата за разузнавање, извадил пиштол во тепачка завчеравечер во кафуле во трговскиот центар „Бисер“. Проблематичниот Александар им се заканувал на неколку лица, гости во кафулето, дека ќе ги убие. Верушевски помладиот, кој во октомври лани беше осуден за убиство во обид, по инцидентот со оружјето во рака заедно со уште две лица влегол во бело „БМВ“ и побегнал. Полициски извори претпоставуваат дека автомобилот со кој избегале е истиот во кој Верушевски помладиот беше изрешетан во нозете во јануари годинава.
Според полициските информации, инцидентот се случил во средата навечер околу еден час пред полноќ. Верушевски бил во локалот „Хепи-кафе“ на улицата Владимир Комаров во населбата Јане Сандански со уште тројца другари. Засега непознато момче се степало со Ј. Б. (23), еден од придружниците на Верушевски. Во тепачката подебелиот крај го извлекол другарот на Александар, за кој од полицијата велат дека имал видливи повреди на лицето од удари со тупаници. Револтиран од тоа, Верушевски помладиот извадил пиштол, но момчето успеало да избега. Александар нервозен се свртел кон другите гости во кафулето, го вперил оружјето во нив и почнал да им се заканува дека ќе пука. По ова тој влегол во бело „БМВ“ и побегнал. Била повикана полиција, која извршила увид на местото на настанот и ги сослушала очевидците.
Сите сведоци потврдиле дека Верушевски помладиот вперил пиштол во гостите и им се заканувал дека ќе ги убие. Полициски извори велат дека пиштолот со кој се заканувал проблематичниот син на некогашниот полициски функционер бил без документи.
МВР вчера го потврди настанот и информира дека скопската полиција интензивно трага по Александар Верушевски. Од таму велат дека кога ќе го приведат, против него ќе поднесат кривична пријава за недозволено поседување огнено оружје.
Скопскиот основен суд 2 на Александар Верушевски во октомври лани му изрече пресуда засилен родителски надзор, надзор на социјален орган и психијатриско лекување на слобода, за убиство во обид. На Верушевски помладиот, кој на судењето се бранел со тврдење дека е непресметлив, му се судеше бидејќи есента во 2003 година во дворот на детската градинка „Срничка“ во Аеродром пукал пет пати во својот врсник и сосед Игор Прибичевиќ.
Верушевски помладиот бил заедно со Александар Петровски, Мартин Атанасов, и Игор Мегланов, кои по пукањето крвнички го претепале Прибичевиќ, иако момчето имало пет огнострелни рани и обилно крвавело. Александар Петровски потоа го фрлил пиштолот со кој пукал Верушевски под паркирана камп-приколка во непосредна близина.
Но на 4 јануари годинава на улицата Анкарска во Скопје Александар Верушевски беше изрешетан во нозете кога во него со пиштол пукале три лица. Во моментот на инцидентот тогаш малолетниот Верушевски управувал бело „БМВ“, иако немал возачка дозвола
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Жителите на Бејрут на улица, во пресерт на најавата за прекин на огнот
Во пресрет на најавата за прекин на огнот, жителите на либанската престолнина Бејрут вечерва излегоа на улиците, јавува Anadolu.
Имено, според написите, израелската армија издаде нови предупредувања за напад на Бејрут, во екот на најавите за евентуално неизбежно прогласување на прекин на огнот по предлогот поддржан од Соединетите Американски Држави.
Во изјавата на социјалните мрежи, портпаролот на израелската војска Авичај Адраи рече дека цел ќе бидат и ограноците на финансиската институција на Хезболах, која има ограноци во многу региони на Бејрут.
По оваа изјава, многу жители на Бејрут ги напуштија своите домови поради загриженост дека Израел ќе изврши воздушни напади низ главниот град.
Луѓето во Бејрут излегоа на улиците и се упатија кон областите за кои сметаат дека се побезбедни. Сообраќајот во многу делови од градот е отежнат поради метеж, а многу луѓе пеш ги напуштаат областите за кои се смета дека се можни цели на напади, пренесува медиумот
Свет
Израел се согласи на примирје со Хезболах: Нетанјаху го објави условот за завршување на војната
Израелската влада вечерва на владина седница официјално ќе гласа за примирје со исламистичката група Хезболах со која војува повеќе од една година. Ова во вечерашното обраќање до јавноста го потврди израелскиот премиер Бенјамин Нетанјаху, пишуваат медиумите во регионот.
Тој рече дека ова не е крај на војната, додавајќи дека нема крај на војната додека сите Израелци кои побегнаа поради ракетните истрели на Хезболах во изминатата година не се вратат во своите домови на северот на земјата. Тој исто така рече дека Израел сега ќе се фокусира на заканата од Иран.
Нетанјаху го започна својот говор обраќајќи им се на жителите бегалци од северен Израел, велејќи дека е горд на нивната истрајност и издржливост. Тој вели дека благодарение на храброста на израелските одбранбени сили се постигнати големи успеси. Тој тврди дека акцијата на ИДФ ја одразува моќта на Израел на Блискиот Исток.
„Во Либан, Хезболах повеќе не е истиот“, рече Нетанјаху, додавајќи дека израелската армија убила високи команданти и Насрала, поранешниот лидер на Хезболах.
„Израел, исто така, ја уништи инфраструктурата на Хезболах и нападна клучни цели“, додаде тој. Тој вели дека ги гледа сите седум фронтови и поголемата слика и дека е решен да му донесе победа на Израел, пренесуваат медиумите во регионот.
Тој додаде дека времетраењето на прекинот на огнот „зависи од тоа што се случува во Либан“.
Според „Ал Џезира“, Нетанјаху рекол дека Израел има разбирање со САД, што му дозволува на Израел целосна слобода за воени операции доколку Хезболах се обиде да нападне.
„Ако Хезболах се обиде да не нападне, ако се вооружи и ја обнови инфраструктурата во близина на границата – ние ќе нападнеме. Ако лансираат ракети, ако копаат големи тунели – ќе нападнеме“, рече тој.
Нетанјаху рече дека ќе претстави детален нацрт на договорот за прекин на огнот со Хезболах до целосниот кабинет за одобрување.
Тој посочи дека договорот ќе му овозможи на Израел да се фокусира на иранската закана, додавајќи: „го менуваме пејзажот на регионот“.
Договорот вклучува ставање крај на вооруженото присуство на Хезболах долж границата јужно од реката Литани и бара повлекување на израелските трупи од јужен Либан.
Либанските власти соопштија дека либанската армија ќе мора да се распореди во регионот, познат како упориште на Хезболах – во рок од 60 дена.
Си-Ен-Ен објави дека израелски функционер рекол дека безбедносниот кабинет веќе гласал за договорот за прекин на огнот.
Регион
Тринаесетгодишно девојче паднало од шести кат од зграда во Мостар
Тринаесетгодишно девојче е во тешка состојба откако паднало од балкон на станбена зграда во Мостар.
Таа е хоспитализирана во Универзитетската клиничка болница Мостар, пренесува Klix.ba потврда од оваа здравствена установа.
Според првичните информации како што пишува медиумот тоа се наоѓа на Одделот за анестезија, реанимација и интензивно лекување.
Според неофицијални информации, девојката паднала од шести кат.
Засега не се познати околностите за нејзиниот пад, според написите.