Македонија
Студентите ќе можат да пријавуваат корупција во високото образование
Веќе од утре студентите ќе можат да пријават дека одреден професор ги уценува да купат книга, но ќе можат да ги пријават и сите други видови на корупција со која се соочуваат на факултет
Во министерството за образование, во раките на кампањата за борба против корупцијата денеска беше отворена канцеларија за превенција и борба против корупцијата, а вакви канцеларии ќе бидат отворени во студентските организации, како и на сите пет универзитети во Македонија. Отворена е и интернет страница каде студентите ќе можат да пријават корупција во високото образование.Министерството подготви протокол на кој студентот ќе може да ги внесе сите информации поврзани со корупција, овие информации ќе бидат проследени до МОН, а потоа по овие пријави ќе постапува надлежниот просветен инспекторат, внатрешната ревизија или Министерството за внатрешни работи во зависност од типот на информацијата.„Корупција во Македонија постои и кај нас и во сите земји од светот. Прашањето е како државата одговара и кои се институционалните механизми кој што се поставени за спречување на ова“ изјави министерот за образование, Никола Тодоров.До студентските лидери досега пристигнувале пријави за корупција, но студентите, според нив, се плашат да пријават вакви настани.„Досега тивко се зборуваше за овие појави, но досега студентите немаа храброст, доколку има вакви пријави да ги достават“, вели Иван Живковски од ССУПМ.„Кај нас често се пријавува дека некој од професорите ги тера студентите да купуваат книги. Само тој тип на корупција е досега пријавен“, рече Шабан Арслани од Тетовскиот државен универзитет.Канцелариите денеска ги промовираа министерот за образование и претседателите на студентските сојузи на петте државни универзитети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски: Резултатите се јасни, им честитам на победниците
Кандидатот за претседател, Стево Пендаровски на прес-конференција вечерва кажа дека резултатите се јасни и им честита на победниците.
„Резултатите се јасни и немам намера подетално да ги разлагам. Согласно резултатите досега им честитам на победниците, да им посакам успешна работа во следните четири, односно пет години. Мојот концепт за мултиетничка Македонија денеска не доби мнозинска поддршка од граѓаните. Јас сум уверен дека само таква Македонија може да биде просперитетна и демократска држава. Мојата совест е мирна, но не сум сигурен дека совеста им е мирна на оние кои тргнувајќи од тесно партиски и лични политички интереси, денеска ефективно спречија илјадници наши граѓани да го земат второто ливче и да гласаат и на претседателските избори“, рече Пендаровски.
Тој се заблагодари на сите учесници во изборниот процес и на медиумите за соработката изминатите пет години.
Македонија
ДУИ очекува над 20 пратеници: „Имаме повеќе од 30.000 гласови предност пред опозицијата“
Од 50 отсто изборјано гласачки ливчиња, имаме над 30.000 гласови разлика пред „Вреди“, изјави Шефот на Изборниот штаб на Европскиот фронт, Арбр Адеми.
„Речиси во сите општини сме во предност: Дебар 2:1, Струга повече од 2:1, Кичево 5:1, Врапчиште повеќе од 2:1. ВО предност сме и во Тетово, Гостивар, Куманово, Липково“, изјави Адеми.
Како што рече, се потврдува дека Европскиот фронт ќе стигне до над 20 пратеници.
Според резултатите објавени на страната на ДИК, од досега пребројаните гласови, Европскиот фронт на ДУИ освоил 90.151 или 16,59 отсто, додека Влен има 73.893 гласа или 13,60 проценти.
Македонија
(Видео) Левица: Имаше нерегуларности, бугарски воз, притисоци од сегашната власт и закани за отпуштање по изборите од опозицијата
Партијата Левица вечерва по затворањето на гласачите места обвини за низа нерегуларности за време на гласањето, но и покрај тоа очекува позитивен резултат од изборите. Портпаролот Амар Мециновиќ обвини за ситуации со бугарски воз, попречено гласање, притисоци од сегашната власт но и закани за отпуштања од работа по изборите од сегашната опозиција.
„Денеска видовме дека имаше многу недоследности и неправилности во текот на целиот ден. Лица што требаше да гласаат како болни и изнемоштени вчера не можеа да гласаат. Денеска имаше ситуации на бугарски возови, имаше ситуации во кои имаше изборен материјал до изборните места и имаше ситуации каде што гласањето беше попречено на моменти. Од друга страна во текот на денот забележавме и дека структури блиски до сегашната власт вршеа притисок на наши активисти и на наши истакнати членови, додека, од друга страна, и најголемата опозициска партија го вршеше овој притисок. Дури се одеше до таму да се заканува со отпуштања по изборите“, рече портпаролот Мециновиќ.
Тој потенцираше дека денес пратеници на ВМРО – ДПМНЕ еклатантно лажеле дека Левица повикува на бојкот.
„Левица веќе два дена повикуваше на одѕив. Медиумите блиски на ВМРО-ДПМНЕ констатираа дека Левица не излегла да гласа. Тоа е лага. Ние повикуваме на гласање. Ние сме најголем непријател на оваа власт која сега си заминува. Го поздравуваме одењето на власт и очекуваме позитивен резултат“, нагласи Мециновиќ.
Од нешто повеќе од половина обработени избирачи, според податоците на Државната изборна комисија, Левица добила 31.012 гласови или 6,44 отсто од досега пребројаните гласови.