Купопродажниот договорот за "ЕСМ дистрибуција" бил правен документ и од јавноста ќе се крие како деловна тајна, иако неговата финална содржина Владата и купувачот ќе ја договораат во преговори

ВЛАДАТА КРИЕ ЗА ШТО ЌЕ ПРЕГОВАРА СО НАЈПОВОЛНИОТ ПОНУДУВАЧ

Купопродажниот договорот за "ЕСМ дистрибуција" бил правен документ и од јавноста ќе се крие како деловна тајна, иако неговата финална содржина Владата и купувачот ќе ја договораат во преговори

Содржината на купопродажниот договорот за "ЕСМ дистрибуција" од јавноста ќе се крие како деловна тајна меѓу Владата и купувачот. За јавноста било доволно што од почеток била информирана за постапката на продажба на компанијата и за критериумите по кои ќе се оценуваат понудите. Во оваа насока се движеа одговорите на претставниците на Министерството за економија на вчерашната трибина на "Транспарентност Македонија" за "Тендерските процедури за приватизација на ЕСМ дистрибуција". Според нив, Владата имала мандат да преговара со најдобриот понудувач околу купопродажбата на компанијата и да склучи договор со него, бидејќи преговорите не биле инструмент за избор на најповолниот понудувач, туку начин на договарање на правата и обврските на договорните страни.

"Договорот не може да биде јавен документ. Како и учесниците на тендерот, и ние имаме обврска за доверливост. Процесот и тендерските критериуми се јавни, но договорот претставува правен документ и како таков не може јавно да се објави", вели помошник раководителот на Секторот за енергетика во Министерството за економија Симон Узунов и при тоа одби да одговори на прашањето кој ќе ја сноси одговорноста доколку Владата сепак склучи штетен купопродажен договор.

Како што се случи и при продажбата на Телеком, и приватизацијата на ЕСМ ќе заврши со директни преговори на Владата со купувачот, но овој пат разликата била во тоа што постои законска регулатива според која пазарот е либерализиран, а содржината на договорот нема да влијаела на позицијата на компанијата на пазарот.

Владините преставници одбија и да откријат кои елементи од веќе подготвениот купопродажен договор смеат да се менуваат во преговорите на Владата со најдобриот понудувач, како и кој е критериумот за Владата да се изјасни дека преговорите ги прекинува зашто купувачот претерал со барањата и да го дискваификува.

(Т.Ј.)

***

Договорот за продажба на ЕСМ мора да биде јавен

Купопродажниот договор за ЕСМ Дистрибуција претставува јавен документ бидејќи компанијата се продава преку јавен тендер. Ова за "Вест" вчера го изјави професорот за управно право Борче Давитковски од Правниот факултет во Скопје.

"Мислам дека документот треба да биде достапен за јавноста. Треба да се знае кои се обврските и правата на сопственикот на компанијата, купена преку тендерска постапка со јавно објавени критериуми. Граѓаните ги интересира дали во договорот има штетни одредби во однос на нивните права, сигурно не се интересираат за некои безбедносни елементи", вели професорот Давитковски и дополнува: "Ако е правен документ, тогаш тој се склучува на основа на чисто бизнис релации и нема потреба да се распишува јавен тендер. Во таков случај воопшто нема потреба јавноста да биде запознаена со целата постапка и критериумите на договорот".