Скопје
На 26-ти април ќе се организира референдум за ГТЦ
Со 12 гласа „За“ и 11 „Воздржани“, Советот на општина Центар донесе одлука за распишување референдум за задржување на автентичниот изглед на Градскиот трговски центар.
Со 12 гласа „За“ и 11 „Воздржани“, Советот на општина Центар донесе одлука за распишување референдум за задржување на автентичниот изглед на Градскиот трговски центар.
Советниците од коалицијата предводена од СДСМ гласаа за тоа на граѓаните на Центар да им се даде право самите да одлучат за изгледот на ГТЦ, додека советниците на коалицијата предводена од ВМРО – ДПМНЕ гласаа воздржано.
„Дали сте за тоа да се задржи автентичниот изглед на фасадата на Градскиот трговски центар?“, ќе биде прашањето за кое ќе одлучуваат жителите на Центар, на 26-ти април.
За денешната седница имаше голем интерес од невладиниот сектор и од жителите на Центар, кои го следеа текот на седницата, во салата на Советот на Центар.
Во име на граѓанската иницијатива “Го сакам ГТЦ“ и во име на присутните претставници на граѓанскиот сектор, говореше Даница Павловска, која посочи дека референдумот за ГТЦ ќе биде прв организиран во град Скопје.
„ГТЦ е културно наследство, а референдумот е најдемократски начин и механизам за третирање на проблемите и интересите на граѓаните. Демократичноста е во прашање, со ова граѓаните стануваат свесни за својата моќ“, рече Даница Павловска.
Градоначалникот на општина Центар, Андреј Жерновски, кој до Советот ја поднесе предлог одлуката за распишување референдум за ГТЦ, рече дека ова е историски ден за општина Центар и се надева дека ова ќе стане пракса и во другите општини.
Осумдесет проценти од граѓаните во Центар ја поддржуваат можноста за референдум и веруваат дека и тие треба да бидат вклучени во одлучувањето. Поддршка за овој референдум има и од 17 невладини организации.
„Референдумот ги обединува граѓаните, ја зголемува довербата во институциите и е коректив на одлуките на властите. Да ги оставиме партиските интереси, политиката не треба да доминира, оваа одлука е во интерес на граѓаните. Го сакам ГТЦ“, изјави Жерновски.
Координаторот на советничката група предводена од СДСМ, Игор Алаџајков, ги повика сите советници да дадат шанса ГТЦ да остане во своето автентично руво.
„На ГТЦ му треба обнова и реконструкција, но не со ефтин кичерај и стиропор, туку со енергетски ефикасна фасада. Имаме историска шанса на граѓаните да им дадеме можност сами да одлучуваат“, рече Алаџајков.
Координаторот на советничката група на ВМРО – ДПМНЕ, Томислав Лазаров рече дека не се против одржување на референдум, но праша дали општина Центар има право да си го припише ГТЦ.
„Средствата за изградба на ГТЦ биле собрани од повеќе државни фирми и тоа е интерес на цела држава. Сега во ГТЦ нема функционалност. За ова, треба да се одлучува на повисоко и пошироко ниво“, рече Лазаров.
Градоначалникот Жерновски кажа дека ова право е предвидено во Законот за градење, каде што стои дека Советот на општините во град Скопје, со одлука може да го утврдат изгледот на некоја фасада. Посочи дека и градоначалникот на Скопје, Коце Трајановски, денеска ја поздравил одлуката за распишување референдум, бидејќи и самиот рекол дека тоа е “нивно демократско право“.
„Зошто за најголемиот буџетски проект Скопје 2014, кој чинеше наместо првичните 80 милиони – половина милијарда евра, одлуките ги носеше Советот на општина Центар? ГТЦ е на територија на општина Центар. Јас упатив покана до градоначалникот Трајановски да се приклучи на оваа иницијатива, но досега нема одговор. Нека одлучат граѓаните како ќе изгледа ГТЦ“, одговори Жерновски.
Сашо Трпески, советник од редовите на ВМРО – ДПМНЕ, рече дека и тој е за изјаснување на граѓаните, но заедно со останатите, оние кои дале средства за изградба на ГТЦ.
Томислав Лазаров од ВМРО – ДПМНЕ, праша колку ќе чини референдумот, на што градоначалникот Жерновски одговори дека ставката е предвидена во буџетот и ќе чини помеѓу 2,5 и 3 милиони денари.
Даница Павловска посочи дека ГТЦ е изграден од средствата за солидарност по земјотресот на Скопје.
Референдумот ќе се смета за успешен ако за него гласале мнозинството од вкупниот број граѓани, но на гласање треба да излезат половина од вкупниот број граѓани запишани во изводот од Избирачкиот список на општина Центар.
Одлуката на референдумот е задолжителна, доколку на референдумот се донесе одлука да се задржи сегашниот изглед на фасадата на ГТЦ.
Советот на општина Центар е должен, во рок од 60 дена од објавување на резултатите од референдумот, да донесе одлука за утврдување на изгледот на фасадата на ГТЦ, во согласност со одлуката на референдумот./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Извршена ларвицидна дезинсекција во општина Илинден
Во согласност со програмата за спроведување општи мерки за заштита на населението од заразни болести за 2024 година, Општина Илинден во координација со екипите на ДТУ ТОКСИ ВЕТ – Скопје, реализира прскање против ларви од комарци на целата територија на општината.
Во согласност со елаборатот за спроведување на превентивна дезинсекција за спречување и искоренување вектор преносливи заболувања, во овој период се врши ларвицидна дезинсекција на водни површини за уништување ларви од комарци.
Со третирањето се опфатени сите водни површини на отворените одводни канали (главни, секундарни и терцијални), речното корито на Сува Река и вештачката акумулација во Бучинци, на вкупна површина од 50 хектари.
Дезинсекција се врши со еколошко средство, кое е безопасно за здравјето на луѓето, одобрено и пуштено во промет од Бирото за лекови.
Скопје
Оваа сабота во „Јавна соба“: базар на втора рака облека, накит, книги и детски играчки
Трендот во големите градови и културата е рециклирање и рекреирање веќе на постојното. Колку понапредни општествата, толку повеќе се рециклира, се води сметка за животната околина и сè погласна и популарна е second hand модата.
Скопје полека ја прегрнува оваа нова филозофија, но колку е поголема и подобра понудата – толку повеќе ќе има интерес од страна на потрошувачите и ќе има поголем успех.
Оваа сабота (11 мај) во „Јавна соба“, под слоганот „Second hand е подобро од ново“, почнува базарот, каде што посетителите може да си набават добро сочувано парче гардероба, чевли, накит, книга или можеби некоја играчка. Ќе има многубројни штандови со разноразни парчиња, кои дефинитивно заслужуваат втора шанса.
И сето тоа во еден забавен, опуштен и пријателски амбиент, еве неколку причини зошто е подобро да купувате работи од втора рака:
– заштеда на пари;
– помагање на животната средина и зачувување на природните ресурси;
– поддржувате локален и мал бизнис;
– развивате уникатен стил;
– имате чувство како да сте во потрага по богатство.
Скопје
Посебен режим на сообраќај во Скопје поради денот на полицијата
Министерството за внатрешни работи ги известува граѓаните на Скопје дека поради одржување на настан за одбележување „7 Мај – Ден на полиција“, во периодот од 08.00 до 18.00 часот за сообраќај ќе биде затворен бул.„АСНОМ“ на потегот од крстосница со бул.„Србија“ до крстосница со бул.„Февруарски поход“. Единицата за безбедност на патниот сообраќај при СВР Скопје ќе преземе мерки за пренасочување на сообраќајот.
Секторот за внатрешни работи Скопје апелира до сите учесници во сообраќајот да се почитуваат наредбите кои ќе ги даваат полициските службеници.