Министерот за здравство Никола Тодоров во неделата претстави нови мерки и укажување доставени до јавните здравствени установи во земјата, од кои очекува зголемување на конкуренцијата меѓу дистрибутерите и производителите на лекови и значителни намалувања на цените на лековите.

Со ова, како што рече Тодоров, би се креирале и заштеди во јавното здравство, односно наменско и рационално користење на финансиските средства, што пред сé се однесува на цитостатската терапија, кои се и најскапите лекови, потоа на хормонската терапија и антихормонските лекови (ароматаза инхибитори, LHRH агонисти и антагонисти) и бисфосфонатната терапија.

Новите мерки што ги презема министерството за здравство во форма на укажувања до јавните здравствени установи, во прв ред се поврзани со спроведувањето на постапките за јавни набавки од страна на здравствените установи. Нивната цел, како што објасни министерот Тодоров, ќе биде унапредување на системот за јавни набавки, елиминирање на влијанието на човечкиот фактор. но и зголемување на конкурентноста на пазарот и доследно спроведување на одредбите од Законот за заштита на конкуренцијата.

„Укажувањата се набавките да се вршат како целосно електронска набавка, која ќе заврши со електронска аукција, а не како досега во хартиена форма која завршува со електронска аукција. На овој начин сакаме да го минимизираме влијанието на човечкиот фактор, особено во административниот дел на постапката за примање и чување на документација, редоследот на предавање на понуди и слично“, рече Тодоров.

Друга новина во работата на јавните здравствените установи во Македонија е произлезена од сознанието дека досега најголем број случаи економските оператори за ист предмет на набавка понудувале исти цени и во тој случај установите за предметот на набавката склучувале два или повеќе договори меѓу економските оператори коишто понудиле исти цени. Но постојат и случаи кога на електронските аукции никој не извршил наддавање, односно намалување на почетно понудената цена.

„Отсега изборот на економскиот оператор ќе биде одлучен со жрепка, во присуство на сите економски оператори или нивни претставници, доколку набавката е спроведена во хартиена форма и на аукцијата немало наддавање. Доколку економските оператори одбијат или не дојдат, жрепката ќе се изврши пред Комисија од пет лица вработени во договорниот орган, за што задолжително се води записник за текот на жрепката. Оваа мерка е целосно во смисла на посилна имплементација на Законот за заштита на конкуренцијата, па поради тоа, би ја повикал Комисијата за заштита на конкуренцијата да во целост ги разгледа досегашните пракси на делење на договорите на повеќе економски оператори и ги преземе сите активности согласно закон“, објасни министерот за здравство

Според Тодоров, откако набавката ќе биде целосно електорнска, а на аукцијата немало наддавање, договор ќе се склучи со оној економски оператор што прв поднел понуда, во согласност со системот за електронски јавни набавки.

„Сакам да нагласам дека монополското здружување е забрането и согласно Законот за заштита на конкуренцијата и согласно Кривичниот законик на Република Македонија. Конечно, во договорите коишто ќе бидат склучени со избраните економски оператори, треба да биде ставена клаузула, според која во случај максималната цена биде намалена под ниво на понудената цена, во тој случај како цена на договорот ќе биде новата намалена максимална цена“, рече Тодоров.

За таа цел една од најновите укажувања и мерки до здравствените установи е и упатството во тендерите да се става објаснување што значи монополско здружување и како и каде е тоа се санкционира./крај/со/мф