Македонија
Угриновски: Службите повеќе ми даваа информации, отколку јас на нив (опширна верзија)
Претседателот на Сојузот на титови леви сили, Слободан Угриновски, за кого што Комисијата за лустрација донесе заклучок дека соработувал со тајните служби под псевдонимот „Ле Корбизие“
Претседателот на Сојузот на титови леви сили, Слободан Угриновски, за кого што Комисијата за лустрација донесе заклучок дека соработувал со тајните служби под псевдонимот „Ле Корбизие“ не ги признава и ги негира доказите на, како што ја нарече – „Комисијата за лустери“ и вели дека одговара само пред законите на СФРЈ и СРМ. „Оваа комисија за мене е нелегитимна и јас го признавам само судот на мојата партија, односно судот на сојузот на комунистите на Југославија и Македонија како и на сојузот на титови леви сили“ рече Угриновски.
Според доказите на Комисијата, Угриновски соработувал со службите во седумдесеттите години , кога бил претседател на Сојузот на студенти. Тој признава дека за време на неговиот работен век, како студентски раководител имал разговори со претставници на јавната и државната безбедност за прашања како за домашните, така и за странските студенти.
„Можам да кажам дека претставниците на службите што ме контактирале мене како претседател на сојузот на студенти на Македонија, повеќе мене ме информирале за актуелните состојби и настани во за и околу студентите и државата отколку, пак, што јас сум давал информации. Значи тие повеќе ми служеле мене отколку јас на нив со податоците, информациите што ми ги доставувале“ вели Угриновски.
Водачот на Титовите леви сили не знаел дека неговите службени контакти биле третирани како соработнички и дека за него се водело досие, како соработник.
„Не постои никаква ниту усна, ниту писмена изјава од мене, ниту, пак, лица или организации за коишто сум давал изјави или, пак, предизвикал последици по нив, а не, пак, да сум примал одредени парични средства, напредувал во службата или некој обвинил за некое дело. Мене не ми било познато дека моите службени контакти ги третирале како соработнички, како што сега гледам, и дека се водело досие за мене како под наводници соработник и сум изненаден од истото, но не сакам да навлегувам во процедурите и во нивните тогашни законски права, должности, обврски на луѓето кои што контактирале со мене“ додава Угриновски.
Тој утрово бил во Комисијата за лустрација каде ги разгледал трите документи коишто ги имала комисијата за него и се уверил дека тие не се релевантни. „Од доказите располагаат само со еден допис од УДБК, во чии прилог се доставени, барање од нивни одговорен работник од тоа време на СВР до началникот да се отвори соработничко досие на мое име 1973 година кога сум бил студент, понатаму предлог да ми се подари пенкало вредно 540 динари за Нова година, како на претседател на сојузот на студентите на Македонија и барање да се укине соработничкото досие на мое име. Тоа се сите документи што таа комисија со нелегитимниот претседател располагаат“ вели Угриновски.
Останува на одлуката да се повлече од советничкото место од Советот на Град Скопје, но вели дека оваа одлука не била донесена поради заклучокот на Комисијата, туку од лични причини и била донесена уште пред десетина дена.
Неговата партија донела одлука на следните избори да влезе во коалиција со СДСМ, но тој нема да биде на кандидатска листа. Вели дека треба да им се даде предност на помладите.
Нарекувајќи го претседателот на СДСМ „другарот Бранко Црвенковски“ рече дека се согласиле да им дадат предност на помладите, а постарите како него, Црвенковски и Бучковски да се повлечат. Неофицијално на кандидатската листа во првата изборна единица на деветто место ќе биде неговиот син, пејачот Никола Угриновски – Угро.
Попладнево во 15 часот тој ќе се произнесе пред комисијата за лустрација, по што тие ќе треба да донесат решение по неговиот заклучок, а пота Угриновски ќе одлучи како ќе постапува. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Костадиновска-Стојчевска од Пустец: Идеалите на Делчев за слобода и рамноправност се нашиот патоказ кон Европа
Министерката за култура Бисера Костадиновска-Стојчевска, денеска во своето обраќање на свеченоста по повод откривањето на спомен биста на македонскиот великан Гоце Делчев во Пустец, Република Албанија, изрази задоволство дека заедно со Македонците од другата страна на границата, оддава почит на еден од најсветлите ликови на нашата историја, идеолог и борец за слободна и независна македонска држава.
„Делото на Гоце Делчев ги поврзува сите Македонци, каде и да сме. Ние нема никогаш да се откажеме од големите дела и големите зборови на нашите револуционери кои биле на вистинската страна на историјата, како што сме ние денес. Ние кои сме во прогресивниот табор и кои на државата и посакуваме светла европска иднина со рамноправни граѓани и среќни млади генерации“, рече Костадиновска-Стојчевска по повод откривањето на бистата на Делчев, на годишнината од неговата смрт.
Минситерката за култура посочи дека народните херои, како Гоце Делчев, и нивните идеали за слобода и рамноправност се нашиот патоказ кон Европа. Таа нагласи дека неговата визија за светот како поле за културен натпревар помеѓу народите нема никогаш да го изгубат значењето во нашето колективно постоење и во нашето настојување да создадеме сигурна, просперитетна и заедничка иднина.
„Останавме доследни на нашето ветување дека нема да престанеме да градиме мостови на поврзување и дијалог“, додаде Костадиносвка-Стојчевска која на свеченоста присуствуваше со директорката на Завод и Музеј-Битола, Мери Сојанова која во континуитет ги продолжува проектите на „Смарт фор ју ту“, за прекугранична соработка со Албанија, со што активно придонесува за поврзаноста на населението во граничниот појас.
Бистата на Делчев е поставена на иницијатива на Македонска алијанса за европска интеграција, МАЕИ, чиј претседател Васил Стеровски дека оваа биста е симбол на нашата непоколебливост и верба во принципите на правда и слобода.
„Во овие тешки времиња, повеќе од кога било ни е потребно единство и решителност. Нека примерот на Гоце Делчев биде наш водич и инспирација“, рече Стеровски кој додаде дека како Македонска алијанса за европска интеграција продолжуваат да се борат за правата и идентитетот на македонскиот народ во Албанија.
На свеченоста по повод 121 годишнината од смртта на големиот револуционер присуствуваа претставници на Движеньето “За наша Македонија”, на Македонска ализанса за европска интеграциа од Голо Брдо, од Светскиот Македонски Конгрес, од Заедницата на Македонците од Егескиот дел на Македонија протерани ог Грција, од Соузот на здружениата на Македонците и децата бегалци од Егерскиот дел на Македониа МАКЕДОН како и од Македонскиот национален совет на Србија.
Бистата на Гоце Делчев е изработена од уменикот Зоран Тошевски, а е поставена пред цркавата „Св. Архангел Михаил“ во Пустец, на плоштадот именуван по Делчев. Како што велат од Македонската алијанса за европска интеграција, МАЕИ, со поставувањето на бистата на големиот херој, Македонците од Пустец ја потврдуваат својата верба дека вредностите за кои тој се борел остануваат живи и водилка и за денешните генерации. Поставувањето на оваа биста ќе придонесе за зачувување на македонското културно наследство и идентитет во областа Преспа.
Македонија
Османи: На идните генерации не им треба мрачното минато, туку светлата европска иднина
Бујар Османи, во својство на претставник на Европскиот Фронт, денес одржа отворена дебата на тема: “Исклучувачки национализам во мултиетничките држави”
Османи на дебатата потенцира дека баналната реторика на македонскиот опозициски блок за наводното отфрлање на настаните од 2001 година, не е ништо друго освен залуден обид да се намали вистинската сила на Албанците наредени во неспорниот победнички блок – Европскиот фронт.
“На идните генерации не им треба мрачното минато, туку светлата европска иднина, во постојан сојуз со НАТО и САД” рече Османи и повика еднаш засекогаш да се осуди мрачната и безнадежна путинистичка политика.
Воедно, Османо истакна дека: “Кампањата за претседателски и парламентарни избори на Европскиот фронт е најпозитивната и најпрогресивната кампања од сите политички опции во земјава досега”, при што додаде дека јасната програма со конкретни развојни проекти, како и конкретниот преглед на европскиот пат на Северна Македонија за полноправно членство во ЕУ до 2030 година, се главните столбови на опцијата на коалицијата предводена од ДУИ која на 24 април доби плебисцитна поддршка кај Албанците и другите заедници и која ќе се заокружи на 8 мај.
Дебатата беше поткрепена со излагањата и на проф. д-р. Арта Билали, проф. д-р. Башким Селмани и Даут Даути, писател и публицист.
Панелистите во своите излагања ги истакнаа негативните ефекти од подгревањето на национализмот и владеењето на нееднаквоста во општеството, односно ја истакнаа потрбата за вистинска еднаквост меѓу Албанците, Македонците, Турците, Ромите, Србите, Бошњаците, Власите и сите други граѓани без разлика на нивната етничка или верска припадност.
Македонија
Делегација на Левица положи цвеќе на гробот на Гоце Делчев
Денес, делегација на Левица, предводена од потпретседателот на партијата, Реџеп Исмаил-Хактан, заедно со уште двајцата соборци како членови на Централниот комитет на Левица, Александар Димитриевиќ и Мери Георгиевска, положи цвеќе на вечното почивалиште на апостолот на македонската националноослободителна борба – Гоце Делчев.
Во овој историски момент, како никогаш досега во историјата од независноста на Македонската држава, од страна на домашните квислинзи и вазали, а во спрега со странски емисари и останати империјалистички намесници, загрозени се фундаментите на националната свест на Македонскиот народ. Еден таков пример е токму т.н. Француски предлог со кој квислиншката власт, во име на некаквиси „европски вредности“, задоволувајќи ги великобугарските апетити, наметнуваат политики кои директно го сквернават ликот и делото на бастионот на македонската национална свест, Гоце Делчев.
Оттука, уште еднаш ги повикуваме сите политички чинители во Македонија да ги поддржат црвените линии утврдени во петте точки од нашата Македонска платформа, со што ќе ставиме до знаење на сите, како странски, така и на домашни поткопувачи на македонската државност, дека повеќе не се прифатливи никакви уцени и компромиси на штета на македонските национални интереси, сè со цел да се запре понатамошното разградување на Републиката, се вели во партиското соопштение.