Генералниот секретар на ОН, Бан Ки-Мун, специјалниот меѓународен пратеник за Сирија Кофи Анан, како и шефот на меѓународните набљудувачи во Сирија норвешкиот генерал Роберт Муд во сабота ја осудија бруталната трагедија во градот Хула во провинцијата Хомс.

Според последните податоци на Сирискиот центар за човекови права (OSDH) со седиште во Лондон, во градот Хула загинале 92 лица, од кои 32 деца, како резултат на артилерискиот оган отворен од страна на армијата на Сирија. Смртта на цивилите во градот Хула ја потврдија и воените невооружени набљудувачи со мандат на Обединетите нации.

„Тоа е провокација и брутално злосторство, бидејќи на неселктивната и непроперционална употреба на сила претставува флагрантно кршење на меѓународното право и обврските на сириската влада да престане со користење на тешкото оружје во населените места, да не се прибегнува кон насилство во каква и да е форма“, се истакнува во соопштението на Бан Ки-Мун и Кофи Анан издадено во саботата навечер.

Според генералниот секретар на Обединетите нации и специјалниот пратеник на ОН и Арапската лига за Сирија, одговорните за овој напад мора да бидат казнети.

Шефот на набљудувачката мисија на ОН во Сирија, генералот Роберт Муд претходно го опиша слученото во Хула како „брутална трагедија“, но притоа не прецизираше кого набљудувачите го сметаат за одговорен за масакрот. Муд, истот така, изјави дека набљудувачите, кои лично го посетиле местото на трагедијата во областа забележале тенковски гранати.

Генералот Муд за новинарите на прес-конференција во сириската престолнина Дамаск изјави дека „Без оглед на тоа кој го извршил масакрот и кој прв го започнал пукањето, смета дека сите коишто учествувале во ова крваво насилство мора да одговараат“.

„Генерла Муд ја повикува сириската влада повеќе да не го користи тешкото вооружување, а сите страни ги повикува да го прекинат насилството во каква и да е форма“, се наведува во соопштението поделено на новинарите по прес-конференцијата. Муд притоа предупредува и од опасноста од избувнување граѓанска војна. „Тие коишто користат насилство за сопствени цели може да ја направат ситуацијата уште понестабилна, а ваквото насилство е неприфатливо и непростливо. Убиствата на невини деца и цивили мора итно да престанат“, предупредува генералот Муд.

Кофи Анан има намера наскоро да го посети Дамаск и да се сретне со претставнциите на опозицијата со коишто ќе разговара за преземање итни мерки за решавање на конфликтот во Сирија кој трае речиси 14 месеци.

Британскиот министер за надворешни работи Вилијам Хејг изјави дека ќе побара остра реакција на меѓународната заедница за овоа „страшно злосторство“, а масакрот го осудија и претседателот на Арапската лига, Набил ал-Араби, како и францускиот министер за надворешни рбаоти Лорен Фабиус, а исто така жестока осуда за масакрот во Хула стигна и од Германија.

Шефот на француската дипломатија Фабиус рече дека работи на органзирање на состанок на групата Пријатели на Сирија во Париз, меѓу коишто се претставниците на арапските земји и западните држави, но не и Русија и Кина, двете држави коишто од одамна одржуваат тесни врски со Дамаск и претходно во два наврата блокираа носење резолуција за Сирија во Советот за безбедност на ОН со која ќе биде осуден само режимот на сирискиот претседател Башар ал-Асад и ќе се воведат санкции против него. Британскиот министер Хејг извести и дека има намера да свика итна седница на Советот за безбедност.

Претставниците на Слободната сириска војска којашто се бори против армијата на режимот на претседателот Асад изјавија дека веќе нема да можат да се придржуваат до договорот за примирје, освен доколку Советот за безбедност на ОН не ја гарантира безбедноста на цивилите.

Според податоците на Сириската опсерваторија за човекови права (ODSH) со седиште во Лондон, во масакрот биле убиени повеќе од 110 лица. Портпаролот на Опсерваторијата, Аусама Монаџед изјави дека режимот избира изложени градови за на целата земја да и’ одржи лекција. Активистите на Опсерваторијата поради масакрот и во знак на почит кон жртвите повикаа на ден на жалоста.

Судирите во Сирија продолжија и покрај разместувањето на 270 воени неооворужени набљудувачи со мандат на Обединетите нации, кои го надгледуваат прекинот на огнот како една од првите точки на планот на специјалниот пратеник Кофи Анан со кој се согласија и двете страни. Според податоците на ОН, од март 2011 година откако избија протестите во Сирија инспирирани од ткн Арапската пролет што ги зафати Тунис, Либија, Египет и другите арапски земји, коишто се претворија во крвави судири по обидот на сириските безбедносни сили да ги задушат со сила, во конфликтот загинале повеќе од 10 илјади лица. Опозициската Сириска опсерваторија за човекови права смета дека бројот лица кои ги загубија животите во 14-месечните судири надминува 12 илјади. Официјален Дамаск, пак, тврди дека бројот на загинатите изнесува околу 4.500 луѓе и уште 2.800 припадници на безбедносните сили коишто „се напаѓани од добровооружените терористички групи оркестрирани од странство“./крај/мф/сн