Поборниците за останувањето на Велика Британија во Европската унија во понеделникот тргнаа во придобивањето на неодлучните гласачи на лабуристите кои би можеле да донесат предност на референдумот кој ќе се одржи на 23-ти јуни.

Загриженоста дека британските избирачи ќе гласаат за излегување од Европската унија (Brexit), во понеделникот ги намалија вредностите на азиските и на европските акции.

На обложувалниците, пак, паднаа коефициентите за останувањето на Велика Британија во ЕУ, а двете анкети кои во понеделникот ги објави ICM покажуваат дека кампањата за излегувањето ја зголемила својата предност пред оние кои се за останување.

Во јавната дебата во којашто доминира расколот во владејачката Конзервативна партија на премиерот Дејвид Камерон околу излегувањето, поборниците на останувањето се загрижени околу тоа дали нивната порака стасува до гласачите лабуристи за кои се смета дека ќе ја донесат предноста на референдумот.

Поборниците на останувањето во понеделникот ја покренаа акцијата под мотото „Лабуристите го возвраќаат ударот“, организирајќи серија говори на истакнати лабуристи.

„Во следните десет дена мораме да ја шириме својата порака меѓу луѓето. На Британија најдобро ѝ е кога гледа кон надвор, кога е ангажирана, гостољубива, свртена кон меѓународната сцена, свесна за својата улога во светот…., а не изолационистичка и затворена на островот“, рече поранешниот лабуристички премиер Гордон Браун во Лестер.

Браун е заслужен за решавачката интервенција во последниот миг пред шкотскиот референдум за независност во 2014 година, кога 55 отсто Шкоти гласаа за продолжување на унијата со Англија и покрај големата поддршка за сепаратистите.

Новинарите присутни на лабуристичкиот собир го прашаа Браун како планира да ги увери гласачите лабуристи кои се загрижени од нивото на имиграцијата дека тоа заслужува останување во ЕУ. Браун смета дека треба да се стори повеќе во прашањето на инвестициите во јавните услуги кои е под притисок од големото ниво на имиграција, додавајќи дека илегалното доселување е поголем проблем од ЕУ миграциите.

Иако лабуристите официјално се за останувањето во ЕУ, нивниот челник Џереми Корбин е критикуван дека не прави доволно да ја шири таа идеја, што тој во понеделникот го отфрли.

„Драго ми е што гледам дека лабуристите се поангажирани отколку изминатите месеци. Корбин и неговите колеги би можеле да дадат поголема поддршка. Охрабрувачки е што сега излегуваат во јавноста“, смета Три Скулер, претседател на трговската асоцијација EEF.

Со слаби изгледи за раст, загриженоста дека Brexit ќе ја врати Европа во рецесија на врвот од листата е загриженоста на инвеститорите, која вклучува и негативни каматни стапки и опасните економски нерамнотежи во Кина.

Иако повеќето анкети покажуваат дека Британците и натаму се поделени околу референдумот, анкетата која во петокот ја објави ORB, во која стои дека кампањата за излегување има 10-процентна предност пред кампањата за останувањето, ги вознемири пазарите.

Европските акции во понеделникот паднаа речиси за 1,9 отсто, додека азиските берзи забележаа најголем пад во последните четири месеци./крај/мф/сн

Извор: Reuters