Новите давачки за тутунските производи ја стимулираат нелегалната трговија

Новите давачки за тутунските производи ја стимулираат нелегалната трговија

Поради повисоките цени, приливите во буџетот ќе бидат реализирани

Шверцот со цигари бележи нагорен тренд, иако засега е во блага форма. Поголемо зголемување на трговијата на црно со тутунските производи се очекува од идниот месец, кога цената на цигарите, како што е најавено, ќе порасне поради новата давачка што треба да се издвојува за тутунарите. Сепак, и покрај сў поатрактивната трговија на црно со цигарите, како акцизни производи, се очекува во Буџетот на државава да се генерираат планираните средства, што се должи на зголемените давачки.     

"Зголемувањето на давачките на цигарите ќе овозможи физичкото полнење на Буџетот да биде реализирано во целост. Проблем претставува предвидувањето на зголемувањето на шверцот на цигарите што се јавува според системот на врзани садови поради тоа што станува поатрактивна заработката на лицата кои работат на црно. Со новата давачка за цигарите за помош на земјоделството се очекува зголемување на оваа општествено негативна појава. Но, со зголемена контрола и конзистентен пристап на Царината и на другите институции во државата, се надеваме дека шверцот ќе се држи во некоја контролирана рамка. Засега сў уште не се алармантни податоците дека нешто драматично се случува на пазарот на црно во делот на трговијата со цигарите. Информациите од терен говорат дека има само благо зголемување на шверцот. Досега нема направено подлабока анализа дали шверцот повеќе доаѓа однатре или се увезува", изјави досегашниот директор на Царината Илија Илоски за време на примопредавањето на должноста на новиот директор Владе Диневски.

"Со чинот на моето излегување од Царината, се прави исчекор во политичкото однесување на овој простор и се подигнуваат нормите на личното однесување во политиката, при што, одејќи на нова функција, ја напуштам директорската фотелја во Царината. Со носење внатрешно персонално решение се доведуваме во ситуација идните власти да го задржат овој тренд на однесување, со доаѓање на професионалци на нивното вистинско место. Со именување на новиот директор, очекувам Царината да продолжи по трасираниот пат кон евроинтегративните процеси", додаде Илоски.

Задржувањето на овој курс го потврди и новиот прв цариник во земјава.

"Курсот што го водеше Илоски, посебно во делот за евроинтеграција, ќе го продолжиме. Има делови што се завршени, има делови кои сў уште се во фаза на доградба, па интензивно ќе работиме на нивно заокружување", изјави новиот директор на Царината, Владе Диневски.                            (А. С.)