Од 1-ви јануари почнува примената на Законот за заштита од пушење, што значи целосна забрана на пушењето во кафеани, кафе-барови, диско-клубови…. Освен во затворени простории, цигара нема да може да се запали и на терасите, шанковите и во летните бавчи, секаде каде што се служи храна и пијалаци

Пушењето не е забрането само во домовите на луѓето, на отворен простор и на јавни површини доколку не се одржуваат спортски натпревари, културни и забавни манифестации, собири и други јавни настани. Тогаш пушачите ќе мора да се воздржат и цигара да запалат по завршување на манифестацијата или собирот. Пушачите за непочитување на Законот ќе платат од 150 до 300 евра, а казните за непочитување од угостителите и фирмите се од 2.500 до 4.5000 евра, додека за одговоните лица е од 100 до 300 евра. Според Законот за угостителска дејност, предвидено е и затворање на објект во траење од 30 дена. Државниот пазарен инспекторат ќе врши контрола во кафеаните, кафе-баровите…, додека во другите установи забраната за пушењето ќе ја контролира Здравствено-санитарниот, Образовниот и Трудовиот инспекторат. Законот за заштита од пушењето предизвика револт кај угостителите кои побараа негово пролонгирање и либерализација како во некои европски земји. Угостителите бараат можност за инсталирање вентилација, приспособување на простории за пушење во угостителските објекти или тоа да се дозволи барем на отворените делови. Спроведувањето на овој закон, според нив, ќе го намали прометот во угостителските објекти, а тоа ќе ги принуди да отпуштат дел од персоналот.Хотелиерите само 30 осто од собите ќе треба да ги наменат за пушачи, а во останатите 70 пушењето ќе биде забрането. Според сопствениците, гостите од ресторанот ќе мора да се враќаат во соба за да запалат цигара.Во угостителскиот сектор во Македонија работата околу 17.000 лица, што е 2,3 отсто од вкупно вработените. Во Словенија каде што ваков закон веќе се применува, стотици кафулиња се затворени, а во Германија угостителите веќе ја тужеле државата. Целосна забрана на пушењето во ЕУ воведоа Ирска, Малта, Италија, Шведска, Литванија, Естонија, Финска, Велика Британија, Франција, Холандија и Словенија.Од 24 јануари и кутиите за цигари ќе мора да содржат налепници со слики од заболени органи на пушачи. Производителите имаат рок од три месеци да ги повлечат или да ги продадат старите пакувања на кои нема налепници.Законот за заштита од пушење забранува и рекламирање на тутунски производи на затворени и на отворени јавни места. Во Македонија годишно се пушат околу 11.000 тони цигари, или поединечно секој граѓанин пуши околу 5,5 килограми цигари. Според анализите на Светската здравствена организација, Македонците се на врвот на листата на најстраствени пушачи во светот и го држат второто место, пред нив се само Пољаците. Анализите покажуваат дека тутун консумираат 35 отсто од вкупното население во земјава или 700 илјади луѓе.